入學的準備 - MAMI上學去！

參加家長會既時候見到有免費課程既單張wor。。。


原來係教家長點樣教小朋友寫作/數學。自己知自己事：MAMI既思想/文化背景/教育方法同本地人唔同。如果唔UPDATE下自己，第日要教可能會好辛苦。。。趁有機會就報個名去見識一下啦！

教/指導小朋友寫作：


課堂中，導師同大家介紹左不同既方法啟發小朋友寫作/創作。又要大家做埋一份，體驗一下創作既過程。同學中有覺得自己寫乜都係RUBBISH既，另一位一見要寫D野就話無可能寫得出！够鐘要交功課。聽完同學既作品，導師都指出左寫得好既地方。導師仲話大家係成年人，做事有一定自信，但要落筆寫作都感到吃力/覺得自己唔掂，何况係一個小朋友？

呢度既出發點係鼓勵小朋友多想象/創作，有靈感最緊要。唔識寫個字唔係問題。用拼音串個類似既字就得啦！就以導師傳閲既5，6嵗小朋友作品為例：MONKEYS寫成MUNKEES ， RESEPSHON。。。原來想寫RECEPTION！導師無指出串錯左既字，但會嘉獎文章中有觀察力/想象力既地方。一篇文有10個8個錯處，指出最重要既3-4個就够。我地作為家長幫小朋友CHECK功課，見到有錯字都不用太著緊要為初入學/初開始學習寫作既小朋友改正。一大堆負面批評會可能會令小朋友只求無錯，難既就算想象到都唔寫出黎，影响創造力/表達真正想講既意欲。。。MAMI聽左都好同意呀! 希望既就係第日可以記住/用住呢個方法啟發卡樂B既寫作啦！

數學又點呢？MAMI好多時都聽到一D媽咪朋友話英國呢度教計數既方法同香港既唔同。而學校又好著重校學/屋企兩方面都用同一方法教小朋友數學。就連點樣講一個數學問題都有畫一共用既字眼。MAMI有時講野都係詞不達意，有乜唔識講跟住呢本書既講法就容易得多！


導師解釋話某些運算方法如PARTITON，大多數成年人一望都覺得做法係簡單複雜化，原因係成年人大到咁上下就會自行融滙貫通小時學過既方法去做運算。所以唔覺唔覺用左都唔知！但如果大人解説唔清楚，小朋友未必可以掌握到正確既基本概念。再學上去就會見到分别所在。。。[MAMI就諗：咁即係。。。點解一D人考會考攞A，有D就點DRILL都係得個‘光頭D級可能都係因為咁啦！。。。]所以MAMI上課時都好小心咁跟住老師示範既方法做練習，希望可以明返下D基本概念，第日可以傳授返比卡樂B啦！


數學既原理/概念比寫作具體得多，好多時可以利用實物做輔助解説。所以導師介紹既方法都有好多不同類型既道具可以準備！課程仲免費提供材料。MAMI落堂攞住呢D野返上車，卡樂B都好興奮，猛問MAMI要做乜功課，自己又要幫手一齊做！看來引起學習興趣呢一步係成功左既


上呢幾堂除左學會左一D教導既技巧之外，由於導師同其他同班媽咪都有已經入學既子女，大家仲會講下子女在學既情况，MAMI聽完從中學會左要調節自己心態/期望，等自己同卡樂B都唔好有太多無謂既壓力。最後。。。好巧合地，班中有兩位媽咪既仔女原來會同卡樂B做同學呀。MAMI而家都有两個家長叫做識得，日後係學校有野唔清楚都容易揾人問問啦！

短短一個課程，MAMI都真係穫益良多呢!

唱游班

卡樂B同呢度既好多小朋友一樣，3嵗開始返唱遊班/PLAYGROUP，呢度既教育制度覺得小朋友呢個年紀係要從遊戲中學習。所以卡樂B每日返學都係玩玩玩。。。

前幾個星期，MAMI就去PLAYGROUP幫手做左一堂PARENT HELPER，話就話HELPER，最想既當然係去下睇呀仔返學其實係做乜啦。。。

卡樂B知道MAMI會留低陪佢，心情都特别興奮，一返到去就拉住MAMI週圍睇野。


埋到ART/CRAFT TABLE就坐低做剪貼。有MAMI係度督工，今日都算好有心機完成左一篇拼貼。

天氣好，大部份小朋友都出晒户外跑動。卡樂B都一樣，仲忙住SHOW比MAMI睇自己鍾意既活動。

玩到攰就到小食時段，大個仔啦！樣樣都自己黎！


小朋友玩緊既時候老師又會分批指導小朋友做手工。今次每人要準備一枝英國國旗佈置英女皇登基60週年PARTY。今朝先自己做左拼貼，而家又做！好彩都完成埋。。。

3個小時既唱遊時間過得好快，臨近放學老師就叫小朋友們幫手TIDY UP。卡樂B始终都係大仔，所以都好落力幫手。做完晒仲識得問老師要個貼纸獎勵下自己！

最後，大家就坐定定STORY/SINGING TIME。卡樂B坐係度週不時都會有D分心週圍望，但老師問故事書既問題佢又答得出wor！（唔通佢真係可以MULTI-TASKING？）唱歌個陣就唱D唔唱D啦！（但係屋企呢個仔係非常好唱口架！）

卡樂B平日都會係屋企同佢D公仔朋友玩‘PRESCHOOL’，MAMI今次做HELPER就發現佢玩既時候用既對話/活動情况原來同PLAYGROUP老師做既一模一樣（就連講出黎既語氣都一樣！）MAMI見到真係笑左出黎！


MAMI做左呢次HELPER，最開心既係見到老師同小朋友們關係/溝通好好。難怪卡樂B初初知道要去BIG SCHOOL（入小學）個陣就話唔想去BIG SCHOOL同埋會掛住PRESCHOOL啦！

入學的準備

今年既大PROJECT除左係跨年返港探親之外，就係準備卡樂B踏入人生既新一頁：9月正式入學！

呢度既制度都係跟住址/校網派位。舊年11月就交表申請學校。今年4月尾公報派位結果。跟住就收到學校既信，開始一連串既入學準備。。。

5月尾MAMI參加左第一次家長會。主要係介紹學校一般情况，見下校長/老師/助教係乜樣。參觀一下呀仔既課室。而當晚最緊要既：就係派一個FILE比家長。FILE除左有各樣入學/教學/行政資料之外，仲有一大疊表格/同意書要填好交回：

1。 凑放學人士名單： MAMI都覺得係需要既，唔係3唔識7走個人入黎帶左個細路走點算？

2。 家長通報：以前係放學派通告，夾係手册帶返屋企比家長睇，睇完簽回條帶返學校做回覆。用呢個辦法，次次都一定有小朋友唔見左張通告，家長唔記得簽。。。而家一切都電子化啦！填張表話比學校聽家長既電郵地址/手提電話號碼，學校有乜要家長知，一個text就攪掂。就連壞暖氣/落雪學校唔開，學校都可以一大清早發個text就通知晒全校家長/學生！好方便！

3。 同意子女到運動塲參與體育課/運動會/在區内散步/去圖書館：當然有老師/助教帶隊，但因為要踏出校門，所以要有家長同意。
4。 同意子女參與同食物有關既課題活動：參與時有可能會接觸食材。制作食品+試食。所以如果有食物敏感一定要填報埋！
5。 使用互聯網约章：條款都頗多，未識拿筆寫字既小朋友都要簽名同意接受。。。唔係就無得係學校使用電腦！
6。 同意學校使用子女照片。學校會係活動時候影相。相/VIDEO有機會係學校網頁/刊物刊出。又如果有表演晚會，家長都會希望影D相/VIDEO留念。如果家長唔同意子女既照片/錄影被選用，子女就可能唔可以出席某D活動，或者影相/錄影時要企埋一邊。或者活動時禁止所有人攝錄。好麻煩呢！但要保護兒童/個人私檃，家長係要有得揀既！）
7。 如果無記錯。。。第一輪填好交左番學校既表格包括左急救同意書，要寫低子女有無要注意既病况，對食物/药物有任何敏感，可以用乜藥。如有需要，要同意比救護人員幫小朋友貼上藥水膠布。。。

幾十年無讀書，社會發展/時代變遷，原來而家讀書攪入學有咁多手續/文書要攪既！好彩仲有時間慢慢填，但張張表都要填名/簽名，真係寫到好煩悶，好想有幾個橡皮圖章，印幾印就攪掂晒。。。

文件工作做好，接住黎既就係同卡樂B去參觀新學校，開學前既老師家訪，買校服（但就唔洗買書！），仲要趁暑假加緊訓練卡樂B熟習一D自理技巧。呢幾個月就算唔追歐洲國家杯/温布頓/奥運，我地都唔荒無野做！

包。剪。揼

今晚食完飯，卡樂B無端端問MAMI ‘Shall we play some 包剪揼?' MAMI一時間都唔知佢講乜。問多次先聽到好似係講包剪揼，一問，原來真係！

MAMI都差D唔記得卡樂B係香港學識左猜包剪揼，咁有興緻，MAMI梗奉陪啦！

初初幾次都係熱下身，提醒番D規則。

正式開始，卡樂B就負責講包剪揼，頭頭幾局都係卡樂B赢，仲次次都係佢出包，MAMI出揼。一次MAMI出揼赢左佢個剪，佢即刻收埋個剪，仲眼都紅晒叫MAMI ’Don't smash the scissors'。MAMI話左唔會，佢先開心返，繼續玩。

見咁好玩，MAMI就話VIDEO比PAPI睇，卡樂B話好，CAMERA！

哎吔。。。

一ROLL機，卡樂B就開始輸，仲一連幾局都係輸比MAMI出既揼。一輸，佢就面色都變晒收埋隻手唔比MAMI揼，MAMI點會揼佢呀？

其實一路玩，輸比包同剪卡樂B都OK認輸架，但就係唔知點解咁驚輸揼，於是。。。佢指定MAMI要出包，MAMI初初都唔想啦！點知都係繼續輸，為左卡樂B唔會帶住唔開心既記憶去覺覺猪：無法啦。。。

赢返兩局先開心番DD，跟住MAMI要顧住錄影，又要出拳，結果又出錯左！卡樂B跟住直頭話MAMI要出‘ZERO HAMMER’！

到上床訓覺，卡樂B又攞隻手出黎做番剪既手勢，解釋比MAMI聽呢把較剪好特别，所以係唔可以被揼爛。。。

呢個小朋友腦裡面實在太多奇怪既想法。。。唔同佢玩開，真係會比佢攪到暈陀陀架！