Tuesday 20 December 2011

Season's Greetings 2011

煩煩忙忙過左2個幾月
[要同各blog友講聲唔好意思:消失左咁耐。。。]

又到左都係好忙(但又好開心)既12月

又到卡樂B生日。。。4嵗啦!
[生日blog拖住先,hehehe]

接住就係聖誕。。。
[趁有時間整張賀卡啦!順便比大家見下我地既近况]



Click to play this Smilebox greeting


Tuesday 4 October 2011

馬不停蹄,又再南下!

去完LEGOLAND返黎未坐定,MAMI又帶住卡樂B南下!去倫敦MEET-UP香港過黎既死黨!

PAPI無報名參加,MAMI同卡樂B自己坐CHOO CHOO TRAIN落去!

個零月前買票。卡樂B唔洗買票,但人滿無多餘位就要坐MAMI大脾。上網訂票個陣望望:咦...頭/二等既票價相差無幾BOR!今次就豪D坐頭等啦!張椅大D,萬一要坐大脾都無咁逼嘛![而家ONLINE買火車票都有CASHBACK,MAMI又執返幾十便士入袋。。。哈哈哈!]

來回票+訂坐票+地鐡票+收據=6張PRINTOUTS! 袋穩呀!唔係就會好似上次咁,揾唔返個指定席,變左無位坐架啦!















星期日通常都有鐡路維修/保養工程,火車會改道,行遠D/慢D,平日最快一個鐘既車程,今次要差不多兩個鐘完成!

好彩地。。。卡樂B帶埋好朋友MEKKA PAKKA一齊去。















上到車,食左早餐,就開始玩!















車程最後比原定時間早左10分鐘到站,死黨亦一早到達坐定定等我地出黎!

英國天氣“3時花,6時變”,我地只係簡單想定左幾個地點,到見面當日再視乎天氣/時間/精神状態先落實去邊度玩!

2011年10月2日竟然係晴天,仲好熱(天氣反常既10月熱浪!)。可以户外活動。我地就决定去COLUMBIA STREET FLOWER MARKET行下。

哎吔。。。地鐡又維修!唯有上地面搭巴士啦!

COLUBMIA STREET既花市同香港既花墟好似:一樣成條街擺滿花檔,一樣係幾吊脚既地點。落左地鐡/巴士都要行成10分鐘左右。我地行行蕩蕩又MISSED左個街口,又要問人點行返轉頭!最後都揾到花市位置。又同花墟一樣:人頭湧湧!

寫呢個BLOG個陣CHECK返D相先發覺原來當日影左好少相咋!無法啦:天氣熱,人又多,卡樂B都唔係好慣,所以都要多照顧/望多佢兩眼呀!

花種類繁多,價錢都唔錯。我最想買個盤無花果囉 [保證有收成嘛!] 但點抬住上火車呢?。。 。哈哈哈!




















行完花市,都係要搭巴士走!坐住熱狗巴士,熬到卡樂B訓左!都好!有個小休差下電,唔係實無力跑埋下半塲!

巴士出到牛津街總站我地就落車。上一次黎牛津街SHOPPING,大大話話都成10年前LU。講路過既話。。。都應該係4-5年前既事。真係變左個郷下婆。。。原來而家開多左咁多國外流行品牌旗纜店,MAMI都只係可以經過門口嘩一聲就要繼續行。因為下半塲主力係食!

去到茶樓,等到位就即刻點野食啦!叫滿一檯,好似前世未食過咁!















但好唔好彩,卡樂B每次食點心必食既芋角已經沽清![早知唔特登行過黎食中餐啦!]

食過LATE LUNCH又要回程LU。。。短短幾小時既MEET-UP,卡樂B都同MAMI既死黨混熟左,一路行去月台上火車都仲一路轉頭講拜拜。下次再見會唔會唔肯走呢???

CHORIZO WITH RED WINE

好耐都無機會坐定定睇D自己鍾意即電視節目啦!MAMI好鍾意睇烹飪節目,睇啱好食/易做既就會記低跟住整黎食。好食/難整既就睇左當食左算數!

先幾日,MAMI就係電視送飯既時候見到CHORIZO WITH RED WINE呢個TAPAS,即時覺得好易做/好好食,而且屋企有好多葱頭(SHALLOT)要消烕,呢個食譜黎得真及時!

整呢個TAPAS要4樣主要材料:CHORIZO/SHALLOT/RED WINE/PARSLEY: 屋企1缺3,但NO PROBLEM!去到超市好易執齊材料啦!















做法都真係好間單:爆香青葱,落CHORIZO,落紅酒,慢火煮到SHALLOT溶溶地/STICKY,落PARSLEY兜均。

CHORIZO本身已經頗鹹,加埋唔少香料做成,所以呢個餸唔洗再加額外調味。
















好唔好食? 好食,但鹹同肥架!所以食左呢次,有排都唔會再整。

消滅左大部份葱頭,而家就要揾D野煮,幫MAMI消滅埋D紅酒。。。

Monday 26 September 2011

MACANESE MINCE

MAMI有朋友係澳門長大既葡國人,佢哋整嘅家常菜同我地既廣東家常菜又有唔同啦!今次朋友介紹左一個好易整又好送飯既菜式。

MACANESE MINCE = 澳式免治,朋友屋企叫呢個餸做MINCHI。

材料:
薯仔一個:切粒用油炸熟備用。[怕熱氣既話,可以唔炸,烚熟薯仔]。


免治牛肉一份:放入調味半小時左右,(MAMI用猪肉)。
洋葱(半個),葱頭(SHALLOT) 2粒,蒜頭2-3粒:全部切粒。
黄薑粉(TUMERIC):1小匙。


做法:少少油起鑊,落洋葱/葱頭/蒜頭,加入黄薑粉兜均。洋葱/葱頭/蒜頭軟身就加入免治,中慢火兜下炒下,煮到水同油都乾晒/免治乾身就可以加入老抽整靚D色水/調味。[仲可以加少少喼汁(WORCESTER SAUCE)]。

[MAMI自把自為加入左青豆。]

然後加入炸好既薯仔粒,兜均。完成。


要卡樂B試食新菜式,唔容易!

不過MAMI次次都係講個堆對白:乖啦!試一啖咁多啦!未試過唔可以話唔食,試左唔鍾意可以吐返出黎,MAMI就以後都唔會再叫你食呢樣餸,OKAY?

卡樂B仲要問多句:以後都唔好再整BOR!

苦口苦面食左一啖。。。Hmmmm。。。NICE!

MAMI:咁仲要唔要多D?[呢個仔有時係好有禮貌地講聲NICE,其實唔鍾意/唔會再食架!]

卡樂B:YES, PLEASE。

就係咁,卡樂B今餐就全程食MINCHI,最緊要羹羹飯都跟有炸薯仔同免治就得啦!最後,MAMI預備左STAND-BY既叉燒都無食過呀!



要卡樂B食埋D 蕃茄仔又點做呢?MAMI耐不耐就話:你唔好掂MAMI D 蕃茄呀!蕃茄係MAMI架!一講卡樂B就會即係擺一粒入口,MAMI要扮見唔到,問返邊個咁曳食晒D蕃茄!講得幾次,碗蕃茄就落晒卡樂B個肚。MAMI最後就讃埋卡樂B係好强壯既No. 4(就黎4嵗嘛!),個仔就當堂覺得自己大個晒,好叻仔咁!下次要鼓勵卡樂B食其他野都可以用同一個辦法:真係橋唔怕舊,最緊要受!



Saturday 24 September 2011

又南下一遊

今年父親節南下玩左兩日,PAPI又玩上瘾,叫MAMI等D小朋友開左學又揾個週末去玩多次。

今次都唔洗做乜特别RESEARCH,就係照上次行程一樣就可以啦!但MAMI都要CHECK清楚D细節。

一CHECK!我地食點心既指定地點装修,要轉移陣地:揀左倫敦外圍同一集團既分店。


食物水準。。。係差少少既。最大問題係服務唔多好!PAPI話無下次!

去到酒店。。。本來想睇飛機,可能季節/風向唔同左,又或者係跑道維修保養,今次D飛機無係最近停車塲既跑道降落呀,呢個行程要臨時取消!

唔緊要啦!横掂都已經天黑,又大風,去餐廳食少少野就覺覺猪準備聽日既活動啦!

第二朝,唔洗好似上一次趕餐死咁去麥當當食早餐,但入到去都頗煩忙,等左一陣先攞齊晒D野食開餐。

食飽飽就向LEGOLAND出發。PAPI已經認得路,好快就去到目的地,泊好車!



今次MAMI做足功夫,係網上揾到一PRESCHOOLER加一大人既特價COUPON,一大一细慳左50鎊!仲有一大人又點入塲呢?MAMI係網上投到轉讓既COMPLIMENTARY TICKET,盛惠10鎊(又慳30鎊!)今次好抵玩呢!

上次黎玩,每個RIDE都係等10/20分鐘左右,MAMI都已經覺得少人/易玩架啦。開左學,成個PARK都静晒,今次係。。。1分鐘都唔洗!

所以卡樂B呢頭玩完一次駕駛學院,一落車就行返轉頭又玩多左一次。够晒數!



上次卡樂B見到有水既都唔肯玩。今次竟然比MAMI/PAPI帶住就上左賊船都唔知!

好難得地一家3口坐左一次船仔,個圈都頗大,如果PAPI唔上船,MAMI都可能揸船揸到手軟。



MAMI真係好想坐今年最新開既ATLANTIS SUBMARINE VOYAGE ~ 潛水艇水族館,所以就同PAPI講當散步咁散入去排隊,希望卡樂B可以唔覺唔覺上左船。

好好彩,行到水族館,係無人既,即入!PAPI/MAMI就呃住卡樂B話去揾OCTONAUTS (卡樂B近來好鍾意既一套卡通動畫)。

一隻潛水艇應該可以坐10個人左右,但當日我地得我地同另一個FAMILY,人少少無咁CLAUSTROPHOBIC,真係一個大幫忙。

卡樂B其實都知道唔係OCTONAUTS,自己話比我地聽而家係係潛水艇入面,咁就好做啦!大家就一齊睇下D鲨魚/魔鬼魚/LEGO砌成既海底世界,ENJOY THE RIDE!


坐完潛水艇,帶卡樂B去坐兩次DINO-SAFARI。坐完,卡樂B話攰,玩够啦,連LUNCH都話唔食,要返酒店(CHECK OUT 左啦,仲邊度有得返呢?),於是我地就提早開車北上返歸囉!

而家都仲可以閒日/淡季同卡樂B去玩,避開人潮,下一年卡樂B正式入學就去邊都要等學校放假先可以,即係人多/旺季收費,真係要趁今年最後一年要去玩多D先得!

Friday 16 September 2011

大清理。小買賣

幾星期前,PAPI的起心肝清理左車房。。。雖然而家都無可能泊到架車入去,MAMI唔MIND呀,當初想搬都係想多個車房變身成既雜物房,但總算通行無阻。

車房既野清到咁上下,PAPI就轉移目標到屋入面(絶大部份屬於MAMI)既野,MAMI都唔可以躲懶,真係要整理下啦!

儲埋唔少野唔肯扔,原因係買既時候唔平,而且又新浄無爛,第日有機會再用(自己覺得!)。OR有時間就影好相,放上網賣,都算係RECYCLING,又可以執返少少私己錢嘛。。。

撞正EBAY免刊登費用,拿拿臨就攞相機,摷下有乜野賣得。

最想GET RID OF既係卡樂B既衫同鞋。小朋友快大得黎好多野都新未過就唔再啱著,所以呢邊有D人唔係太介意用舊/二手。



一不做,二不休!又揾埋一棟唔再著既鞋出黎研究,有D竟然係全新既,有D著既機會唔多,所以状况非常良好架!又擺左幾對去拍賣。



















望住D鞋,想起公公婆婆以前成日講個句:買買埋埋咁多鞋做乜呀?百足都無你咁多對鞋!

又攞埋D賣黎賣去都賣唔去既出黎曝一曝光 ~ MAMI既大肚褲幾條,最衰無留起D DESCRIPTION,又要重新寫過。。。好鬼悶!

每日都會上網望下D野有無人'HOU',見到有人注視住我D貨,開心架!但當然,有人落標就更好啦!

結果。。。賣得最好既未必係MAMI最心水既幾件BOR!賣唔去既。。。又擺返埋繼續做私人珍藏囉!

擺開檔,MAMI又繼續係間屋度周圍瞄,睇下仲有D乜野可以變賣先!

比MAMI揾到左。。。















上網做左RESEARCH,揾間比得最多錢既就落鎚。

2日後,回收公司寄左信封等我地寄D電話過去。COVERING LETTER講話如果個電話唔用得(‘用得’既定義係後頁)個打價就會有唔同。MAMI CHECK一CHECK後頁。。。嘩。。。好多SMALL PRINT WOR,其中一項話如果電話落左鎖/密碼,開唔到就係唔用得=〉無錢收架!

好彩讀一讀,為左唔比籍口D 人壓價,MAMI又要揾返D舊火牛出黎同部電話充返D電,解鎖/密碼,再CHECK清楚D個人資料有無清理好先寄D電話去回收。有一部竟然揾唔返火牛,又要花幾鎊銀買過隻牛返黎充一次電,開返個電話先得。

等左幾日,终於收到回覆,得到之前QUOTE既價錢,HURRAY!

呢D錢唔會令人發達,但擺係度無用既野都可以换返D錢,想起都幾開心,所以MAMI呢排都頗努力清理D物件,做下小賣買。

今次賺到既錢會點用?WE'LL PUT IT TOWARDS OUR FAMILY SHORT BREAK。。。


Thursday 15 September 2011

博物館遊踪:ABBEY PUMPING STATION

趁住有FUNFAIR,又帶左卡樂B去行參觀下D歷史建築物。















呢個係PUMPING STATION,以前付責將係城收集到既污水PUMP去城外既污水處理廠。PUMPING STATION有百幾年歷史,其實都用到60年代先關閉。除左機械部份,建築物本身設計/装飾得好靚。



















呢组PUMP係同類型既PUMP中保存得最好,4個之中有3個已經復修好,可以運作。

一入到機房,好暖呀!D碌好大呀,仲係轉緊架!















爬兩層樓梯就上到PUMP房頂樓,見到PUMP既另一部份好似摇摇板咁一邊上一邊落咁郁緊。



















除左呢個主角,仲有D展覽介绍各種機電/科技產品。

小朋友就梗係手多多鍾意摸呢樣,玩個樣。入到黎就可以學吓織野,够手力既就可以試下手動發電點著個燈泡。



















卡樂B見到電車/纜車呢D有碌既物體,真係玩到唔捨得走!



















動畫係點黎既,呢個小實驗話你知。














呢個用黎做乜,MAMI睇唔明囉!














因為係FUNFAIR活動,週圍都擺多做好多舊機器/舊車比大家見識下。



















坐小火車,行到一半停左!個車頭仲走埋!改用另一個車頭拖返埋站!



當日仲有乜玩?可以放船仔,可以睇PUNCH & JUDY,搭古老巴士去城。



卡樂B對於沙既興趣普通,但臨走個陣,沙池少左人,都走埋去玩左一陣,但只限係池邊玩,仲未肯赤脚踩落D沙度!

最後既節目:食一啖雪糕。唔好以為食左好多先影相呀!個雪糕佬真係好MEAN,咁少都比得出!早知MAMI堅持要到麥當當先買啦!

Monday 12 September 2011

亞州材料。中國口味

上星期出城既街市行睇睇檔亞州檔有乜野賣。

呢邊講既ASIAN泛指印巴籍人士,但好多食材其實都係我地係香港煮食常用到既,例如:白蘿蔔,合掌瓜呢D,而家就連鬼佬超市都有得賣,但貴同埋唔係咁靚。反而去‘呀差’雜貨鋪或者街市檔就有機會揾到D好野。

今日無苦瓜賣!見到個次又無恨食,今次想食就揾唔到買。。。

但都揀左幾樣野。絲瓜,豆仔,芋頭仔。盛惠2.6鎊,覺得幾抵買!


絲瓜。。。其實係香港都唔係成日食,不過屋企個D史雲生雞湯盒又印左個上湯浸絲瓜既食譜,望落都唔錯,咁就揀左一棵試下啦!

有雲耳,杞子,仲落左幾塊肉片,有湯又有餸。。。唔錯!


豆仔。。。舊年公公過黎玩行街市見到都想買呀!但無時間煮,MAMI就到而家先想起可以買D食下。

煮左“炒豆仔”(娘家既叫法),不過除左豆仔,仲會加入碎肉炒。炒好之後,MAMI掙扎左一陣,加唔加料好呢?最後。。。大碗飯就變成左:豆仔肉碎太陽蛋飯。


芋頭仔。。。中秋應節食品之一。鬼佬超市幾個星期前都見到有賣,3鎊銀1kg,街市賣2.21鎊咋!

烚熟去皮蘸砂糖食!细個個陣鍾意食都係因為可以食砂糖,MAMI都應該有10幾年無食過。今日整左叫卡樂B試下,卡樂B話唔食架。但MAMI話要試過先可以話唔好食/唔食。試左覺得好難食可以吐返出黎。咁卡樂B就咬左一啖仔,話左聲好食,最後都吞埋。但MAMI問要唔要多啖,佢就擰頭啦!總叫做試過,今次算啦!下次有機會MAMI又會再比,樣樣都要試下嘛!














但月餅。。。卡樂B見/聞到蛋黄就已經唔鍾意,而且蓮蓉都頗甜,佢唔食就算,MAMI唔會迫佢接授囉!

Friday 9 September 2011

又收包裹

今朝未够九點就有人啪門,一定係收大件野!BINGO。。。香港寄黎既救援物資。

今次係一個鞋盒咁大咋。。。















就到中秋,MAMI實會冤屋企寄月餅比我,今年收到迷你白年蓉蛋黄+茶葉一包。仲有好CLASSIC既纸燈籠。
















卡樂B知道呢D係MOONCAKES, MAMI話等陣可以食月餅,但卡樂B話'THE MOON IS NOT OUT YET...' 哎吔。。。MAMI好心急想食架嘛!又要再等先食得。。。

酸梅湯。。。夏天想飲,落左ORDER,中秋先收到貨。。。哈哈哈
柴魚,火腿,豆豉:擺埋慢慢煮/慢慢食。
齋燒鵝,SURPRISE!



IPHONE 既SKINS,呢邊賣起碼5-6鎊一隻,香港買呢兩個有找!















卡樂B又收到D咩呢! 梗係車啦!



仲有海綿寳寳TEE。秋涼啦!要著多件長袖TEE打底再套短袖先得!

Tuesday 30 August 2011

晚餐 + 種植UPDATE

晚餐又係雞翼。。。

雞翼既醃法好簡單,攞一個無窿既膠袋,放入麵粉,少少辣红椒粉,PAPRIKA,盐,扭實袋口SHAKE,SHAKE,SHAKE就溝均D粉同調味。

呀! 呢個做法其實係好耐之前睇電視學返黎既:用碗難溝均D粉同調味,而且用袋會乾手浄脚D!原著係教整CAJUN CHICKEN,用麵粉會令雞皮香脆D,CAJUN SEASONING辣辣地,好冶味!而家要遷就卡樂B,所以落少左香料。
雞翼洗好,用厨房纸索乾身就可以放入袋麵粉度醃。

醃半個鐘左右就煮LU:入焗爐/開鑊煎都得。

費事成日開焗爐,今次煎雞翼!其實好怕雞槌厚肉煎唔熟,所以煎到咁上下,用刀仔刺入雞槌厚肉部份CHECK CHECK, 無出血水就即係熟,12-15分鐘就煎好上碟。



是日晚餐:



MAMI整緊雞翼,卡樂B走入黎話要幫手預備沙律!吔呀 ~ MAMI預左清炒翠玉瓜BOR。。。雪櫃得番少少青瓜,算啦!食埋佢啦!MAMI切好青瓜,卡樂B就自己揀左一包前幾日係超市送既新沙律醬SAMPLE話要食。開左黎唧上D青瓜度。一向食青瓜都係開碟醬就咁點黎食咋!今次超認真:唧好醬仲話要用碗MIX好先食得!















點知食左第一啖,卡樂B就大哎YUCK!MAMI試左一啖 ~ 都覺得唔係咁好食,包装話係青瓜+DILL口味既沙律醬,但食落似話梅味囉。。。MAMI都要講聲YUCK!卡樂B無沙律食,覺得有D失望呀!好彩食完飯食左半個萍果補數!

食左飯,洗完白白,覺覺猪,卡樂B似乎都仲好介懐個沙律醬咁難食,暗緊訓個陣仲同MAMI提返起呢件事,話下次去超市見到個男人仲係度派呢D‘壞'沙律醬,佢會同個人講唔要!

安頓好呢個小朋友,MAMI就去後園打理下D瓜瓜。。。

艾先生终於剪好草,仲唔覺意剪斷左幾枝魚翅瓜莖,但唔驚。。。兩棵都好大/好茂盛(但仲未開花呀。。。唉唉唉。。。),應該無影响既。



薯仔樹開花啦,原來仲有一棵唔够一尺高既係兩棵大既中間,都有開花呀!

苦瓜:都仲係得個幾塊葉,真係寄望不大啦。。。



HEA下HEA下又一日,放多一日就要復工,卡樂B唱遊班又重開。。。咁又一個暑假!

Sunday 28 August 2011

火燭館開放日

 星期六屋企附近既消防局攪開放日,卡樂B對消防員既興趣普通,但MAMI一向都係抱住多睇多見識既態度帶左卡樂B去八下!
消防員制服既顔色,同MAMI(記得)係香港見開既唔同。鮮色D應該好D既!但都有兩SET唔同既,我想係視乎當日任務/性質决定要著邊套啦!


週圍都見到呢D一堆堆既物體,連車上面都有,看似混亂,其實係已經預先套上左條褲既高筒靴,雙脚一插入對靴,揾手一抽褲頭就著埋褲 ~ 平日趕出門口返工都可以試試呢個方法!



開放日又有D小遊戲比大家嚐試操作D拯救工具:

救火喉:係小朋友都鍾意玩水,所以呢個項目好受歡迎。每次一開水喉,就有兩個消防員跑黎跑去做人肉箭靶比人射水。MAMI問卡樂B去玩水好唔好,卡樂B話唔想淋濕消防員,唔玩!



箝:要用個箝攞起隻蛋,當然係唔箝爛為之成功,但原來用少少力都會箝爛隻蛋,呢個唔易玩呀!



坐迷你火燭車:哈!卡樂B竟然唔肯排對,唔坐!



但卡樂B對D真實既火燭車装備就有興趣多D。




除左睇装備就係睇車既牌子!



當然唔少得既就梗係拯救示範。



唯一想玩完又玩既就係MINI GOLF, 仲要玩到出晒猫,擺到個波係洞口先撥個波入洞。。。



今日又鍾意玩手指,一做到五都唔厭!


行行下又够鐘醫肚/返歸,咁又一個暑期節目!