工欲善其事，必先利其器

馬拉糕 RE-MAKE

第一次整馬拉糕,真係一敗塗地...詳程見...

之後都整左幾次:有進步,但係每次都有少少意外...
 
今日又整過,因為...前幾日無端端買左個蒸爐,要剪綵...

其實一個窩都應該夠用,不過就梗係無得咁買啦.個窩都頗單薄,唔通咁樣蒸野快熱D,好D?

ANYWAY,今次試左另一個食譜,唔洗用奶,但就要用3隻蛋咁多.屋企無低粉,又無自發粉唯有用普通麵粉加BAKING POWDER.搬左屋咁耐今日臨開工先發現唔知個電動打蛋器擺左係邊度,唯有用手打!
 
又係幾個小意外,都唔知整唔整得成功...出爐啦...

講真...我幾滿意呢盤糕:因為無用機打,都算發得起,D窿窿都算平均,無話D糖同粉沉底.我見一D食譜提過蒸既時候要用大火,同埋今次用左呢個蒸爐,可以放多D熱水係底都好似有助發起底糕...           

 
卡樂B就次次都要食先...

 
攪好善後工作又要服侍小食...又食!

好唔容易先收得埋碟糕...唔係下午朋友黎到就無得食啦!朋友黎到,身為陪客既卡樂B又打正招牌繼續食,食食下仲話左聲'NICE'添[第一次自動自覺開口講架]...LUM到MAMI想唔比佢再食都唔得...

人日...祝人人豐衣足食

昨日係人日,爸爸每年都會煲粥,佢好似提過人日食粥,有豐衣足食既意頭.我就覺得新年時候日日都大魚大肉,油器糕點不絕...食返一日粥都有助清腸胃啦!

初七我去左SHOPPING,夜晚又約左朋友食飯,所以係今日(初八)先煲粥補返數.爸爸會煲生菜魚球肉丸粥加炒粉麵,我照辦煮碗會分分鐘要我一個食返晒,食到反肚(大吉利是!).

呢個係我既簡化版本 ~ 生菜肉丸粥加蘿蔔糕山

之前一晚浸定果皮,元貝,蠔士,米就洗乾淨用少少油鹽醃好放雪櫃.肉丸就係整煎釀三寶既剩餘物資,所以功夫唔算多.

冷水落果皮,元貝,蠔士,水滾落埋米返滾就轉中慢火煲到D米'綿'就可以落肉丸.肉丸熟左就加生菜(生財!)就食得![我唔多喜歡ICEBERG LETTUCE,所以用GEM LECTTUCE,都好好食,而且無ICEBERG LETTUCE咁大隻(食唔晒要扔)]

呢碟蘿蔔糕其實係今年整既第二底,大致上係跟呢個加入左澄麵既食譜制作.因為我都仲係攪唔清楚點計落幾多水,唯有靠撞,好彩又撞得好好食.

當日出爐時既賣相:         

卡樂B頭圍用膳已經食左D粥,仲食埋飯後果,我開緊餐個陣佢竟然抬張椅過黎坐定定然後指手劃腳要食野.我求祇比啖糕佢食下,佢竟然食WOR.上次比佢,食左一啖就走開啦~唔通今次真係好好好好食? 最後佢同我一齊瓜分左個蘿蔔糕山~早知煎多D啦!

人SHOPPING，我SHOPPING

今年聖誕,新年假期一來忙得要死,二來凍得要死,聖誕大減價減到無可再減我都未去行過...終於係過去左個週末比DA DA引到我非走一趟不可!

星期五唔洗返工,不過同柴可夫夾唔到時間,無得去! 星期六天氣好唔好之間,卡樂B又鼻塞塞,去唔去之間揀左去,柴可夫就留係車度陪卡樂B，我就有一個鐘頭時間"搏殺",預定目標都係ZARA．

一來是對西班牙的情意結,二來是我喜歡的風格（啱唔啱著別論...）,拾幾年前黎歐洲旅行邊度見到有ZARA我都一定入去行下,拾幾年黎我既身型不論係暴漲定無端消瘦...我永遠都係夾係兩個碼中間...

而家想買ZARA都唔洗特登等返鄉下(但我仍然次次返鄉下都會去3幾次,因為落親街都會經過): 以前真係係西班牙買抵好多,呢幾年英鎊疲弱,變相比歐羅同英鎊都分別無大啦,加上我地個城先兩年開左分店,我耐不耐都會入去打個ROUND.

今次入到去我地城呢間,D減價貨(其實淨返幾架)9成以上都係大碼,加大碼,好多都比人摸到起晒毛粒,雖然係一減再減再減,真係揀唔落手...無法啦,鬼叫自己咁遲先出擊咩！

而家有隻卡樂B,去親睇衫都會順腳行埋童裝部...我既一個鐘頭"搏殺"時間同埋金錢就係咁奉獻左比佢啦

都係兩大袋,拿住都好有滿足感    

唔係D乜野超型服飾,只不過係D BASIC ITEMS(部分仲係國貨)

1件太空褸,3件POLO TOPS,2件恤衫,盛惠25鎊~可能ASDA既佐記都唔得!

送舊迎新換飯煲

話說整左煎釀三寶[三缺二版]就梗係煲一煲飯啦...又見新年流流就攞返Ｄ正正經經嘅中式飯碗出黎裝飯,點知踎左係度掛住攞飯碗,完全無唯意我著左火返熱Ｄ釀青椒...直到聞到燶味,先發覺飯煲電線比爐頭"HI"著左...

即時好驚大叫艾先生,跟住見到飯煲電制係'ON',諗都無諗就熄左佢,然後就諗用乜野可以撲熄個火頭呢?都未諗好,我就鼓氣泡腮吹吹吹,好彩...吹得熄個火頭,唔係就真係唔敢想像火種熄滅後艾先生先到達廚房...無事LU

入廚咁耐第一次咁唔小心,一定要無下次,TOUCH WOOD!

肇事飯煲買左5年左右,用左唔夠兩年...雖然細細地不過夠晒煮兩大一小份量.舊年比卡樂B拷跛左隻腳,艾先生整返好之後就繼續服役到而家.

媽咪知道卡樂B拷跛飯煲腳後即刻寄左個大頗多嘅新飯煲比我,艾先生一收到就好想叫我剪彩用新煲,所以當佢發現舊飯煲電線燒爛左就非常自動自覺攞左個新煲出黎...

電線插口唔同左,想換條線落舊煲用都唔得,而且個煲有咁耐歷史,都應該好難配得返條電線囉.

剪彩測試中...原來滾得咁如火如茶,我仲以為落得多水得濟添

試埋蒸盤,都OK BOR...

最後測試意見: 都係一個煮到飯嘅飯煲,暫時唯一投訴係:每次要煲多D米先夠食,因為煲大左,要預多D飯會黐底...浸飯煲果陣就鬼咁多飯焦要扔,好浪費...

煎釀三寶[三缺二版]

掃街就梗係掃齊三寶啦!自家制我就比較懶,一寶就算數!而且一定係青紅椒,隨時想食去一般鬼佬超市都可以執齊料開工!

今次新正頭加上我都有成2年無整黎食過,我今次好"豪"呀!加左TIGER PRAWNS整盤釀料.D蝦買返黎洗乾淨,放係砧板上用菜刀大力啪扁,好容易就可以攞條蝦腸出黎,順便發洩一下...調劑心情

豬肉同蝦比例差不多係1:1,攪成呢盤釀料

太耐無整,D椒切得唔係好啱形狀,希望唔好有太多甩殼啦!

加上現成BLACK BEAN SAUCE(味濃,勁咸~要加好多水溝淡),煮到D椒夠'淋'就可以起菜.

艾先生鍾意食呢個餸架,每次整佢都投訴我煲唔夠白飯...

唔好海產類嘅佢當然食得出有魚腥味,但係落左蝦其實好食好多,唔似淨豬肉咁"鞋",所以佢今次都收貨[我當然又要隱暪下D真材實料啦...]

又因為今次整左呢個餸,我的飯煲報銷左點解? 下回分解...

到此一遊：曼城

機緣巧合之下...我地安排左一次曼城兩天遊,順道提早慶祝多年難逢嘅"一日兩節"農曆大年初一/情人節 [從朋友得知下次再有呢兩個節慶係同一日應該係2048年]

我係原始人...無SAT-NAV,所以每次遠行都會上網印個路線圖出黎跟住行,我做NAVIGATOR. 而根據經驗,艾先生每次都會係咁意望下個路線圖,然後就跟返自己心目中嘅路線行,所以臨開車前我又問多艾先生一次行邊條路,今次竟然話路線圖點講就點行!由於RESEARCH STAGE嘅疏忽...

各位乘客,臨時加遊PEAK DISTRICT...

兩個多鐘車程都係望住一塊唔斷嘅塊駁布圖案同埋數不清咁多嘅羊咩咩...[卡樂B見到呢張相都仲係度不停叫咩咩咩]

[其實風景好靓架...又令我諗返起學生哥年代去LAKE DISTRICT嘅TRIP...只不過今次揀錯左時間經過呢到...]

有D路段都頗危險,又上又落,拐灣又拐灣...我諗如果回程夜,黑濛濛,點算好???

下午兩點幾出發, 4個鐘之後,終於入到曼城,揾到酒店.當晚約好去一個識左10年但又10年都無見過面嘅朋友屋企食飯,於是"拿拿臨梳洗一下就準備出去...點知艾先生發現個抽水馬桶抽唔到水~又要去RECEPTION報告等人上黎睇睇,修理人睇完話無得整,要換零件,當晚梗係無得換啦!我地又趕住出門口,唯有去探完朋友返去再算.

終於見到朋友啦!仲有一檯豐富好味晚餐等我地去"嚓".我又想食多D,又想傾多D.好應接不暇呀!全屋都停晒手,我仲黐係張檯到繼續,最後仲打埋包添...好多謝朋友熱情款待,我地忙到連相都唔記得影添...希望不久將來有機會再見面.

返到酒店就要'暗'卡樂B瞓覺,佢攰架,不過酒店係新環境又攪到佢心野野要玩唔肯瞓...好彩最後都一覺瞓到大天光!

艾先生到RECEPTION投訴抽水馬桶換來兩個免費BUFFET BREAKFAST,但無甚可觀...唔緊要,因為我又安排左去飲茶同見另外一個朋友.

趁住去同朋友會合途中望下曼城市面情況先...

飲完茶,兩點幾鐘就要準備回程啦...大城市始終係大城市,市中心周圍都人頭湧湧,很有人氣.

今次行程緊密,真係連影相都唔多,不過行行下都見到D得意野既,例如一D外墻裝飾,一D我平日工作見到既地方名,回程路上,又見到一支好高既煙囪,前排兩邊有一排長長既矮樓,即刻令我聯想起 L. S. LOWRY既作品COMING FROM THE MILL,感覺好得意..

曼城呢度都有唔少地方玩,有機會一定要再上黎玩耐Ｄ!