卡樂B的花生騷

聖誕節過去左[好耐啦...] 卡樂B收到唔少屋企人送嘅新衫做禮物,個個都叫我快D比D衫佢著,其實最緊要係影相比佢地睇囉...

所以我就攪左呢個花生騷比大家欣賞下卡樂B嘅COLECTION...

• 同料過膊褲帶短褲 + 襪褲係好多西班牙小男孩大時大節/出值重要場合一款既傳統又SMART嘅打扮.

[不過圖中呢位小模特兒望左自己套衫一眼就喊晒口要求換衫,真係唔專業...]

• 鄉下民族服: 鄉下全年天氣都比較和暖,小企領襯衫+麻質西褲~輕便有型,清晨/黃昏套一件小背心就唔怕凍親啦!

• 英國學院風格: 呢個廣為人認識嘅菱型棋盤編織圖案源自蘇格蘭西部金寶族族人,海軍藍代表成熟穩重,大家有無覺得卡樂著左呢套衫都變得有D文質彬彬呢?

• 美國西部精神: 用粗冷編織成厚冷外衣一向都予人豪邁嘅西部感覺.呢件外套就更加運用左拉鍊領口,胸前嘅牛頭圖案同埋手肘嘅皮護肘呢幾個小DETAILS來強調呢個主題.

大家又覺得邊款最啱卡樂B嘅STYLE呢?

蛋撻仔

又開始一連4日長週末,全家都乘機同MR. CHOW CATCH-UP一下...

琴晚我就開始諗定今日一日嘅飲食安排,唔洗話臨時臨急要煮先發現Ｄ材料未準備好．．．

今朝艾先生臨出門口就問我今日整乜比卡樂Ｂ食,我就好快口答話整OMELETTE,一打開雪櫃．．．竟然得一隻蛋我仲好腦定話同卡樂Ｂ散步去村口間超市買就得,但係艾先生話今日好凍,落毛毛雨,我都係留係屋企比較好

得一隻蛋,煎荷包蛋都唔夠喉...況且卡樂Ｂ都唔食嘅！

醒起啦...突然間醒起一個BLOG友講開整蛋撻,佢提過話蛋漿材料可以減半做５個,一於試下整成點先!

撻皮方面...我擔心如果卡樂Ｂ扭計,就會攪到論論盡盡埋唔到尾,所以我一早買定左一份現成皮

我用左一半,勉強夠舖６個［可能我舖得唔好］

落蛋漿,食譜教落到８成滿[我諗大概係呢個位置啦...]

出爐啦...唔夠多蛋［做５個真係會啱啱好］

卡樂Ｂ食之前做左手指測試,Hmmm...Ｄ蛋漿都可以,唔太稀.

一個都未食晒就開第二個［唉...真無規矩!]不過,多謝棒場!!

下次再整應該會有多Ｄ改善,再好味Ｄ.

驚險事件簿

每次出門都有驚險事件,今次又點可以例外

• 話說我地出發前一個禮拜要搬屋,我都知道搬完屋一定揾樣樣野都無,所以一早就諗定,行李乜野都無都唔緊要,一定要有PASSPORT,機票同泊車單就行得.於是我就揾左一個文件箱,親手擺左D最重要嘅文件入去,仲親自運送呢個箱去新屋.

臨出門口前幾個鐘,終於有時間執行李.我就去文件箱道攞文件入手袋: 1,2,3...仲有一個PASSPORT呢?係邊度??? [註:因為我要用一個PASSPORT入境免簽證,但返英國個VISA就係另一個PASSPORT度...好鬼死煩!!!] 我當時真係好驚,得返幾個鐘,成屋都係箱同黑膠袋,點揾呀?如果漏左係舊屋就更加無望揾到,又唔敢同艾先生講...唯有繼續呢度望下,個度望下,希望可以記得返個PASSPORT係邊...
望左幾個字,終於醒起某日我要去郵局SET UP MAIL REDIRECTION，所以帶左個PASSPORT去做身份證明...即刻重組案情諗返去完郵局整野個疊文件擺左係邊...hmmm...應該係個信封入面，個信封就應該係個櫃桶入面...打開櫃桶個下真係唔敢呼吸咁濟,信封係度啦,一摸~厚嘅~謝天謝地

• 另一件事就發生係鄉下...某日要搭巴士出街,去到巴士站時見到一個'咩'住個結他,手攞住一個保暖杯嘅男人坐係巴士站張長凳度,PAPI抱住卡樂B,我就企係度扶住張PUSHCHAIR等巴士.

過左一陣,個男人開始對住卡樂B講野,卡樂B又望返住個男人好似想聽佢講野咁. PAPI嘅危機感一向都超高,已經唔出聲行遠左2步等卡樂B唔好再望住個男人,點知個男人起身一路行埋PAPI(同卡樂B)度,一路口噏噏[我D西文好水皮,但我聽到D類似'打打殺殺'嘅用詞].
PAPI為安全起見將卡樂B比我抱住,我再瞄左個男人一下:發現佢手上仲攞住一個螺絲批...有一架巴士黎左,PAPI走去同司機問路想引開個男人,點知個男人仲繼續跟住PAPI,繼續講一D好唔友善嘅說話,PAPI一路都無回過一句說話,但男人仲係窮追不捨...我就好想架巴士快D到,上左車就無事...
突然PAPI走過馬路大叫左一聲'POLICIA[警察]',原來有部警車經過呀,警車停低左,PAPI走埋去同警察講有人手持危險物件騷擾我地,警察落車叫個男人行埋警車檢查身份,擾嚷一輪,個男人係無身份證明文件係身,而且佢又好似有D精神問題,警察都唔想攪太多野,於是就KEEP住個男人係警車側邊,等佢唔好再行近我地,不過個男人仲係繼續用對眼盯住我地,繼續不停口噏噏.最後我地為免麻煩,上左部的士離開...
好彩PAPI係度,好彩有警察經過...呢個世界任可地方都有唔正常嘅人,我地就無端端驚嚇一餐...

煮煮煮.食食食

搬左屋咁耐,都算開始安定落黎(雖然仲有成屋紙箱,黑膠袋,衣櫃未執好...)唔理咁多,人點都要食野架啦,呢過WEEKEND,煮到唔停得手...

• 首先黎一盤CHOCOLATE BROWNIES,盒現成粉買左都有一段時間,唔知點解一路都無想起要整黎食...

食後感:其實都好HEAVY,間中行街買一塊食就唔錯,整埋一盤(成12塊)真係有D吃不消,呢次之後,我應該有排都唔會恨食囉.

• 先幾日煲左紅蘿蔔/粟米/豬肉湯,星期六諗起仲未試過煲菜乾陳腎湯,但係又想出街行下...攞返個幾年無用過嘅真空煲出黎!

煲左一個鐘就落埋D白菜,放落真空煲繼續無火煮食,到夜晚返到屋企就攞返個內膽出黎明火返滾,"吽"左成日,D湯都仲係好清,艾先生就話D豬肉唔夠"林",同明火老火湯真係無得比.

過左一晚...今日又再返滾成煲湯,再加D白菜再"吽"過...

隔左一夜,好味左! 我同艾先生又飲左兩大碗

煲呢煲湯其實都頗多功夫:菜乾要浸軟再開水喉慢慢沖走D沙泥,陳腎要用熱水浸軟剪開,快快手都要成個鐘先煲得.我就梗係要MAKE SURE全家都要SHARE呢個愛心靚湯啦: 卡樂B飲唔加鹽嘅頭啖湯, 艾先生個碗呢?撈料落碗個陣一定要千萬小心!唔可以比佢見到D陳腎,D豬肉要揀細塊夠"林"嘅,菜乾要揀細嫩嘅...最最最緊要係佢問係乜湯,要話係白菜菜乾豬肉湯,比佢知道有鴨腎乾就

• 第三炮:豬肉乾！

我好鍾意食豬肉乾,以前耐不耐都會係屋企人寄黎嘅救援物資中收到D食下.不過英國呢兩年收緊左中國豬肉製品入口,郵寄,搭飛機親自帶過黎比海關搜到都屬於違法,所以我都餓左好耐無得食啦...
有朋友話可以自製,上網揾食譜唔難.做法都唔算太複雜.對我黎講,難就難在揾時間做一餐功夫.
一開工,屋企無蜜糖! 但係D豬肉已經肉隨砧板上...唯有又見乜用乜,我用左楓葉糖漿.
一共焗左三塊:第一塊壓得薄得濟,焗到中段差D搣唔到塊肉乾出黎轉身. 第二塊同第三塊D肉都係醃好之後等左成2,3個鐘先入爐焗,唔知係咪呢個原因,焗個陣兩塊肉都出左好多油.第三塊就好似壓得比較厚左D.
第一塊出爐無耐就比某人消滅晒.第二.三塊出黎個樣無乜唔同,但係薄D真係好食D架!

本來諗住唔洗剪開,不過攪左成過下午先得3塊,都係慳住食好D...

試食個陣,艾先生問我係邊度買架,我解釋比佢聽係買料自己整,好似澳門買黎食個D呢.佢答話: OH...THIS IS SOMETHING SIMILAR... [即係唔係豬肉乾...]艾生,唔該話比我聽呢樣野應該叫乜呀

我在鄉下的日子...

同大家分享下卡樂B係鄉下嘅活動情況啦!

西班牙人過聖誕

[Hehehe...Sorry, sorry: 差不多遲成個月先出到個聖誕BLOG...]

西班牙人過聖誕就同中國人過新年一樣咁緊要,市面氣氛如何?

第一次上髮型屋...

時間: 2009年12月22日 地點: 嫲嫲介紹嘅髮型屋 活動: 齋剪! 費用: 10歐元

MAMI後記: 卡樂B其實係剪髮後第二朝起身先真正有機會望到自己個新髮型,一望塊鏡 佢竟然流露左一個好驚嚇嘅表情,唔通呢個兩歲人仔已經認得自己個樣? 好多人都話短髮嘅卡樂B望落大個仔D,我就覺得佢換左髮型之後連D行為表現都好似有D唔同左,又多野講左[雖然都係D無人識聽嘅BB話],對陌生人都無咁怕羞左,總括黎講:係調皮/曳左! 見到髮型師用乜野架罉同點剪之後,PAPI就話要UPGRADE屋企套架罉,以後卡樂B就可以係屋企都剪到髮型屋效果WOR...

揾個肥佬.過個肥年

12月22日一早起床(未夠9點),開電視裝下有乜睇,原來現場直播緊聖誕彩票大抽獎[西文俗稱 El Gordo ~ 中文譯做大塊頭,肥佬]...

每年聖誕節西文老師都會介紹呢個瘋魔萬千西班牙家庭/工作單位嘅大抽獎活動,買張獎券都成為好多人準備過節一定要做嘅一件事...因為一中獎,真係可以解決好多好多問題(尤其今年經濟唔好,好多人都有財務問題),真係揾到個肥佬,過個肥年,分分鐘仲可能下半世都唔係憂...

派彩辦法頗複雜,不過玩法就簡單啦!一家人或者公司同事夾一筆錢買幾SET號碼就得,一張大票要成200歐元,夾份就可以有多幾個號碼,漁翁撒網,多D中獎機會,有錢大家分[話說某年,西文老師妹妹病左,返唔到工夾錢,點知公司張票中左獎,所以...好不幸地全公司就得佢一個人無錢分]

以我所見,開獎當日有好多監場,公証員檢查所有抽獎器具,D彩珠就好似串魚蛋咁串好比D監長檢查好先放落個攪珠機.鎖好攪珠機就開始抽獎.

攪珠機有2部,一部抽派彩金額,另一部抽中獎號碼.

根據傳統,會由2個來至馬德里市一間學校嘅學生負責攞中獎彩珠出黎.

學生會'唱'出結果(有D似以前澳門玩TOMBOLA)'唱'完就串粒彩珠落支長魚蛋叉,叉滿一盤又要比監場CHECK.   

就係咁...一路抽,一路唱,抽抽下又換下個魚蛋盤,又換幾批學生接力'唱',D獎金就越抽越大,到差不多中午頭獎就出現啦!

今年我地無份中獎,因為彩票最遲12月頭就要買定...明年請早