Monday 27 April 2009

I'm 16 going on 17...Big Baby/Little Man

嘩! 過多個零月,卡樂B就差不多一歲半大LOR: 呢個年紀,真係話大唔大,話細唔細...我就覺得佢而家係時大時細...

卡樂B呢個BIG BABY到而家見到樽奶都仲會發哂狂,換片慢少少都會喊到出哂眼水,要樽奶到口先收聲,有時飲左成樽都唔夠,無奶都仲繼續啜,啜唔到又喊...好似我虐待佢,無得比佢飲咁...[艾先生話搵日VIDEO佢,等佢大個睇番笑下佢都好!]

食固體食物方面: 因為近來我煲粥水準差左,落水落得唔準,攪到粥仔變飯仔.所以都叫做開始食飯仔架啦!但係佢都仲係飯來張口型,比匙羹佢就淨係攞黎玩.食香蕉就勁鍾意食香蕉蓉,比一隻佢咬就食兩啖就收工...

佢自己呢? 就當正自己係大人咁滯...

喺廚房: 非常鍾意開廚櫃攞哂D碗碗碟碟出黎,但某日竟然比我見到佢攞住一個佢自己攞左出黎玩亂放左喺另一個架嘅杯返番入個櫃,做嘅時候仲手法純熟,好似我地D大人洗完碗收返埋一樣,做完就好自然咁閂好門,走開繼續去玩.我當時呆左,唔知講乜好...

由於佢高左嘅關係,佢已經可以開埋放刀叉嘅櫃桶,實在太危險...所以艾先生終於裝左扣鎖緊D櫃門,櫃桶,卡樂B無得再玩收拾碗碟LU!

喺客廳: 換片之後,佢會攞張換片墊,擺番去梳化後面,因為個位窄,張換片墊又長,所以未成功住. 佢又會試擺番好D CD/DVD,但未識排高矮肥瘦,所以都仲係要幫佢執首尾.

但奇怪嘅係:仲未見佢有意識收拾玩具BOR!

瞓覺又點呀? 暗佢瞓個陣,佢會手指指叫我熄燈! 瞓醒起身見到個BABY MONITOR未SWITCHED OFF,佢又會手指指提我,落到廳又手指指提我SWITCHED OFF同擺番好個SPEAKER ~認真BOSSY.

有時佢仲好蠱惑添...

先排佢唔舒服,有幾晚瞓得麻麻地,我唯有比佢同我一齊瞓,點知佢而家瞓慣左有鋪癮...有一晚又唔肯自己瞓,我一抱佢上大床,佢竟然陰陰嘴係度奸笑...

上星期日同佢去教堂望彌撒,今次4,5個小朋友同佢地嘅爸爸媽媽都喺小朋友專區,所以D小朋友都你追我逐,好不熱鬧!玩玩下小休大家就要食D小食,飲下水咁啦.有個爸爸攞左包"卜卜脆"出黎,卡樂B竟然走埋去想攞黎食,我及時叫一叫佢,佢停左手,個爸爸都遞過黎叫卡樂B一齊食,但卡樂B就即刻扮哂怕羞,唔敢攞...然後拉我隻手去幫佢攞...

最後...今日好開心呀! 同卡樂B返醫院做例行檢查,佢好乖呀,見到護士,一D都無扭計,任由我地同佢剝光豬磅重度高 [佢而家嘅身高係82.5CM,體重係10.71KG]. 見到醫生就若無其事咁繼續玩,仲表現行黎行去比醫生睇! 醫生最後嘅評語係:體重正常 (我就覺得佢手仔瘦左D LOR...但醫生話佢嘅WEIGHT GAIN都仲係跟住佢原本個條生長線,未有減慢,所以無問題),身高就有向上趨勢,行得走得又玩得,各方面嘅發展都追得住同齡嘅足月BB,所以後唔洗再去醫院見醫生LOR...安樂哂!!!

艾先生最後帶左我地去麥當當食早餐,卡樂B食左少少豬柳漢堡以示慶祝咁啦!

等見醫生個陣都扮哂大個仔,乖乖坐定定塗鴉...


Sunday 26 April 2009

假期大快活: DAY 3 ~ THORNTON RESERVOIR

假期最後一日,我地決定揾個近近地嘅地方行下...諗起2年幾前偶然經過,成日話揾日再嚟睇睇而始終都未有機會再去嘅THORNTON RESERVOIR,於是PACK好三文治,生果,小食就出發!

我地住呢頭以前有好多採礦工業,個礦唔再生產,間公司就要做返D環境保育工作,所以好多時就會將採礦整出黎個大窿放番滿水做魚塘,四圍就整D步行/緩跑徑,野餐檯比人去行下,HEA下...
 
呢個係當日路經嘅另外一個大水塘,以前都有黎呢度餵下鴨仔,天鵝. 不過今次去D鴨仔,天鵝唔知去哂邊,一隻都無見到...

 
攞個牌就可以喺度釣魚:可以喺岸邊用魚杆釣,就咁FING條魚絲出去釣又得

 
租隻艇仔出去釣都得


呢位仁兄就用左混合式:自己親身落水行出去釣,雖然佢有著賣魚佬膠褲,但我睇見都戥佢寒...



我地就無時間同耐性等D魚上釣啦,只係圍住水塘行下,一路行...



一路影下相...



間中比隻馬騮攔途截劫要揾下野食...



玩下...



終於用左差不多2個鐘行左一圈~全程2.5英哩嘅路程[對我地黎講簡直係一大創舉]

臨走先醒起...出去玩左咁多日,都冇影過一張全家福添...C'mon, say 'Cheers...'



就係咁...假期大快活話咁快就過去左,要等5月,8月嘅BANK HOLIDAY先可以再出動LU...

Wednesday 22 April 2009

假期大快活: DAY 1 ~ PLAY CENTER

由於卡樂B抱恙,拖下拖下成個星期先慢慢步向康復,所以等到而家先有時間同心情講呢個假期嘅活動.

平時,我地一家三口嘅集體戶外活動唔多.不過卡樂B都大個左咁多,我唔想佢日日屈係間屋對住四幅牆(同埋電視!),所以未正式踏入假期,我已經準備要多D帶卡樂B到外邊走走,第一站就係動物園LOR,當日大家都玩得好開心.

放假第一日,有朋友問我地去唔去PLAY CENTER玩,卡樂B未去過,咁我地又跟埋去見識下咁LOR!
假期關係,間大嘅PLAY CENTER多人到想揾張吉檯(比大人坐係度等D小朋友去玩)都無,我地唯有轉移陣地去對面街一間附屬係PUB嘅,又細頗多嘅MINI PLAY CENTER.卡樂B就無所謂...朋友D仔仔女女就有少少唔開心~因為走動地方少好多嘛!不過一到埞,咪又係照樣玩到癲哂...

卡樂B一向都慢熱,去到新環境又係要黐實我視察四週環境,我見波波池最近,就擺佢落去等佢FEEL下,佢個樣好不知所措呀,仲嘴扁扁想喊添. 於是我唯有抱返佢出黎,如果一次就嚇怕,有童年陰影...以後都唔敢玩波波池咪仲敝?

見大樓梯同"木人行"個邊好似靜D,我就帶佢過去行下,過到去佢就扒喺樓梯口阻塞交通...
 
中場休息後,佢開始無咁怕羞,肯比同埋一齊去個FRIEND陪佢玩,仲越玩越開心添

開心到震!!!連呀媽喺邊度都唔理LU...

一開心就失儀啦~口水怪魔

仲心思思瞄住個波波池添...

呢個係波波池,唔係金魚池呀!

終於再次下海,品嘗紅波,藍波,綠波...

...夠啦!真係好驚佢做清潔,舔晒D菌落肚...