Monday 27 February 2012

整黎做乜?- 燒肉

成日都有blog友整燒肉,話易整,MAMI唔係唔鍾意食,但係整親就一定預左由整到食都要自己一手一脚包辦。。。

呢幾日又有BLOG友整左,近排唔想整叉燒,行過猪肉檔又咁啱有大大舊猪腩肉賣,叫猪肉佬比晒無骨個邊我,1kg多少少,盛惠4鎊半,就買舊返去玩下啦!

做法都唔算複雜:猪腩+薑+葱飛水後,用冷水洗乾浄,搽上绍興酒+已混好既醃料(幼鹽2茶匙,糖2茶匙,五香粉1/2茶匙),用鐡針係猪皮上刺孔,肉部份用錫纸包好,猪皮露出,放入雪櫃過夜。




 第二朝取出猪肉放暖,用厨房纸再吸乾水。猪皮面舖上粗鹽。入爐。。。




190度,1小時10分後,猪肉焗熟就可以撥走皮上面既鹽,MAMI就趁機再刺多D孔係皮上面。多孔既皮容易爆/會脆D。焗爐就撥去GRILL既功能,成盤燒肉放最近頂部既發熱線。GRILL10分鐘左右,就可以出爐!

GRILL既時候耐不耐就聽到個爐傳出黎既必必叭叭聲,MAMI好驚個爐會太熱,响埋煙霧感應器!所以好小心睇火,必叭得太嘈既話,MAMI就攞盤肉出黎抖抖。。。


















结果邊邊都係燒燶左D。出爐後放凉就可以斬件上碟。



一如所料:全家得我一個人食。但味道OK呀:D肉唔鹹,但有淡淡五香粉味。皮都算脆,但中間部份既就比較淋,可能猪肉中心仲有水份,影响左呢個制成品既食味。

MAMI食左幾件,够啦!剩返既點算?终於有燒肉整燜餸啦!!!

Tuesday 21 February 2012

跨年省親 - 大家齊齊食。。。

飲茶/食點心就當然唔少得啦!而家數返,MAMI原來去左7次飲茶,平均一星期一次,唔太過份吧。。。



 亞州美食:星/泰/韓/日/台都叫做食齊!






















好想食既烚下烚下邊爐,终於食到!就連芝士火鍋,雪糕朱古力火鍋都食埋!


























住家飯:今次真係食得唔少!



係呢度,要好多謝屋企人/朋友對MAMI同卡樂B既盛情款待,你地出錢出力,我地只付責食!試過幾次搶埋單失敗後,MAMI决定放棄,欠大家既,你地過黎探我地既時候我一定要還架!

有幾餐MAMI食得好回味,又需要D時間整理下先,請稍候。。。

Monday 20 February 2012

跨年省親 - 卡樂B的中文體驗

卡樂B既中文真係非常既有限公司,身處香港呢個華人社會又有乜體驗呢?

落左機,同卡樂B行緊去辦入境手續,卡樂B突然同MAMI講:'MAMI,I'M HALF CHINESE AND HALF SPANISH, BUT I DON'T SPEAK CHINESE!' MAMI當堂打個突,乜企都未企定你就知要NICAM轉台啦?

某日係公公婆婆屋企玩玩下,卡樂B無端端彈左呢句出黎‘HONG KONG IS A VERY CHINESE PLACE!'. 媽咪問點解咁講,佢話'BECAUSE EVERYBODY TALKS CHINESE!'

黎到中國人地方,卡樂B都當堂好積極學講中文/廣東話。

平日係屋企,MAMI有時都會講少少中文,餐前會講‘食飯’,‘大家食飯’,但卡樂B就會話‘DON'T SAY食飯,SAY DINNER TIME!’返到香港,呢個仔就自動自覺跟晒大隊講‘食飯’。每朝一起身,都會同公公婆婆講早晨,之後就係一輪嘴既英文,完全無語言隔膜呢回事。[而家返返黎,又變返DINNER TIME!]

成日聽到MAMI講‘唔該’,佢就問點解,之後MAMI好多時出街要問路,卡樂B就自動自覺同人講唔該,逗到個個都好開心!但最曳就係成日係餐廳自己舉手叫‘唔該’,等D侍應哥哥姐姐成日要走過黎!

一向鍾意睇標誌/符號/商標既卡樂B,望見路牌有個STOP+‘停’字,就話係CHINESE STOP SIGN. MAMI話比佢聽呢度係教堂‘天主堂’,佢話係CHINESE CHURCH。 唔少得既當然係點變都認得既CHINESE MCDONALD'S!

初初學講野既時候,卡樂B對於EMERGENCY EXIT呢個字/符號都特别有興趣。到左香港都唔例外!成日見到EXIT就話比媽咪聽係‘出口’,‘緊急出口’,但最令MAMI意外既係:扭蛋機上面寫住‘取出口’,都比佢認到‘出口’呢兩個字,笑死!

而家仲識講乜中文? 恭喜發財!,朱古力,唔食,唔飲,唔得,一個SNACK!

係香港留左呢幾個禮拜,MAMI好見到環境對小朋友學習語言既影响:平日係呢度得MAMI一個講中文,卡樂B學講既興趣不大。返到香港,周圍背景聲音都係中文,卡樂B好快就執到幾句中文字黎講,我地講乜,就算佢唔明,佢都可以跟住學講返出黎問係點解。如果有機會比我地留係度耐D,真係可以好快學多好多中文呀!

跨年省親 - 卡樂B食乜?(1)

腸粉/炸兩:必食既早餐!係呢度都會食,但卡樂B通常都係食炸兩,但去到香港就連腸粉都鍾意埋!有時MAMI問想食D乜做早餐,卡樂B會要求食PASTRY ROLLS,仲話要去'SQUASHY PLACE'[屋企附近個間好逼既粥舖]兼清晒一碟架!朝早10零度凍冰冰,呀仔肯食D熱野食落肚,MAMI都無咁擔心唔够暖呀!



















小籠包:某次去食北京菜見到就話要食,食左一啖就好誇張咁講左聲‘I LIKE IT!’之後就一連食左幾隻,MAMI不知幾開心個仔终於識得欣賞下D特色小食,以後每逢見到菜牌有就必點!有日仲特登去鼎泰豊食左一餐添!



呢一餐,卡樂B個人包辦左一籠6隻!最後要點多一籠MAMI同姨姨先有得食!但MAMI知道:返到黎呢邊,佢係唔會食呢邊個D厚皮版架啦!卡樂B想再食,恐怕都要等下次返香港先啦。。。

日式串燒:係呢度都會買D呃鬼佬既日式燒雞串做餸,去到香港梗係要揾D正宗D既食下啦!午餐SET包一份蕃茄沙律,麵豉湯,小碗烏冬,大碗白飯,2串主菜+1串冬菇,仲有飯後果!份量唔少架。點左一份餐再散叫幾樣就够我地兩母子食啦!卡樂B食左蕃茄,烏冬,幾啖飯,MAMI以為佢剩係會食平日食開既雞肉,但佢食得最多既,竟然係露荀猪肉同鰻魚(同MAMI争食呢)!!! 其實只要卡樂B想食(同埋係有益/正經既食物),MAMI當然唔介意比埋自己份佢啦!



















食飽之後卡樂B同MAMI講‘I WILL MISS THIS PLACE WHEN I GO BACK TO ENGLAND...’ 唉。。。

埋單既時候發生左一個小插曲:MAMI實在太心急去食呢餐,一落左車就連錢都唔㩒就入去坐低,埋單時發現銀行竟然BLOCKED左張卡/碌唔到!好彩個侍應比MAMI帶埋卡樂B出去㩒機返黎找數, PHEW...

又係時候要執相先有得再寫,卡樂B仲食左D乜,待續。。。

Saturday 18 February 2012

窮人露荀

返左黎兩個星期,仲JET-LAG緊,攪到每晚7點零鐘就要訓覺,天氣又好鬼凍,真係連開水喉洗菜/洗米都頂唔住。所以晚飯係要簡單/快最緊要!

窮人露荀,正確名稱係SAMPHIRE,成日睇電視D厨師煮海鮮都會推介呢一隻係海邊沼澤生長既藻類植物,話易整,好食,又平(住近海邊既可以係退潮時候自己去採添呀!)係超市見到,一盒都係鎊零銀,一試無妨啦!

點整?開盒,用水冲下。滾水落,2/3分鐘捞起,淋上熱溶牛油就得!

MAMI用黎配檸汁牛油帶子,又係READY-PACK,開左盒慢火煎熟就得!




食後感:窮人露荀味道算係可以,但無想象中咁好食。口感似是咬膠條咁!所以試過就算!其實而家露荀都好平/好平民啦!下次都係食平民露荀好D。

咁卡樂B又食乜呢?係香港發現原來煎魚柳都易整又好食BOR。所以MAMI就整左一份比卡樂B,好過成日食魚手指呀!

卡樂B近來好鍾意飯糰,每晚都要自己做大小飯糰各一比自己。加上幾片紫菜。唔覺唔覺就成碗大人份量既飯落晒肚!



PAPI開夜,唔洗理佢,兩母子咁又攪掂一餐,食飽飽,訓覺覺。。。

Friday 17 February 2012

跨年省親 - MAMI獨食的。。。

其實大部份都有OFFER比卡樂B試食架,但呢個小朋友既口味同MAMI既始终有唔同啦。所以以下既就變成MAMI獨食既。。。

魚肉燒賣:買返黎蒸熱做早餐。卡樂B叫燒賣做YELLOW DUMPLINGS,但MAMI叫左好多次,卡樂B都唔肯試一啖。。。

飯前小食:低糖益力多(都仲係好有甜味架)+ 猪肉乾。家人/朋友都怕比海關捉到,好耐無SEND 過黎我食啦!

蒸鯪魚:最緊要加埋副魚腸!而家魚檔劏魚都唔留低,要食就要講定留起先有。所以每次蒸呢樣野。。。MAMI都唔理三七二十一,食晒先算!

紅腸:煎好淋上甜豉油,CHEAP又唔健康既加工食品,BUT I LIKE IT!

金寳字母湯:自己整唔到個種味道同口感架!

荳腐花:淋上黄糖,薑味糖水。。。正! 卡樂B對荳品一向都係麻麻地,迫唔黎。。。

雪米糍:不論係雲呢拿定香芋,MAMI都鍾意食。卡樂B食一口就話YUCK,MAMI話雪糕係入面BOR,又食多啖! 如是者食左幾啖,但最後既結論都係:“I DON'T LIKE IT。。。”。

溏心皮蛋酸薑:自己整唔到,返黎食返够本!

咁卡樂B又係HK揾到D乜野好食既呢?請繼續收睇!