Tuesday 29 June 2010

吓...又種野?

舊年,除左食過幾餐油麥菜外,連颇粗生既向日葵都死係我手上...今年本來都無打算種野啦. 不過公公同婆婆黎玩, PAPI話驚公公悶,公公又鍾意種野,不如同公公去園藝舖睇下有乜花苗買D返黎佢打理下,過下日神啦!

去到園藝舖任揀,结過揀左两棵,卡樂B仲懶係幫手咁種左落地.


原來唔係花,係蕃茄! 公公話種左有得食,真醒目!
 
一個半月前買返黎既苗有咁大.

 
一個半月後既今日有幾大?


大呢棵比卡樂B仲要高呀!



高有乜用? 最緊要有無得食先?

哈哈...好得意! 矮呢棵VINE TOMATOES好早就開花,而家仲有十幾粒蕃茄仔大緊添!



高呢棵花就出左好耐,呢幾日先開始榭,榭左都要成個星期先會見到蕃茄仔.


 
另外,公公又落左D魚翅瓜種子,第一批唔多成功,再落一批竟然比虫食! 公公除左幾日虫,又放左個圍欄等D虫唔可以爬近,一路D苗都好似無大過一樣...但係前幾日開始D葉好似突然間大得好快,日日都唔同樣!


應該都可以生继續生長,但而家已經係6月尾,可能等唔到收成就凍.而家都未知今年會唔會享受到自家種植既成果...


Saturday 26 June 2010

一生人一次

卡樂B一生人一次的水痘都算來得早,全靠那天跟朋友一家飲茶,朋友的细仔正值是剛剛發了幾粒的潛伏期,倆個小朋友你追我逐左半個小時,雖然之後都再無時間正式安排一個"水痘派對",但两星期後一早起身就見到卡樂B身上初出的幾粒水痘啦!

超緊張既PAPI即刻打電話约見瞖生,雖然係懐疑個案,慎重起見,我地都通知左診所,姑娘叫我地到達診所時再題醒掛號處安排我地同其他病人分隔開,到埗後,我同卡樂B就留係車度等,一叫名就直入診症室。

唔係卡樂B既FAVORITE DOCTOR,但都無緊要啦,D病徴咁明顯,邊個睇都一樣啦,但卡樂B就失望左D囉。。。

醫生話照睇都八成係水痘啦,不過如果跟住個日再多D就百分百肯定係啦!因為有微燒同埋D水痘會痕,醫生開左退燒水,止敏感痕癢水同LOTION,吩咐我地比多D水卡樂B飲就走得!

D媽咪朋友都講左,小朋友出水痘,第2/3日會出得最多最辛苦,雖然都已經有呢個心理準備。。。但MAMI個心都仲希望卡樂B係幸運D既一個,係咁意出10零粒就算啦

第2日起身一CHECK,多左10零粒,好!

第3日先到戲肉,出多左好多,仲出埋晒係D好”吊轉“既位置:耳殼,頭皮,手指節,掌心,PATPAT,就連眼皮下都有。。。

夜晚都得唔好,成晚好似打仗一樣轉來轉去,一時打横,一時打直,有時仲成個坐左係度,MAMI唯有幫佢掃背脊,等佢舒服少少...

呢個两嵗半既小男孩都好有MAMI硬頸同死忍既性格,所以都唔多見到抓痕,只不過耐不耐會缩缩膊頭,用背脊揩下墻,用手撥下塊面。。。我地想佢舒服D,就梗係要定時幫佢搽药膏,餵药水啦,但唔係次次都成功架!有時要話醫生讃叻仔,要搽靚靚CREAM,有時就要當佢係大人

佢講道理,有時都要用少少武力先得。

第4日已經無再發燒,夜晚都訓得好左。

到第5日就明顯見到D水痘有减弱跡象,水泡退水退得好快,開始结痂。

一有好轉,呢個小朋友就唔肯食药搽药膏啦,我就唯有繼續MONITOR住康復進度,有乜唔對路就再落药,好彩。。。都無發現變數。

不過呢個结痂階段似乎仲痕過生水泡,卡樂B都有D想抓,又會使我隻手幫佢抓。如果係呢個時候手多多攪D痂就會留低斑印,所以同佢冲凉都要特别小心,唔好手重重擦左D未成熟既痂,唔係就功虧一簣。。。

順帶一提,中國人治病好多時都有好多禁忌,料理水痘呢件人生大事就更加無例外,PAPI又會耍D'西式'料理出黎,我地就雙管齊下樣樣用D,總之大家HAPPY就係啦。。。
  • 我地中國人話出水痘唔好吹風,PAPI話覺得新鲜空氣對乜病都好,所以出花園玩唔係問题。[好彩!比我諗到當日好太陽,好熱,如果卡樂B玩到一身汗醃到D水痘會更加唔舒服呢個理由唔放卡樂B出去。]
  • 有AUNTIE教要戒食煎炸熱氣食物,PAPI話卡樂B病咁辛苦又無胃口要整D佢鍾意既野食比佢,SPOIL下佢先得![结果有一日午餐卡樂B食左5條FISH FINGERS!]
  • 婆婆話出水痘唔好冲凉!呢樣我同PAPI都覺得唔可行:有發燒要降温,而且成日要搽药膏,唔冲凉點得?所以冲凉好緊要要做![跟據家中過來人既經驗/提醒,我地用微暖水同卡樂B冲凉,舒服到佢次次都唔肯起身!]
  • PAPI同一個中國人提起卡樂B既水痘,呢個人既ADVICE係唔可以食猪肉,話食左會留低D斑印。但又有人教我話蒸猪肉清清地包保唔食壞人![卡樂B呢期好鍾意食燒排骨,我照常整比佢食。]
總算有驚無險,過多幾個星期等D痂同斑印淡化,我地一家就可以永别水痘啦

水痘期間,PAPI唔准我同卡樂B影相,點得架?我照樣偷偷地影,卡樂B都竟然好似知道一樣,一見部相機對住佢就。。。

 

Monday 21 June 2010

價架大比拼

我地成日都話呢度物價貴,但係根據公公婆婆呢倆位格價專員既不全面RESEARCH,SAMPLE RESULT好多都顯示左個令人意外既结果,我地大家一齊睇睇:
  • 我家銷路最高食品之一: 方飽/多士


一條重900g (约兩磅重),賣£1.29,而家成日做特價£2/2條,£3/3條,每條£1,即50p (HK$6/1磅),公公話香港美心麵飽賣HK$12一包,得8塊,仲一磅都唔够!
  • 三花牌淡奶


以前喺香港冲奶茶,食啫喱必落,公公婆婆而家都仲係用呢隻奶開奶茶,煮麥皮,所以對呢隻奶價錢好熟悉:细罐裝 HK$7.X 大罐裝HK$12.X,我地呢度賣幾錢?平日36p细罐,格價當日做緊特價: £1/3罐!
  • 很攻鼻的老牌英國芥辣


某日同公公婆婆行超市買餸,購物車上放左一樽 ~ 卡樂B!唔可以亂放野落車仔...公公即刻過來解釋佢想帶一樽返香港,原來香港賣细樽裝都成HK$12,呢個大樽裝如果有得賣起碼要20蚊,我地呢度大樽裝賣1镑都唔洗!
  • 呢樣野呢...


真係平過香港好多,红罐装係6個月到一歲,一歲以上既TODDLER MILK 900G一罐一般賣£7.25(唔洗HK$100一罐),仲時時都有特價賣£6,甚至半價都做過!
點解咁平?我地呢度無内地人搶購潮嘛!再者,呢度好推廣BB頭六個月用母乳餵哺,一歲就轉飲鮮牛奶,所以呢D過渡期產品如果唔賣得平好難揾定班客仔啦!抵就抵,不過而家就連卡樂B都無缘消受啦!
  • 其實呢度好多時買野一次買多D就有特價優惠,好似以下呢D公公婆婆帶返香港既手信:
瑞士卷/蛋糕每條賣£1.7-1.9,買两條就一口價£2.5-3/2條;
成尺長既家庭装克力架只售79p;
最值得買既就係背景個盒我地好鍾意食既比利時朱古力雜餠,一盒£5.49,買两盒就£6!雖然要帶返香港好掗行李位,但公公婆婆都一口氣買左4盒!臨走個日想買多两盒放手提行李都無貨啦!



有時呢度D野平起黎真係連平日精打细算既公公婆婆都抵受唔住,買到唔停得手! LAST MINUTE都仲走去超市抬埋呢D黑森林火腿返黎...MAMI就要開返個谷到爆既行李箱逼埋佢地入去

其實呢幾年人民幣不斷升值,D内地供港糧食都貴左好多.英鎊呢年來都相當疲弱,攞住港銀過來真係好好洗(相反地...我地返香港就貴好多啦...)所以,想黎呢度玩既朋友就趁要機會啦!


Sunday 6 June 2010

RIVERSIDE FESTIVAL

一到夏天,英國各地都會舉辦嘉年華會MARKETS/FAIRS比人去玩下,我地住呢度每年都有加勒比嘉年華,同志嘉年華,夏日音樂SUNDAE嘉年華等等,今個週六都可算天公造美,我就带公公婆婆同卡樂B參觀左RIVERSIDE FESTIVAL.

流經市中心既一段運河/河岸就係主要塲地

 
請大家繼續向前行就見到啦!                            

 
以運河作爲嘉年華主要塲地,係運河上行走既LONGBOAT當然係重要主角啦!呢D船有私人自住嘅,好多都會養隻狗睇住條船.

 
有改装成餐廳/咖啡吧/游覽船

 
仲有書店                                                                    

 
有興趣既又可以佈置好隻船參加選美






又有唔少人比幾鎊銀玩下獨木舟,激流小艇,不過運河水好似唔多清,咪攪我...       



嘉年華另一部份就係公園舉行,有樂隊表演助興,有慈善團軆小賣籌歀,各類餐飮小食檔,仲有有兒童游樂區.
 
其實卡樂B 咁大個仔都未坐過呢D RIDES架,不過今次一去到兒童游樂區佢就鎖緊目標向咖啡杯走過去...

 
呀仔,咖啡杯會FING暈你架,不如坐小火車吧啦 ...開車啦!卡樂B好開心係度扭呔                                                          

 
扭扭下,圖中嘅看檔呀嬸停左部機,話卡樂B成日想倾個身出車好危險,叫我踎埋上去扶住佢,我要缩係内圈,轉左幾個圈,勁頭暈呀!對眼望遠望近都唔舒服,差D想嘔咁濟,好彩...终于挨畢全程!

 
之後,卡樂B又走去D檔口玩下積木,四圍跑下...又够鐘返屋企食飯啦!
                                                    


第二日嘅節目有扒艇比賽,情况更加熱閙,不過天氣就唔多好,一落起雨黎真係無地方避雨,我地都已經叫做參觀過呢個嘉年華會,大家都唔想冒呢個險LU,有機會嘅話就明年再見

Friday 4 June 2010

我的午餐便當

雖然唔係餐餐九大簋,但每日晚飯都两大碟,我做包尾大班都清唔晒,好彩我有好多野都好恨食,難得有人煮埋,同一樣野連食两餐绝對無問題,所以呢两日返工我都有自家制便當
 
呢個係琴日既便當:白灼西蘭花+XX燜腩仔

 
XX未處理之前係咁樣嘅,估唔估到係乜野呢


答案:碌柚皮

來源:公公開左碌柚,留起個皮,浸清D苦澀味,晒亁保存,寄過黎嘅. 我未試過整,爲免出錯,我等公公黎到親自示範.

做法其實不太複雜,乾柚皮早一晚浸水,回復軟身,揸乾水就用少少油開鑊爆一爆,之後就加入蠔油,豉油或柱候醤燜,再加入已飛水/爆香嘅腩仔. 燜好就落埋預先炒香嘅蝦子撈均上碟.認真冶味呢

而家知道點處理D柚皮,我會趁公公返香港之前揾個新鮮碌柚試下整,成功嘅話我第日又可以自己整黎食啦