天有不測之風雲

已經係6月~夏天囉，但係呢度，呢個諗法未必啱架！

今日就成日都陰陰凉凉，中午去接卡樂B放學已經落左一塲大雨，到夜晚。。。

仲落雹呀！今次真係落得好勁，D雹都頗大粒呀！打落D窗度係彭彭聲架，幾驚會嘈醒卡樂B呀！

MAMI係厨房企左成10分鐘都未落完！去屋另一邊望下啦。。。嘩。。。直頭似落雪一樣！

落到咁上下，就傾盤大雨。PAPI放工返黎，話返到近屋企先係落雹，一路都只係大雨。

大雨過後，當堂凉返晒，PAPI話今晚既氣温會跌返到6度左右，明早會好清凉LU。。。



*     *     *     *     *

PAPI既飲食口味同呢度既天氣一樣的不可預測！

今晚MAMI見個茄子唔擺得，求其加D金菇同埋魚香茄子汁煮左黎食。李X記既魚香茄子汁真係好鹹好辣，MAMI落左半份，加左唔少糖都仲係頗辣。

MAMI都唔預PAPI會食啦！不過都話比佢聽整左呢味餸，試少少，唔鍾意既話，留返比MAMI聽日食。

點知。。。PAPI試左一口，就話係就係辣左D，但佢鍾意喎，仲真係清晒碟！