初嚐魚翅瓜 ~ 魚翅瓜肉絲羹

其實。。。我除左係齋舖既MENU見過魚翅瓜呢3個字之外，我咁大個人都唔知個瓜係點樣架（咪講話食添啦！）

直到黎左英國先知道原來好多人都會自己種黎食，仲講到好好食！機缘巧合之下，今年種到左！

跟據朋友既提議我就上網揾食譜。第一次食魚翅瓜，我整左呢個魚翅瓜肉絲羹。

材料好簡單：魚翅瓜（我用左1/8個，约1磅重），木耳/冬菇（浸軟切絲），红蘿蔔（切絲蒸軟），猪肉（切絲調味），雞湯。

魚翅瓜本身無乜味，所以要有個够味既湯底伴食會好D。我唔記得去唐人超市揾史雲生清雞湯，臨時去鬼佬超市揾左一包CHICKEN STOCK，好彩地呢款無太重配菜同香料味，個味啱啱好！

魚翅瓜切開，望真D就會見到D瓜纹。

切件蒸熟後用叉就可以刮D起左絲既瓜肉出黎，開始ASSEMBLE個羹！

雞湯加入適量開水煲熱就加入木耳絲，冬菇絲，红蘿蔔絲。滾返就落魚翅瓜絲。過多一陣就落埋猪肉絲。

又唔記得買馬蹄粉，我用左生粉打'獻'。

食後感：魚翅瓜口感一D都唔似魚翅架！但係好爽口似冬瓜，味清甜，加埋D有咬口既木耳，冬菇既清香，少少红蘿蔔整色整水。。。好好食，正到暈！我連盡两碗之後，唔洗食飯LU。。。

[就連艾先生都話好味！佢竟然以為我用刀切到D瓜咁幼细]

仲有瓜係雪櫃，聽日又試下另一個食譜！

收成正果！

今年叫做學人種魚翅瓜 ~ 其實D最麻煩既前期功夫都唔係我做既，一路又有朋友教路提點打理方法，我就聽住跟住做。

公公試左两次先成功發苗，差不多7月中先見棵苗開始發育/長葉。

外遊一星期，幸好有鄰居幫忙淋水，棵瓜真真正正長大，開始周圍爬！

到8月中先見到第一個帶住瓜仔既雌花，但因為當時未有雄花，瓜仔無法授粉，结果就長唔大啦！

8月尾又見到雌花，但瓜藤爬住棵危危扶既番茄樹，點算？

我竟然胆粗粗將D纏來纏去既藤/枝葉剪返開，放左個瓜仔落地。8月23日，撞正雌花同雄花都開左，我又見朋友話可以幫雌花授粉，我就攞隻牙擦係雄花花蕊點左D花粉擦落雌花花蕊度，呢個瓜仔(No. 1)就開始一日一日長大.

2星期後(9月5日), 瓜仔No. 1就已經大過我拳頭！

每日我去淋水，我就叫卡樂B同個瓜SAY HELLO. 呢個曳仔每次'Hihi melon'之後就一定順便'Hihi spider' ~ 好玩野！

一星期後(9月12日)，No. 1 已經大過卡樂B個頭！

终於9月19日，瓜瓜落地。。。有成8磅重呀！

呢两日，瓜仔No. 2都後勁凌勵，又係大個卡樂B個頭！

原來仲有隻No. 3黎緊。我無幫呢隻做授粉，可能有蜜蜂幫左個大忙 ~ Thanks a lot!

今日去淋水竟然見到類似No. 4, 又有棵雄花開開地: 雖然係季尾，艾先生已经開始問我幾時可以收爐! 因無搭棚比棵瓜爬，所以棵瓜爬到霸左花園一部份地方，剪唔到草。艾先生好想趁涷之前剪最後一次草，于是不停催我。。。唔理啦，一於幫手授埋粉，種得幾多得幾多嘛！

番茄又點呢？大部份米芝蓮茄都终於開始轉红啦。。。

今年玩過，我又對種植多左興趣，雖然我只係打理3棵樹，一D都唔算多，不過都覺得呢樣興趣係少D耐性都做唔到。望住D植物一日一日大，最後又有機會親自品甞返，好有成就感呢！

種植的中期業績報告

CHERRY TOMATOES：幾日就儲埋一碗，通常會整黎做餸，簡簡單單用洋葱絲加小小香草，橄欖油撈均放入焗爐，同時焗埋主菜，懶懶地又有一餐好味晚飯

BEEF TOMATOES: 幾日前幫棵番茄樹修走D雜葉，希望個十幾個大過我拳頭既番茄可以吸收多D陽光，快D熟。。。

琴日COLLECT左第一個好醜樣既米芝蓮茄！應該會整番茄煮蛋

呢D仲有好耐先熟，不過隻隻都大過我隻手架！

魚翅瓜又點？生得好茂盛！爬得好高，又想走過隔籬！

加上棵瓜一路長葉，都會分薄晒D水份/養份，所以。。。今朝决定要幫棵瓜瘦身！

D枝係通心既，一剪落去有D會流返D水出黎，枝杆有好多细倒刺，好容易就會手指蔵刺！D藤真係好够軔力，好似包左膠既鐡缐一樣，唔怪得棵瓜可以爪得咁緊周圍爬啦！

有D枝葉係新出，有花仔/瓜仔，但生得太高/太多，而家都9月，呢D瓜仔都唔够時間長大，我都忍心剪掉左！

呢個瓜仔大過我拳頭少少，係暫時收成唯一希望