自己整，好食D！

聖誕，新年期間PAPI同媽咪都放假，多左時間一齊食飯，即係要煮多好多餐，有時真係好難諗整乜 。。。

今日就地取材，整番個西班牙鄉村風味TORTILLA食下啦！食譜以前已經BLOG過，有興趣可以睇呢度,唯一唔同既係今次呢個TORTILLA係有人幫MAMI一齊整架！

呢位小厨師好落力呢！

平日卡樂B一見到蛋就走唔切，今日就話個TORTILLA VERY NICE，連火腿/CHORIZO同埋伴菜ROAST PARSNIP都食，唔通自己有份整既野食真係好食D？

一年容易又聖誕

趁有時間同大家講聲聖誕快樂先

謝謝靚仔厨師MASA

以為有雞翼做晚飯，點知。。。冰櫃個舊疑似雞翼既物體溶溶下雪终於露出真面目，原來係舊猪肉！大鑊。。。臨急臨忙改餐單，屋企個两位公子分分鐘會唔食。

其實除左雞翼，我打算整清炒白菜，仲有一煲奇瑪咖哩比自己撈飯（艾先生唔好咖哩既），有多就冰埋第日PACK LUNCH用。

拿拿臨抽起白菜，换成红绿椒炒芽菜。

開飯啦。。。艾先生話碟红绿椒炒芽菜有怪味，可能係樽BLACK BEAN SAUCE變左
得返一味好餸：奇瑪咖哩！

我同卡樂B講係SPICY PORK佢就肯試，試左一啖就話NICE，不停問要多D，都算識貨！

奇瑪咖喱 ~ 其實係免治猪肉咖喱。食譜來自MASA，我最近刨緊佢既一本食譜，覺得好正/易整/好食，於是就買齊材料試整第一個菜。
 
材料：免治猪肉 300g，洋葱半個，蒜頭2粒，番茄 300g，矮瓜一條，红酒100cc，咖哩磚2塊（约50g）

洋葱，蒜頭切细粒/末。

矮瓜切丁浸下水去澀味。

番茄浸熱水去皮，切開，去籽，切碎（我懶，用左一罐番茄）

煮得！
 
洋葱蒜頭落鑊炒到透明。

加入免治猪肉煎到淺金黄色。(食譜話而家落红酒，我無，我"贊"左燒酒！）
煮多一陣就落番茄，矮瓜，冚蓋繼續煮。。。

 

 
煮到D菜淋，出晒水就熄火，落咖哩磚，拌均。（如果覺得個餸太乾，味太濃可以跟據個人喜好加水調較一下）。

 

艾先生就係無得揀既情况下迫住要試，好彩。。。佢都竟然話OK，又真係越食越多，連我諗住留起第日PACK LUNCH個份都食埋。

食飽飽收碗，我都要為我既出錯同艾先生講聲唔好意思，見佢都食左唔少，我問左一句：Did the mince pork curry save me from being executed tonight? 艾先生話第日可以再整呢個餸，所以今次過左骨~ 真係要謝謝MASA

聖誕郵票

同好多其他國家一樣，呢度每年都會出一套聖誕郵票，以往既主題/款式都係比較傳统既聖嬰，聖誕樹，雪人之類。。。。哈哈! 不過今年係WALLCE & GROMIT  。。。所以想SHOW比大家睇睇

本地頭等：41p，不論遠近，通常今日寄，第二日收到。

本地二等：32p，隔日收到，但如果係近既就第二日都有機會收到。

寄返香港既最低消費係97p，今年都有聖誕款, 雖然唔够本地頭/二等既設計咁靚。。。

咁鬼CUTE,攪到我都忍唔住手買左D，而家又要諗下寄卡比邊個好。。。

婆仔數

就到聖誕，艾先生話屋企D聖誕樹裝飾有D過時，想買幾個新吊飾UPDATE下個LOOK。行左一間，買左幾個波波都頗滿意啦，但未揾到個100%鍾意既TREE TOPPER，於是就行埋去商塲另一間百貨公司碰碰運氣，睇下有無啱心水野。。。

行到入去，見到D吊飾做緊8折，D款又幾CUTE，又揾到個可以改裝成TREE TOPPER既吊飾，於是又揀多左幾件。。。

臨去比錢，見到個STAFF攞住架LABEL機係度UPDATE D 價錢牌，原來呢两日做7折。我口痕問佢會唔會收銀唔知改左價錢架？佢話幫我地D吊飾貼個新價錢牌就唔會攪錯啦！整好晒，我就去比錢。

收銀計好數話11鎊幾，我都有少少懐疑。。。攞返張單一CHECK，真係計錯數！照SCAN個LABEL出黎個價錢都唔一樣！收銀妹妹仔話今日第一日返工[聖誕短期工]，要揾同事幫手先可以改正。。。

隔籬同事SERVE完個客過黎講低點做（原來减價貨要收銀自己再打多次價錢CONFIRM），妹妹仔都係攪唔掂！又要再等。。。

今次同事親自出馬！問我想當部份换貨定全部退貨再打過單，我話邊樣方便易做就做邊樣啦，反正我都係等你計數收返差價就得。於是佢就一次過退返晒全數比我，然後重新入機收錢。

承惠6鎊幾！唉。。。又計錯啦！同事又疏忽左啦 ~ 今次佢剩係SCAN過有問題既幾件吊飾，無事個D就無SCAN （但攪退款時就退晒全數比我！），入返落袋算數！

攪左咁耐，卡樂B既耐性已經用完，我都費事再浪費時間再解釋/教精呢D人，比張10鎊纸，找返3鎊幾，鬆人！

返到屋企再CHECK單，都仲係好怪既單/計法，計一計，其實係要比9鎊幾，只係收左6鎊幾，所以我‘抵’左3鎊幾[慳返油錢]！

真係好唔明D外國人數口同我地可以差咁遠，簡簡單單一條婆仔數都可以計到錯完再錯！

卡樂B三歲啦！

卡樂B三歲啦！點慶祝?都係送禮切餅咁啦。。。

[頭一段VIDEO要比較耐先LOAD到。。。]

我愛羊咩咩 ~ EL FRITE

實在好鍾意呢度既羊肉，唔酥，價錢又唔貴，雖然艾先生唔鍾意，但自私既我耐不耐都會買D羊食下，過下癮！

唔煎羊扒，我就多數會整呢個EL FRITE [直譯為THE FRY], FRIED LAMB WITH PAPRIKA & VINEGAR, 食譜源自西班牙西部EXTREMADURA，少少辣，酸酸地，好醒胃！
 
[一睇就知唔係我整架啦！來源：SPANISH COOKING：A FIESTA OF ORGINAL REGIONAL RECIPES]

材料如下：羊膊頭肉（800G）切成小塊加入盐/黑胡椒調味，隔夜麵包一塊，红酒醋3湯匙，蒜頭6粒，GLOVES6粒，切碎PARSLEY4湯匙，橄欖油2-4湯匙，長身/辣既辣椒一隻（無就用半隻晒乾左既红辣椒或CAYENNE CHILI POWDER 1 撮代替），PAPRIKA 1湯匙。

做法：将醋均匀晒滿隔夜麵包，然後用2湯匙油煎至金黄色，放凉後就用攪拌器打碎，備用。

開鑊落油，加入3粒切碎蒜頭，CAYENNE CHILI POWDER，分批将羊肉爆香至淺金黄色。

用電磨打3粒蒜頭，GLOVES，PARSLEY成蓉。用MORTAR'鍾'碎都得！[今次做到呢個STEP，我先發現。。。。。。屋企無PARSLEY，連乾既都無，所以我個蓉得蒜頭同GLOVES！]

羊肉轉淺金黄色就可以加入PAPRIKA，蒜頭蓉同200ML清水，加上蓋煮20-30分鐘，等D水煮到得返幾匙，加入先前預備好既隔夜麵包碎整'杰'個汁（根据個人喜好加入，太多可能會過酸！），再用盐/黑胡椒調味即成！

 

呢個食譜煮出黎比較乾身，但D蒜頭/麵包蓉好冶味，所以都非常適合送飯。煮好當晚我食左一餐，仲有兩份存貨，再食個陣會加返D PARSLEY煮一煮，補返鑊

包雲吞！

近來抱恙，包左成個幾禮拜雲吞，终於提醒左我仲有雲吞皮係冰櫃未用！的起心肝揾蝦買，整D雲吞食下啦！

公公婆婆黎之前包過一次，效果唔理想。。。睇左公公婆婆真人示範先知道錯左係邊度 ~ 係D肉呀！原來我用碎肉機整得碎得濟，攪到隻雲吞無晒咬口！

公公婆婆教蝦同猪肉比例為1:1,我買多左蝦又唔想留，所以我用左3:2。蝦去腸（大隻既就切開），猪肉唔好攪碎，要用刀切细粒！

切好肉就加入生抽，老抽，胡椒粉，燒酒，麻油，糖，雞粉（以前用味之素）調味。仲有 ~ 粗粒装花生酱一匙！[呢樣野係一個以前開雲吞麵舖既鄰居教既！]  落一隻雞蛋黄攪均D材料就可以開工。

 

包法我一直都係用婆婆教既方法，餡料放雲吞皮1/3位置，向對角圈埋到2/3位置，留意唔好有漏餡，然後用手指壓實少少餡既邊沿位置，搽D蛋白係近手指尾位置個帗皮，另一邊無搽無蛋白個帗皮拉過去一齊搭實成元寶狀既雲吞。

 

包左幾隻，見到有少少爆餡 ~ 婆婆教呢D可以即刻整熟黎試味！試左味，我又加多左D盐落盤餡料，繼續包！

包好就用包鲜纸分好一次份量（今次存左4份），放入膠盒雪藏。要食個陣係冰櫃攞出黎直接落滾水渌熟就得，好方便呢！

 

是日晚餐：净雲吞，雖然無充满梘水既爽口生麵，我都照樣落左大红浙醋伴食，好滿足的COMFORT FOOD！

 

低成本，大制作！

 
諗都無諗就浸左半包黄豆 ~ 今次用半包，仲有半包留返下次用[懶醒...]。

 
一夜過後，D豆真的發大左兩倍，根據食譜指引，D豆READY啦！

 
一份豆就加三份水用攪拌機打爛。。。

 
打爛之後我就用SIEVE過一次。

 
D豆渣就放埋一邊等埋一齊先用布再搾。

[呢個傻婆仲未知大鑊。。。]

打左唔知幾多次攪拌機。。。终於打晒D豆，已經有半煲咁多。於是開始用布搾埋D豆渣。我其實手力好差，就算扭毛巾都扭到滴晒水比人閙，所以要扭呢盤豆渣真係好辛苦。

話雖如此，煲生豆漿最後都有個煲8成满。

[開始有D担心，好似整得多得濟。。。但已經洗濕左個頭，點都要繼續整埋佢，見步行步啦！]
食譜話要再一份生豆漿加三份水煮熟就成為豆漿。吓。。。再一開三？

唯有揾埋全屋最大個個真空煲出黎，量左15份生豆漿，但我剩係加左30份水，煮左一輪，终於整好一大煲豆漿。（我估計最少有5公升!）

仲有一半生豆漿未煮，全屋又得我一個飲。。。唯有停工+投籃。。。

個豆漿好飲架，但畢竟係寒凉野，我都唔敢飲好多，兩日後D豆漿都變味啦，好無奈地又要浪費。。。

今次教訓：成本雖然係少少90p，但都要一番勞力先有得飲，最慘係最终都要浪費好多，現今世界咁多飢荒，真係罪過罪過。。。呀C9，請你以後不要忘記用腦呀！