BBQ

雖然MAMI鍾意BBQ，但今年第一個出聲話要BBQ既唔係MAMI，係卡樂B！（PAPI一定懷疑係MAMI出既詭計。。。但唔係囉！）

而且今次卡樂B真係好認真，我地要應承星期六攪，卡樂B自己就應承負責果汁！

星期六一訓醒，卡樂B就話：星期六，今日BBQ！~ 走唔甩啦！

通常BBQ最好都係3點零鐘開始燒，午餐晚餐一餐過攪晒。為左遷就卡樂B既休息時間/PAPI既開工時間，我地中午開始燒。

10點零鐘開始攪呢樣，攪個樣，MAMI醃肉卡樂B就拿拿聲攞定果汁。

雖然話天氣熱，但星期六都有風，點著支火柴都好有難度。MAMI係短短3分鐘就用晒PAPI個盒擺左成10年既火柴。。。


無辦法唔去自首兼揾救兵。。。因為要勞動PAPI去超市買火柴+透爐。。。點知: PAPI原來仲有一個打火機收埋！

最後要放個爐入車房點著D紙先可以搬番個爐出外面，但都要放係車房外既死角位先可以保住個火頭，無緊要喎! PAPI唔好BBQ，MAMI一人主理，個爐擺邊度係無問題既！咪埋一角唔洗曬親，快手燒好有得食最緊要!


我地透緊爐，卡樂B就SET UP水吧！咁多杯？有無咁多人呀？原因係佢仲預埋班IMAGINARY FRIENDS個份架。。。


半個鐘都唔洗D碳就見白灰，個爐就够晒熱，燒得！

今次除左必食既雞肉腸同雞翼之外，MAMI又整左蔬菜串，雞肉串，猪肉串。


卡樂B呢餐食得唔算多，但最高興既就梗係可以係後園跑來跑去啦！


BBQ後，卡樂B心情勁靚，仲雅興大發玩作句。望見盒新開既雪糕，佢話IT'S A FIELD OF ICE-CREAM... MAMI掘左兩大羹比佢，佢就話：YOU'VE MADE IT INTO A CANYON!

上癮

卡樂B食野既口味有時都頗難捉摸。而且一鍾意起上黎就成日都問住要食！

自己無端端話要食紅菜頭，MAMI煲左湯，完全無話顏色唔靚，一飲就鍾意埋！之後就成日問MAMI煲紅菜頭湯，去親買餸就問MAMI買紅菜頭，買親紅菜頭就同菜檔既人講PAPI扔過一包紅菜頭！琴日仲趁住玩ROLE PLAY，又落ORDER要飲！

呢兩個星期已經煲第3次！大碗係PAPI既，卡樂B就飲細碗D。兩仔爺就連D湯料都唔放過。粟米/紅蘿蔔/紅菜頭一律通殺！


MAMI就趁兩仔爺消滅緊個湯既時候係厨房趕晚飯。又係卡樂B近日既熱門要求：SUSHI！

事源卡樂B都好鍾意食壽司。最近出城又唔啱日子，無PROMOTION。入到去。。。卡樂B都剩係會食青瓜卷。一次食兩碟，加份叮當餅，計埋清水，8鎊幾銀！


其實MAMI都買定壽司工具好耐，但拖黎拖去都未整過！近日MAMI减肥，出到街都唔容易揾食。咁不如係屋企自己整？

好多年無整過，第一次重施故技，效果非常差！但卡樂B都捧場，係厨房出一件/入一件咁。。。個晚連飯檯都唔洗開就食左晚飯。

 

第二次整，D壽司出黎好樣左，但都整得好手忙脚亂。


第三次：MAMI上YOUTUBE望下有乜TIPS啦！用個膠袋包住張蓆先捲D飯唔會黐落蓆，清洗方便好多呀！


差不多一碗飯先够做一卷壽司呀！呀仔除左食壽司，仲要食餸，所以只係用青瓜/魚鬆做餡。


今次捲得好掂呀! （自己覺得啦。。。）


PAPI估MAMI整得太多，但最後卡樂B食左5件壽司+2串YAKITORIS。同MAMI既預期一樣！

白老鼠餐

點心唔係成日都可以想食就有得食。所以MAMI去唐人超市都會望下有乜可以買黎試試。

呢D買左都一段日子，趁今日有時間就做下實驗啦！

 

食後感：小籠包，MAMI懶無用蒸籠，所以蒸完痴埋一堆！但味道方面，比以前試過既好D，皮唔算太厚，就連卡樂B都肯食左3粒！


炸芋頭餅：因為估會似芋角炸起黎既香味，所以買黎比卡樂B試下。脆口野卡樂B實食既，但MAMI就唔鍾意個麵包糠面。。。


煎菜肉鍋貼：想試呢個因為係VEGETARIAN，PAPI會鍾意！而且MAMI做過幾次類似餃子/鍋貼都覺得好失敗，個餃子邊粗粗肥肥皮又厚，唯有買現成既算數！開慢火落少少水煎，味道都算可以！


PAPI放工返黎問卡樂B食左乜午餐。MAMI報告食左雪藏點心。味道還可以，卡樂B都肯食D啦。。。PAPI話點解無留番D比佢試下？因為呢餐係白老鼠餐，食過唔好食就費事比PAPI食。仲有存貨，星期日再整多餐囉。。。

滷肉飯（勁懶人版）

恃住近日磅數都仲跌緊就開始曳曳啦！見到快速版滷肉食譜。整一小份試下唔緊要啦。。。

食譜用五花腩，MAMI就用免治猪肉。

滷水料：現成豉油雞汁，蒜頭，葱頭，薑，幾粒花椒，一粒八角，一塊香葉。

蒜頭，葱頭，薑起鑊，落猪肉煎香，得閒兜幾下，等D猪肉唔洗痴埋一舊舊。

然後落3-4匙羹豉油雞汁，花椒，八角，香葉。加水蓋過D肉，中慢火煮10零分鐘。攪掂！

用免治猪肉煮，慳時間，慳爐火，但問題黎啦：MAMI望到眼盲要揾返D花椒出黎！

卡樂B行過，MAMI叫試食，好唔情願食左一啖，COMMENT係’NICE‘，問要唔要多啖。’NO，THANKS！‘

MAMI正準備開焗爐整魚批之際，佢大哎：’I WANT IT WITH MY BENTO [即係佢既飯糰] TONIGHT！‘ 考慮咁耐先話食！

OKAY！ 咁就快手快脚多啦！整個西洋菜湯，青瓜沙律，幾個飯糰。開飯啦。。。

卡樂B叫呢個餸做PORK WITH SOY SAUCE AND SPRING ONION。

留起左一份比PAPI，PAPI既反應應該係：唔够飯，徙晒D汁！

BEETROOT IS TRENDING

近來同卡樂B去親買餸，卡樂B都話要MAMI買紅菜頭食。MAMI剩係聽過人减肥會食，仲係話唔多好食既。。。所以MAMI一直都話下次啦，下次啦。。。

巧合地，好多BLOG友呢排都用紅菜頭煲湯。MAMI比BLOG友既紅菜頭相佢睇。佢第一個問題就問：‘DOES BEETROOT MAKE THE WEE PINK？’。。。

MAMI上網又揾下料，紅菜頭原來唔止有助减肥，仲有補血，活化淋巴，補腦，强壯骨鉻等功能。

咁正，一定要整黎試下。

街市一札有3個，賣£1，連埋葉。菜頭可以煲湯，D葉可以淥熟當菜食！買左一札，點知PAPI懵懵下當垃圾扔左，好彩咁啱又要出城，買過一札！


鬼佬食譜處理紅菜頭既方法係要成隻菜頭煲40分鐘到2小時不等，視乎大小同成熟程度而定。煲完凍左先去皮。咁做就可以保存個菜頭既顔色，但。。。好鬼麻煩呢！

廣東老火湯點做？去葉，去皮，切好，水滾就煲得！

切既時候就混亂少少。。。


本來都買左排骨，但唔够時間出水，所以試左個素食版 ~ 紅菜頭，紅蘿蔔，超甜粟米，少少杞子/南北杏，一片薑。煲個零鐘就攪掂！

卡樂B好期待既BEETROOT SOUP。。。


飲左一啖，眼神好唔肯定，PAPI同MAMI即刻大哎‘好好味呀！I WANT MORE，I WANT MORE。。。’ 呢個仔即刻笑晒口話好飲！

見PAPI食菜頭，又要食埋一份！食左一啖，COMMENT係：‘BEETROOT IS A KIND OF CARROT!'

卡樂B清晒自己個碗，又要PAPI分多左半碗比佢。清埋，都仲要再飲！早知咁好賣MAMI就煲多D啦！


PAPI就話呢個湯掂，只要唔落肉，第日再煲都可以預埋佢個份！

其實個湯都真係好甜，紅菜頭食味又似蘿蔔。全家都鍾意呢個湯，MAMI好開心呀。。。

¡NO CHUPES!

啜手指[卡樂B既BB話叫CHUPES]：其實係佢8/9個月大開始出牙/發牙痕先染上架。之前就算係DUMMY，都係啜幾下就吐番出黎。


其實佢係一個好CLOSET既啜手指人，佢係唔會係大庭廣衆既地方表演既！如果係街，佢會上左車，得返PAPI同MAMI一齊，佢就會問攞MANTITA [佢既隨身伴睡毯仔]，揾到佢最常攞住個個角落頭先會開始啜手指。係屋企玩得累攰要抖抖，夜晚上床覺覺猪，佢都要有MANTITA+啜手指先會安樂。

成日啜手指，所以右手大姆子係扁扁地既，而且有個厚皮。有時仲會咬得緊得濟，整損個皮！

唉。。。3嵗幾既時候就想幫佢戒，次次想開始唔係傷風咳就係發燒，有病已經辛苦，仲要唔比佢做自己想做既事，PAPI/MAMI都有D不忍。

PAPI/MAMI去藥房問過用手指水戒啜手指可以點做，藥劑師話4嵗先可以用呢D藥水。

卡樂B自己都話BB啜手指，佢係BIG BOY，到左4嵗就唔啜啦！

既然係咁。。。唯有等到足4嵗先開始啦！

4嵗既時候係香港放緊假：咁歡樂既日子，唔適宜有大改變。

放假番黎，用左左個幾月重拾生活秩序，準備開工！

買左支水返黎，一睇！含酒精，易燃物品！嘩！如果有小朋友係唔怕苦，搽左都照啜咪唔係幾好？


ANYWAY，開工之日，手公頭有兩大個破左皮既牙齒印，又唔洗用？原因：説明書話如果皮膚有破損，請勿使用！

唔通。。。又要延期？

無計可施之下，唯有用藥水膠布包住個傷口。咦！咁咪仲好，唔洗用呢樽咁奇怪既藥囉！


初初貼膠布既幾日，D WITHDRAWAL SYMPTONS 出晒黎！

日頭：坐車時好大問題！無得啜手指個口就得閒啦！卡樂Ｂ不停嘴講野／問野。PAPI都話驚比佢嘈到分心有意外！

夜晚訓覺：照常問要MANTITA，但一擺手指埋口就掂到膠布，無得啜。BEDTIME STORY講完都仲要繼續同MAMI講野。講到無野好講就叫聲MAMI，I LOVE YOU! 過一陣又話要揾個公仔攬下，攪下呢樣個樣。。。十足十D烟瘾起又無得食個D囉囉攣一樣。

MAMI其實都發現卡樂B呢排情緖有D唔稳定。雖然唔會無端端打人，但就會好容易為好小事唔開心。有時甚至係自己想像得太嚴重，跟住又大喊。

療程到而家大約進行左差不多一個月。有時MAMI唔記得幫佢貼膠布，卡樂B自己都唔會擺手指公入口。但PAPI就覺得：夜晚訓到懵懵下就擺左入口都唔知，所以PAPI好堅持要繼續貼膠布多一段時間。

點都好，呢D辛苦既日子會過去既。。。希望卡樂B好快可以完全戒掉呢個壞習慣！