生日/母親節週末...燒叉燒又整曲奇

今年MAMI既牛一係星期六,而母親節就緊接係星期日,我地安排左D外出活動,加上我逢週末/長假期都例牌手痕要整D野食下,攪到有D野想寫都未有時間BLOG, 仲比呢過週末既果醬,豬肉餅遲黎先上岸,趁住重記得補BLOG返先...

• 叉燒: 我諗呢個廣東燒味好多人都整過啦! 叉燒除左醃料,最重要係買到一份靓豬肉. 肥叉好食不過實在不健康,但全瘦又好'鞋',所以一D搭有少少肥既部份就最理想...

係超市見到去左骨既膊頭肉扒,有少少肥,而且切好晒,價錢又唔錯,於是買兩包試試.                            

前一晚就醃好晒D扒,入味D嘛...see you tomorrow!

一大清早就準備入爐!

出爐時係燒得過火左D,似黑炭頭...所以都係影D大特寫好D

一輪小手工剪返D黑炭出黎之後就好樣返D啦.

即日晚飯係叉燒油菜大碗飯.用叉燒燒汁撈飯,卡樂B都好棒場呀!

兩日後,再黎一個燜日本咖哩薯仔叉燒飯,好醒胃

叉燒真係好百搭既菜式,我一定會再整黎食!

• 牛油曲奇: 其實我從來都無整過曲奇架...朋友大力推介既呢個BASIC RECIPE又真係好易整: 牛油,糖,麵粉三樣材料就做到.

最大問題係要用電動打蛋器打到D牛油CREAMY...卡樂B一見我攞個盒出黎就已經喊到唔停得(好醜怪呀...)

停左一陣工,安頓好卡樂B我就鼠返入廚房再開工!今次因為有佢鍾意既兒歌陪住,每次RESTART隻歌仔我就可以有2分鐘時間開機. 如是者走左7/8次就打好牛油糖,落埋D麵粉就做成粉團,搓搓下就整左30幾個曲奇出黎.

入爐15分鐘D新鮮曲奇就出爐

好鬆化,好容易食到唔停得手.不過肯定高卡,少食為妙.

話雖如此...我琴日又整多左一次.我問卡樂B我可唔可以用MIXER,佢好快就話'NO'.我解釋比佢聽唔用MIXER整唔到曲奇,咁我可唔可以用,今次佢好面有難色,唔知點答我啦...

Mon Petit Déjeuner

Bonjour, Madame...et voilà!

做好自制果醬,就要嘆返個法式早餐...好好享受一下我辛勞既成果.

法式早餐點少得牛角飽? 某日經過超級市場牛油/餅皮櫃見到呢罐物體...新鮮出爐牛角飽BOR...襯晒我D果醬(又啱晒我呢D懶人)啦!

做法簡單,連包裝都會自動打開...

 

一拉開封條,個粉團就好似'米芝蓮'咁迫曬出黎.

當我頭大緊點樣切六個三角形既時候...用刀跟住D線CUT出黎就得啦...

 

話咁快就卷好6個飽,20分鐘就出爐.

評語:我鐘意牛角飽.不過我都怕太多牛油.但係呢D飽係唔夠牛油.

而且一睇就知,一D層次都無...

呢舊現成粉團好玩但同似樣少少既牛角飽比較都仲頗有距離...

整黎比卡樂B食都好,唔太油膩嘛.

 

最後,我都有用呢D飽黎試食我既自家制果醬:我就覺得D果醬比較甜左D,但艾先生竟然猛話好食,其實最好既證明會係呢樽果醬要幾耐先食得完囉

鹹蛋蒸肉餅(蘇GOOD版)

卡樂B係一個可以淨食白飯既小朋友,平日食飯係食好少餸,雖然HEALTH VISITOR話唔覺得佢唔夠鐵質,但我就梗係想佢食多D餸,唔係點長肉WOR?

今日諗住要食埋D MINCED PORK,又想食鹹蛋,於是就整鹹蛋蒸肉餅啦!

我唔知點放隻蛋落碟豬肉度,上網睇下D食譜點整,比我揾到'呀蘇'整法既介紹,我就照做囉!

豬肉要剁好耐...20分鐘左右,基本上係要剁到好融好碎(鐘意食蒸肉餅要D肉粒有咬口既朋友就可能唔喜歡呢個整法啦).
 
好彩卡樂B瞓左覺,我就可以努力地剁,左手剁到攰就用右手,剁剁下又小休上上網...                                               

剁好就落生抽,老抽,糖醃味,放10分鐘左右就可以開始下一個工序:攪拌.
落麻油,生粉,水續少落然後就係要不停地攪,攪到D肉有輕身既感覺就得.我就每次落3湯匙水,落左4次左右.

 
臨蒸前落少許酒.係蒸碟上搽上油,倒入預備好既肉餅,加入鹹蛋黃(不要蛋白)

 
中火蒸25分鐘左右即成.

根據介紹:蒸得靓既話,應該是有很多汁,整個肉餅係浮起既,用手轉隻碟,肉餅係會反方向轉動既(形容到好似D廚神卡通片對白一樣...)

我呢盤又點? 有汁啦!無黐底(不過係咪浮起...我又唔多覺); 肉餅係咪會反方向轉動?(我又無測試到BOR...) 因為我好心急要試下食味係點...hmmm...我調味一向都係偏淡,今次都唔例外,不過用左水黎攪D肉又真係好鬆滑.

我將D肉餅撈飯比卡樂B食,卡樂B無話見到有唔係飯既物體唔肯食,仲食左一大碗,對我黎講就係蒸得靓既最好證明.

士多啤梨果醬

上星期買左兩盤士多啤梨諗住整,點知唔記得左...結果要全部投籃...

今日去到超市又見到士多啤梨,心有不甘...再買!仲即刻開工整埋!!

用料好簡單:士多啤梨,糖,檸檬

 
用POTATOE MESHER壓爛D士多啤梨,煮一陣就落糖...見成大碗糖落落去個煲,真係覺得呢煲野好大鑊...                           

 
煮煮下就會出白泡,要比心機撈返出黎,撈到咁上下盤JAM就會清番...好神奇!

 
剛剛好一樽滿,不過我未捨得食住...食味係點,第日話你聽!

英國美食巡禮...

卡樂Ｂ係中國四大發明既超級擁躉,要佢食粥粉麵飯真係易過要佢食餸~可能我煮D餸太悶啦...我為左比佢試多D新口味同埋要令我自己唔好對做飯生厭,呢幾日都試左幾款新菜,不約而同都係比較英式既口味.

• FISH PIE:

一開工就有工業意外,所以相都少影,務求快手完工了事...

主要有兩部分材料: 1)個批餡料; 2)薯蓉
1) 餡料:
40G 牛油,1小個洋蔥(切粒), 2個蕃茄(去皮去核切大粒),1.5湯匙麵粉,200ML全脂奶,500G COD FILLET(去皮,切開成小塊,又可以用三文魚/COD每樣一半), 1 BAYLEAF, 1湯匙PARSLEY, 50G CHEDDAR CHEESE(刨絲),1隻蛋(打均)
做法: 溶牛油,加入洋蔥爆3數分鐘,然後加入蕃茄爆3數分鐘,加入麵粉煮一分鐘左右,加入奶,奶返滾就加入魚肉,PARSLEY, BAYLEAF煮5分鐘.撈起BAYLEAF加入芝士攪均,(加入鹽調味).
如果想趁機比多D菜小朋友食,可以加入雜菜粒落盤餡料,我就加左紅蘿蔔,粟米同青豆.

2)薯蓉: 500G薯仔
去皮,切粒,煲淋.加入40G牛油,適量牛奶壓成蓉備用,加入鹽同胡椒調味.
焗爐預熱到180度,將整好既餡料放入焗盤,然後舖上薯蓉,再搽上蛋漿焗15-20分鐘.如果想薯蓉表面金黃香脆少少可以係GRILL度GRILL幾分鐘.

煮左出黎好似BABYFOOD,所以卡樂B都接受呢個菜式,我就更加唔洗講啦

• TOAD IN THE HOLE:

我成日以為呢個菜式背後會有個比較特別一D既典故,上網RESEARCH原來都係話個賣相似D蛤乸係個窿度突個頭出黎就叫左呢個名!

呢個菜式其實係用YORKSHIRE PUDDING既BATTER同豬肉腸一齊焗出黎既,食既時候就用薯蓉,洋蔥GRAVY伴食.係一個好簡單既家常便飯菜式.材料做法可以參考呢個食譜.
一開工:又發現原來屋企剩得半個小洋蔥,又無喼汁...唔洗整GRAVY啦,唯有用現成個D GRAVY粉加僅餘少許既洋蔥代替...
要用電動打蛋器打BATTER,卡樂B一見到我攞部機出黎就攬住我隻腳係度喊,我好狠心呀,無抱佢呀...一邊開住機,一邊講D無聊野氹住佢.快手快腳就打好BATTER備用.

豬肉腸係焗爐焗到出油就可以攞出黎再用明火加熱少少D油,落BATTER.

落左BATTER就快手放返入爐焗起D BATTER. 個爐夠熱,入返去唔洗5分鐘D BATTER就開始發啦!

半個鐘就可以出爐

卡樂B的晚餐

初初以為佢唔鍾意個GRAVY,食食下佢竟然攞個匙羹"筆"!佢鍾意個YORKSHIRE PUDDING我就一早都預左啦,但係佢都肯食個腸多過D薯蓉我就覺得有D意外(不過開心架~因為平日佢係唔多食肉架!)