百厭仔...

雖然今日係兒童節,講卡樂B壞話好似唔多好...但MAMI實在不吐不快!

• 4月2日:卡樂B終於自己爬左上梳化,其實我都幾開心架...都叫做識多樣野AH MA.但為左唔想卡樂B覺得MAMI好鼓勵佢做呢D危險動作,唯有若無其事咁抱返佢落地,同佢講左聲NO就算. 今朝早,佢趁我攞返隻杯入廚房個短短幾秒鐘時間就爬左上去...我當然嚇死啦! 即刻好大聲咁同佢講:哎呀!跌鬼死你呀,呀仔!佢竟然好得戚咁對住我笑 

• 4月3日:放左工就同卡樂B去超級市場入貨,之前PAPI話佢食飯個陣好扭計,連平日最鍾意嘅香蕉都係咁意食左一啖就算...為怕佢係超市肚餓扭計,我就要袋定D麵包小食一路買野一路比D佢食,佢一開始食就唔停得,仲做埋D危險動作向後拗腰揾我擺喺架車度D野食...攪到我都唔敢太專注去揀野.

最後,終於買完野,我繼續比住D小食佢頂吓肚,但等PAPI黎接我地等到我都有D肚餓,於是我就喺架車攞左包啱啱買嘅餅拆黎食啦...佢一見到包餅,即刻隨手"DUM"左佢手上食緊嘅"乖乖"喺地,跟住就用手要攞我手上嘅餅...呀仔,你知唔知你做錯左幾多樣野呢? 

第一:亂拋垃圾; 第二:浪費食物; 第三[亦係最嚴重嘅一項]:同MAMI爭野食!

• 請看以下圖片: 夠百厭未?

呢副喺屋企戴嘅舊野,都同佢做左好多次矯形手術架啦...真係唔知仲可以挨多幾多次???

栽花定摧花?

我咁大個人都未真正玩過種花架,不過呢度D朋友,同事,隔籬左右都會種少少,有D仲租埋ALLOTMENT種瓜種菜,種到食都食唔晒...

其實我都唔寄望種得到咁多野,只不過想試下係咪真係人地講得咁易,種少少玩下...如果有幾支花睇下,我都心足架啦

牛刀小試,我揀左向日葵同埋LAVENDER. 第一步就要播種,等發芽.我預備左以下材料,工具:

種子,"吉"左"隆"嘅甜品膠杯仔,泥,[監公一名:隨意]

根據包泥上面嘅指示:好似整朱古力批一樣,用D泥填滿個杯,壓實小小D泥,加D水,落種子之後再舖多D泥,再加D水就攪掂.

向日葵種子,其實都係喺D花度攞出黎嘅,不過種子包裝上嘅說明書就寫明呢D係唔食得嘅,但日後種出來D花入面個D就可以食啦! 唔明...

LAVENDER 嘅種子好細,開袋個陣爭D飛哂出嚟,仲有呀...第一年係唔會開花住嘅,出年先有花架 ~ 唔知會唔會有例外嘅呢?

最後嘅指示係要將D落左種子嘅杯仔用野蓋好,保持泥土濕潤, 我就用保鮮紙,方便每日淋水.其實我唔知得唔得架,只係就地取材...

跟住就要等發芽,2個星期左右就會見到架喇,如果無野睇,就即係粒種子發芽唔成功...要換過D種子再發過,希望有野睇啦

2個星期後再同大家報告!

今日去TODDLERS' GROUP 有乜做?

天氣回暖,今日去TODDLERS' GROUP 可以出空地玩...

MAMI照例遲到[呀仔,我要收左工先可以帶你去GA!]所以我地去到嘅時候PLAYROOM入面一個人都無,去到空地望下,原來姨姨已經預備好左D戶外玩具係到,D 小朋友出哂去玩LU...

我照例去罰企5分鐘 ~  呢個係我用黎觀察/熟習四週環境嘅指定動作

夠鍾!開始活動...唔知點解...MAMI話我似監犯WOR

砌巨型積木都幾好玩...

後來先發現玩水更加好玩...

玩到我流哂口水都唔知,真失儀... 我仲整濕左條褲小小,好彩PAPI無見到...

MAMI 話: 其實卡樂B今日都有D NAUGHTY GA!

見到人地玩THOMAS 火車,佢又想玩,但又唔敢行去人地面前攞架火車,人地DADDY見到就隨手攞部車比佢,佢竟然推開人隻手WOR!

後來佢去攞住個桶行行企企,有個4/5歲嘅姐姐想同卡樂B玩,喺佢面前行來行去,卡樂B居然可以當姐姐透明一樣,望都無望人一眼,攞住個桶自己繼續行...

真係要多D帶佢出去接觸下其他小朋友先得! 就算佢比其他小朋友"蝦",搶下玩具都好呀! 等佢可以學到點同其他人相處AH MA! 唔係大個D喺學校比其他同學BULLY佢點應付呀？