包雲吞！

近來抱恙，包左成個幾禮拜雲吞，终於提醒左我仲有雲吞皮係冰櫃未用！的起心肝揾蝦買，整D雲吞食下啦！

公公婆婆黎之前包過一次，效果唔理想。。。睇左公公婆婆真人示範先知道錯左係邊度 ~ 係D肉呀！原來我用碎肉機整得碎得濟，攪到隻雲吞無晒咬口！

公公婆婆教蝦同猪肉比例為1:1,我買多左蝦又唔想留，所以我用左3:2。蝦去腸（大隻既就切開），猪肉唔好攪碎，要用刀切细粒！

切好肉就加入生抽，老抽，胡椒粉，燒酒，麻油，糖，雞粉（以前用味之素）調味。仲有 ~ 粗粒装花生酱一匙！[呢樣野係一個以前開雲吞麵舖既鄰居教既！]  落一隻雞蛋黄攪均D材料就可以開工。

 

包法我一直都係用婆婆教既方法，餡料放雲吞皮1/3位置，向對角圈埋到2/3位置，留意唔好有漏餡，然後用手指壓實少少餡既邊沿位置，搽D蛋白係近手指尾位置個帗皮，另一邊無搽無蛋白個帗皮拉過去一齊搭實成元寶狀既雲吞。

 

包左幾隻，見到有少少爆餡 ~ 婆婆教呢D可以即刻整熟黎試味！試左味，我又加多左D盐落盤餡料，繼續包！

包好就用包鲜纸分好一次份量（今次存左4份），放入膠盒雪藏。要食個陣係冰櫃攞出黎直接落滾水渌熟就得，好方便呢！

 

是日晚餐：净雲吞，雖然無充满梘水既爽口生麵，我都照樣落左大红浙醋伴食，好滿足的COMFORT FOOD！

 

低成本，大制作！

 
諗都無諗就浸左半包黄豆 ~ 今次用半包，仲有半包留返下次用[懶醒...]。

 
一夜過後，D豆真的發大左兩倍，根據食譜指引，D豆READY啦！

 
一份豆就加三份水用攪拌機打爛。。。

 
打爛之後我就用SIEVE過一次。

 
D豆渣就放埋一邊等埋一齊先用布再搾。

[呢個傻婆仲未知大鑊。。。]

打左唔知幾多次攪拌機。。。终於打晒D豆，已經有半煲咁多。於是開始用布搾埋D豆渣。我其實手力好差，就算扭毛巾都扭到滴晒水比人閙，所以要扭呢盤豆渣真係好辛苦。

話雖如此，煲生豆漿最後都有個煲8成满。

[開始有D担心，好似整得多得濟。。。但已經洗濕左個頭，點都要繼續整埋佢，見步行步啦！]
食譜話要再一份生豆漿加三份水煮熟就成為豆漿。吓。。。再一開三？

唯有揾埋全屋最大個個真空煲出黎，量左15份生豆漿，但我剩係加左30份水，煮左一輪，终於整好一大煲豆漿。（我估計最少有5公升!）

仲有一半生豆漿未煮，全屋又得我一個飲。。。唯有停工+投籃。。。

個豆漿好飲架，但畢竟係寒凉野，我都唔敢飲好多，兩日後D豆漿都變味啦，好無奈地又要浪費。。。

今次教訓：成本雖然係少少90p，但都要一番勞力先有得飲，最慘係最终都要浪費好多，現今世界咁多飢荒，真係罪過罪過。。。呀C9，請你以後不要忘記用腦呀！

怪怪地既蓮藕湯

MAMI感冒仲未清，卡樂B都係咳咳有痰，本來都唔想煮野食，平日可以煲湯既日子已經唔多，星期六都唔煲又唔知要等到幾時。本來想煲粟米红蘿蔔排骨湯，原來粟米擺得太耐，變左色
[唉。。。又要投籃。。。]

為左有D湯水飲下，於是見乜落乜整左呢煲配搭比怪既湯：

材料：
主要係蓮藕，但呢度D红蘿蔔好平，我時時都有一包係雪櫃，咁就加條红蘿蔔啦！

出左水既排骨幾條：而家覺得用排骨煲湯好味D，所以多D功夫都用佢！

赤小豆+大扁豆：其實唔知夾唔夾架，不過都落一D啦。。。

煲好左。。。hmm。。。味道都唔差！

艾先生見親D唔同樣既湯，次次都好似我整野要毒佢咁！問長問短！

艾：乜湯黎架？

MAMI：咪又係猪肉湯！無落任何乾制海鮮架（就算我落半粒江瑶柱，佢都會聞得出）

艾：。。。。。。（唔多滿意個答案）

MAMI：今次落左個唔同款既瓜，係蓮藕，同埋少少豆仔囉！

艾：卡樂B飲嗎？

MAMI：飯前飯後飲左成碗啦！(我梗係用卡樂B HARD SELL 啦!真係多此一問)

艾：都唔明點解你成日要轉D食譜，I AM HAPPY WITH THE CARROT & PORK SOUP.

MAMI: 红蘿蔔湯飲得多會面黄架！你老婆我已經好黄面婆啦！而且，廣東湯水落唔同既料係幫助身體唔同部份架嘛。

艾：YES。。。（究竟佢同意我講既邊部份呢？）

講到呢度，艾先生再無問落去，如果唔係我真係唔知點再解釋比佢聽！

HIGH STREET，HIGH TEA

我們的高街一D都唔HIGH，幾年前開始市容重整就將高街劃成步行街，D全國性連鎖店就搬晒入連住高街既商塲入面，商塲外既高街舖位反而無人問津，D舊舖搬左就掉空，平日行過都唔想多望一眼。。。

聽朋友講高街開左一間新港式茶餐廰，餓左好耐港式茶餐既我地就趁PAPI牛一去食個TEA試下D食物既水準。

有港式茶餐廰既卡位，係呢度好少見架! [卡樂B去到門口已經想走，我打呢篇BLOG時佢見到張相就話：I DON'T WANT TO EAT DIM SUM！]

事前我已經經過過，攞個餐牌望過有PAPI都會食既食物，所以先敢提議去試下。

點知。。。當日河粉沽清！再望望餐牌：有炸醬麵WOR，問左係用雲吞麵既生麵做既，姑且一試啦！我就點左日式炸猪扒跟白飯，又加左個無黎頭既法式西多士，當日MAMI已经感冒，我都無心機叫野飲啦，净飲清茶算數！

上菜啦。。。

炸醬麵：PAPI話D猪肉太大舊，[賣相問題]，但我就覺得唔係我地係香港食個仲少少甜，少少辣既味道。

日式炸猪扒：係炸猪扒囉，炸到咁。。。脆口野，唔難食不過無甚特别。。。我一向對罐頭雜果加MAYO既沙律都好有保留，唔食罷就！

法式西多士：卡樂B食左一啖就停口，唔啱佢當日既胃口！不過2鎊80既價錢，我下次會再點嗎？

攞香港一般茶餐廰水準黎比較，呢間都仲有差距。但想到天寒地涷，想食少少熱野但又唔想食薯仔，M記，呢間都係全城唯一選擇啦！

第三度菜式：魚翅瓜燜腩仔

我好鍾意燜野食架，因為燜親都一大煲，分幾份雪入冰櫃第日又有得食，真係慳功夫！

魚翅瓜一開左唔擺得耐，要密密食直到食晒為止，整羹同蒸蛋都用唔到太多，所以一定要整D大鑊野，唔係個瓜爛就浪費啦！

聽人講過可以燜魚翅瓜。既然魚翅瓜食味同冬瓜相似，我就用我燜冬瓜既辦法燜魚翅瓜囉！

魚翅瓜切去瓜囊/瓜皮切成大舊，猪腩肉幾條切好調味，冬菇浸軟身備用，仲有我好鍾意既豆腐卜。

落少少姜，蒜頭爆香猪腩，就加入冬菇抖下，過一陣就落埋魚翅瓜/豆腐卜，加入浸冬菇既水同醃猪肉既汁，適量水份，番滾就可以轉慢火。

差不多燜好，我就加少少柱候醬，D顔色會靚D！

魚翅瓜好耐火，所以燜耐D都唔驚會溶溶爛爛。我食左一口，即刻記番起细個食過既一味餸：燜冬瓜乾 （係刨薄片晒乾，食既時候用水浸番軟再燜，不過。。。好多年都揾唔到冬瓜乾LU），
魚翅瓜食既時候又一絲絲既，好回味呢!

ANYWAY,整完呢個煲，剩番最後的一份瓜再做左一次羹，明年請早啦！

牙牙學語，鸚鵡學舌，牙尖嘴利

卡樂B做2嵗發展評估時，HEALTH VISITOR問我地有無乜野擔心，我第一句就話卡樂B説話方面唔係幾好[我聽D香港媽咪話2嵗BB要識得講20個單字左右先合格，卡樂B當時真係講唔到10個字!] HEALTH VISITOR話男孩子通常比較慢，建議我地再觀察6個月，6個月後仍無改善就幫卡樂B排期見醫生再評估。

到左2嵗2個月，呢個仔開始努力牙牙學語，識講乜？呢個BLOG有提過啦。

到左2嵗3個月，卡樂B對車發生好大興趣。PAPI同MAMI就投其所好猛同佢講車，好多車名係認得，但礙於發音/說話未掌握得好，難讀既名往往得返頭一兩组音，再唔係就名都比佢改埋。

而家睇返呢個今年3月拍既VIDEO先發覺原來初初學講野係要咁起勁，咁肉緊既！



卡樂B對車既熱情有增無减，D車牌子梗係越讀越好啦！（2010年8月）



跟住幾個月卡樂B既發音慢慢有進步，加上公公婆婆黎住左一段時間，屋企多左唔同聲音，好刺激到卡樂B鸚鵡學舌。

公公婆婆只會講廣東話，卡樂B就從中學會左幾廣東話：早晨，食飯，食菜，食麵，不過呢D全部都係限於同公公婆婆講，公公婆婆返左香港佢就唔多肯講LU。。。

MAMI一直都有同卡樂B唱幾隻童謠/廣東歌，日子有功，慢慢地耐不耐佢就會抛返D出黎娱樂下大家。最經典既一句應該係BEYOND 海濶天空呢一句：明白我這一生不羈放縱愛'豉油'！

卡樂Ｂ深明PRACTICE MAKES PERFECT呢句説話既道理，所以每逢有字佢想學講佢就會不停揾機會用個個字。有一排唔知係邊度聽到EMERGENCY DOORS呢個字，结果佢見到任何門（包括車門，房門，鐵閘等等）佢都會大哎EMERGENCY DOORS。之後。。。就輪到講MOTION PICTURE，ANIMATION （識得呢句係因為DISNEY CHANNEL成日賣個MOVIE CHANNEL廣告!)

近呢幾個月，卡樂B既聽力/理解能力又比以前進步，所以更加多野講！仲成日講埋D似是而非既野出黎，好好笑：

• MAMI睇世界杯，有緊張塲面MAMI會有驚嚇表情，卡樂B就講左一句'嚇死MAMI呀 'cos it's football!'
• MAMI 話要閂電腦同卡樂B話：I NEED TO SWITCH OFF THE COMPUTER AND GIVE IT A REST OR IT WILL GO BANANAS TOMORROW. 卡樂B答：BUT IT'S GOT BANANAS IN THE COMPUTER?!
• 某日PAPI同卡樂B車MAMI返工，PAPI問MAMI一個問題，MAMI答：NO！卡樂B話：PAPI WAS TALKING TO MAMI & MAMI SAID 'NO!'
• 同卡樂B去散步撞見鄰居，MAMI就同鄰居講聲'HI'打個招呼. 行行下佢話：MAMI SAID HI TO THE MAN. [MAMI當塲覺得：嘩！好彩唔係去幽會。。。唔係穿煲點算!]
• PAPI同卡樂B講睡前故事<超市購物記> : 去到超市，見到很多購物車，入到去，跳過第1，2排貨架，直往第3排（玩具部）。卡樂B見到一架玩具車，爸爸說不好看，不買。第二架呢？媽媽說卡樂B已經有同款的，不要再買。再看到火車卡通游戲卡，爸媽一齊話卡樂B年纪太小，未啱玩住，不買。PAPI仲好口衰衰地加左句：PAPI & MAMI ALWAYS SAY NO (hahaha)!卡樂B FED UP了，回左句YOU NEVER SAY YES！

呢大半年實在見到小朋友既學習進度可以好驚人，其實更加驚人既係：表面上卡樂B就係識咁多野，不過我地根本無法知道佢到底識得幾多，真係唔聲唔聲，嚇你一驚！

再接再勵 ~ 魚翅瓜+蛋：蒸得又煎得！

第一個瓜，我送左3/4個比朋友，留低1/4個比自己，都整左2次（共4餐）魚翅瓜肉絲羹。

第二個瓜 ~  亦係今年最後一個收成 ~ 比第一個更重：4.20KGS （9磅4安士）！

艾先生好鍾意個羹，仲叫我日日都整，食晒個瓜為止。

嘩！佢就想得高興！個羹做法雖然唔算複習，但樣樣材料都要切得幼细吃起黎先有口感，快手快脚都要半個鐘以上先PREP好所有材料。

所以。。。我無理會佢呢個要求。。。我要整魚翅瓜蒸蛋！

第一次整到好LEI HEA。。。最慘係落煲蒸個陣個碗打翻左，無左成1/3。蒸個陣又大火得濟，蒸到蛋面起晒痘皮！

雖然味道都OK，心有不甘。。。又有瓜剩。。。又有浸開左既冬菇/蝦乾。。。又有咸蛋。。。牛奶又一定有係雪櫃。。。再黎一次。。。

材料同做法大致上跟呢個食譜， 不過我加入左冬菇絲同蝦乾蓉。

舖左一層魚翅瓜，洒上冬菇/蝦乾，再舖多D魚翅瓜，淋上拌好既蛋汁。

上次懶求其揾個煲就蒸，個煲太窄，打翻碗蛋！今次。。。只許成功，不許失敗！我乖乖咁攞左個蒸鍋出黎，蒸鍋有蒸盤，成個碗放左入蒸盤先上鍋，萬無一失啦！

唔想痘皮，用中慢火，又用筷子留左少少位出氣，每幾分鐘我就開蓋放氣CHECK CHECK。仲整定甜豉油淋面。

Hmm。。。差唔多蒸好就加入葱粒，焗多一陣就食得。

加左牛奶D蛋食落好香滑，當堂覺得好養顏。魚翅瓜好爽口，卡樂B食左一啖就話CRUNCHY/NICE，之後又要多左幾啖，總算唔係好抗拒呢個餸啦！

雖然蒸蛋個陣我已經猛落魚翅瓜，但都仲有用剩，第二日午餐，我就做左一個快手午餐。

魚翅瓜，葱丝，2隻蛋打均。放燒少少油落鑊。中火煎好個底，用隻碟幫手反轉個OMLETTE煎埋另外一邊，加少少茄汁。

卡樂B叫呢樣野: TORTILLA WITH SAUCE。頭圍用膳左都埋黎要食埋一份。。。連蛋都肯食，MAMI當然開心啦，多多都比！