茄汁麵筋

MAMI成日都話住係呢個鬼地方，想食乜都要靠自己。。。

茄汁麵筋，即係齋舖既酸齋，近來見到有人分享食譜，又話唔難整，MAMI痴起條筋又跟住整囉！

用料/做法一個SCREEN SHOT就睇哂：


MAMI就補幾張相分享下過程啦！

搓好粉糰，放一小時，唔覺得粉糰有乜唔同。

跟住要開水洗粉糰，MAMI初初驚舊粉會散，原來係唔會嘅！

粉糰唔夠一個西柚咁大，MAMI剩係用單手'練'。'練'到盤水白色，倒水又注入新水繼續'練'。如是者，換左十幾次水，水開始清，粉糰都細舊左！

'練'夠就放入碗，封上保鮮紙，入雪櫃過一晚。呢個時候，粉糰得番墨盒仔咁大。攪成咁，MAMI其實都唔知係咪做得啱，過一晚先算啦。。。



第二日係雪櫃攞出黎，粉糰無乜變樣。切開左似齋雞多D喎。。。到左呢個階段，就算失敗，都要整埋最後既步驟，先會知道結局㗎！CARRY ON。。。

於是又好孤寒地開左少少油炸粉糰。

舊粉望落都幾SOLID，但炸炸下。。。就成舊漲起晒！似似地係豆腐舖買個D啦！

見有D粉糰好似大塊左D，MAMI又切細少少，炸多幾塊。



炸好！樣子可以接受啦！凉番身，用水洗洗，揸番D油出黎。

再開鑊，放入處理好既麵筋。屋企無醋，就咁用茄汁+砂糖做左個簡單既‘獻’。完成！



如此類推：加大粉糰份量，整埋蠔油汁+咖哩汁就可以食齊三款齋滷味。。。諗起[餐功夫]就和味了！

一入口，MAMI就忍唔住‘Hmmmm。。。。。’左一聲，卡樂B聽到就即刻入黎廚房命令MAMI唔准嘈！食到自己想食既，想讃歎一下都要比人話唔可以，呢個仔有時真係太過BOSSY架！但只要整到想食既，MAMI唔理LU。。。