Thursday 24 February 2011

日式炸雞塊

又整日式甚麽甚麽,梗係MASA既食譜啦!對!

其實都整左幾次啦!無法子,卡樂B鍾意香口野。。。

食譜書既份量同網上食譜有少少唔同,我跟書做都覺得好够味:

雞脾肉2塊切成適用大小。

調味:豉油/味醂/清酒各2湯匙加少少薑蓉。

攪均就可以落雞肉,醃10分鐘左右就炸得。

 


先撲上麵粉,然後蘸蛋液,最後貼上麵包糠。(我最唔鍾意呢SET步驟,D厨師示範時就乾浄利落,我就次次都攪到好LEI HEA。

 


落鑊炸第一塊又炸得過左火,通常第2/3塊就會掌握到火勢,到臨尾個幾塊又因為鑊油燒得耐,炸出黎又黑D!

 


一路炸就一路好似傻婆咁不停口講野,因為要引住卡樂B唔比訓,不過失敗左。。。

 


炸好放係厨房纸度吸下油,切好就可以開飯。

 


卡樂B當然係會分派到最靚仔個兩件啦!蘸D茄汁,咁就食晒D雞+半碗飯。所以MAMI無投訴囉。

 


食後感
1)落左味醂,D東瀛風味出晒黎!
2)用雞脾肉,好滑!正!
3)真係要落鑊用油炸先似日式。

有乜要改善?我想。。。如果可以蘸日式沙律酱會仲好食囉

Monday 21 February 2011

PAPARAZZI, MAMARAZZI。。。

MAMI有時(其實係成日)都非常無聊。。。

部DC永遠都係身邊,真係易過電話响要揾黎答!

今早同卡樂B著好衫等出門口,點解唔見左個仔既

咪埋攪乜鬼呀

 


等我攞部DC裝下你做緊乜先!

OOPS!第一SHOT失敗。但當事人完全唔知咩事。。。

 


TAKE TWO:當事人見到比人偷影,有少少愕然

 


不過好快就兩母子都笑到傻左。。。

睇左相,MAMI諗緊擺唔擺上BLOG到留個回憶呢?PAPARAZZI呢個字係腦海中閃過,於是MAMI就順晒口咁係度唸PAPARAZZI,MAMARAZZI。。。

CARLITOS-RAZZI!  ~ 講個個唔係MAMI,係佢個仔

都係MAMI唔好。。。呢D咁無厘頭既野,唔該唔好有下次啦,呀仔

Saturday 19 February 2011

1號餐呀,唔該!

MAMI耐唔耐就會恨食壽司/魚生,會幻想揾日逃工,唔話比艾先生知玩失踪去食餐勁既。。。

今日艾先生問帶唔帶卡樂B出街行下,我要出城揾少少野,時間關係要係城解决埋午飯。比左3個選擇艾先生揀:1)日本野;2)中國野;3)焗薯。艾先生一輪商討之後揀左1)日本野。。。哈
哈哈,仲唔中正我下懷

出到城攪掂少少野就向住標的食肆進發,我當然唔會帶佢經過D危險地帶~玩具店,又好好彩經過佢既致愛麥當當既時候佢都剩係叫左聲‘麥當當呀!’就繼續行,唔係既話。。。我既1號餐會就咁無左都不足為奇

卡樂B唔急食野,一路行就一路周圍睇野,說話多多:呢間舖頭落左閘,個間賣D車唔靚!去到食野會幫MAMI ORDER 'RICE WITH SAUCE', 自己就會食‘YAKITORI NO YUCKY’。。。行快D啦呀仔,MAMI餓到就黎食人啦!

终於到左YO!SUSHI ,上一次食已經係1年半前,同艾先生/卡樂B一齊食,可惜卡樂B個陣仲细,真係連碗飯佢都唔LIKE。[艾先生就一向都唔食壽司,所以先造成我有逃工去獨食呢個念頭。]

咁耐無食迴轉壽司,都真係唔多記得點食法。無人黎招呼茶水既? 點叫野食呢?直頭當眼前個條輸送帶好似道具/佈景板一樣。。。坐左一陣,攪掂左卡樂B既ORDER先有時間望下條輸送帶。

最後。。。都係叫左個人埋黎望住餐牌點我想食既就算,唔洗金睛火眼望到實條帶送緊乜野黎!

派比小朋友既食具:筷子唔識用,匙羹係雪條棍質地,擺入口一舔就好‘鞋’[有D令人作嘔既感覺,好彩卡樂B最後都克服左!]


開動啦!


食食下,店長埋黎逗卡樂B玩,比左纸同一排顔色筆叫卡樂B做D圖鴉,做好有獎品 ~係叮當大福餅一份,飯都未食完就進攻甜品。。。


今次戰績好一般。原來卡樂B都有野啱食,第日可以再黎食過,唔洗一次食埋成年既QUOTA。


食飽飽,仲有得玩收銀!識做呀:比個DISCOUNT呀媽。。。PLEASE

Monday 14 February 2011

一不做,二不休 ~ 芋頭糕+芋頭蒸雞

小記:話説今日係2月14日情人節,艾先生整左火腿煎蛋比我做早餐。之後佢問我知唔知點解整呢個早餐,我話“D 蛋就過期呀?”皆因我一早個腦就已經不停係度部署點樣整芋頭糕,真係唔記得今日有乜特别,再者:平日佢無端端整蛋比我做早餐通常都係我講呢個原因!

ANYWAY,講返今日既芋頭糕。。。

印象中:细個過年,呀媽係主攻油角/蘿蔔糕/荳沙角呢3項。芋頭糕:好似我都頗大個先見到呀媽有整,所以我一向都係鍾意食蘿蔔糕多D!

今年話想唔蒸糕,结果梗係唔成功啦!而且蒸開一定要糕!高!GO!蒸多一兩盤先有意頭嘛!

唔記得點解想整芋頭糕囉!某日去唐人超市講開芋頭,老板就教我話急凍芋頭唔怕買,生芋頭來貨貴,自己切又手痕,急凍過既芋頭仲淋D添呀!我以為老板都係想HARD SELL先咁講,見DA DA蒸咁多芋頭糕,又問問佢用乜芋頭,原來DA DA都係用急凍芋頭,OKAY架,於是我又買定一包,不日動工!



話就話不日,都擺低左成2個禮拜先整得!做法係參考DA DA推介既通少五香芋頭糕食譜。

琴日就攞左D急凍芋頭上雪櫃溶雪,切個陣覺得D芋頭好RUBBERY,好驚D芋頭唔靚整唔成

我落少左江瑶柱(曬晒冷都係得5粒!),但就加多左臘腸(我D臘腸唔蒸糕就無用,一於盡地一煲!)食譜都話份量係參考,可以隨個人喜好增减,又真係BOR,整出黎一樣好好食。。。



出左爐擺埋一邊攤凍,呢位仁兄就係度手篤篤。。。



見呀仁兄有興趣,我就快快手煎幾舊脆卜卜既比佢試下啦!



點知肯食一啖又唔肯食一啖,都唔知佢係唔鍾意D芋頭,OR邊樣配料,OR D糕,OR跟本唔鍾意芋頭糕!下次再整佢食唔食?無從稽考!總之攞我黎攪就係啦!

整完芋頭糕,剩返幾塊芋頭,溶晒雪都唔擺得架啦,一定要揾D野整用埋佢。琴日醃好雞髀肉想整金針雲耳蒸雞。上網揾揾有無人整芋頭蒸雞先。。。有BOR!

參考左幾個食譜,趁有蒸籠用緊,就快快手整埋聽日既飯盒。

雞肉蒸得耐會‘鞋’,但芋頭就要耐小小先淋,所以都係煮下D芋頭先蒸好D。

開鑊爆一爆D芋粒,芋粒有微金黄色就加入適量水/雞粉轉中慢火煮到差不多乾水就收火。待凉備用。

芋頭粒凉左就可以加埋入調好味既雞肉度一齊蒸。

蒸熟收火,淋上甜豉油,灑葱段焗多一陣就食得!



以我想象。。。呢個餸攞黎做煲仔飯都應該唔錯架!

Thursday 10 February 2011

開心的约會 ~ 牙醫

今日係全家見牙醫既日子。講明全家,卡樂B當然都有份

其實呢個小朋友都唔係第一次見牙醫啦!早係1年前我地都同佢去過,第一次去佢好驚,牙醫比晒D架罉佢玩都唔肯坐低,牙醫剩係可以等PAPI抱住佢/擘開口個陣幫佢數下有幾多隻牙仔就算。

第二次:佢瞓左覺,無得睇,唯有下次约過!

第三次:幾個月前,佢係屋企唔小心撞到個嘴,仲流左小小牙血,PAPI擔心撞鬆左D牙要脱,所以都约去牙醫度檢查一下。去之前,卡樂B係NURSERY玩緊,PAPI打電話通知NURSERY卡樂B要早退去見牙醫,咁NURSERY D姐姐就同卡樂B講要見牙醫,仲成班小朋友同卡樂B一齊練習擘口!卡樂B去到牙醫度就駕輕就熟,乖乖擘大口比牙醫檢查!

今次係第4次去。基本上,卡樂B係熟晒地頭,一去到登記完就走去等候室玩LEGO,牙醫經過叫我地入去佢就跟住跑入去。

我地都未决定好邊個睇先,佢就已經自己爬上張椅!



牙醫仲PAN低左張椅少少佢都唔驚。準備好啦。。。放馬過黎!



就係咁,牙醫叫開口就開口,埋口就埋口。。。



唔洗2分鐘就完成檢查,獎貼纸一張



之後輪到PAPI檢查,牙醫要放平+升高張椅,卡樂B望住就有D驚啦!我問佢要唔要試下,佢即刻擰晒頭,但我都趁機會解釋比佢聽牙醫做緊乜,點解要放D一枝枝既野入個口度,等佢明白檢查牙齒既唔同方法,第日牙醫都會咁同佢做。

返到屋企,卡樂B心情都仲好靚,仲好巴閉咁同我地講 “I LOVE THE DENTIST SO MUCH THAT I OPENED MY MOUTH AND LET THE DENTIST SEE MY TEETH...”