自家出品的粽！

講左N年，今年终於動手！

公公婆婆係香港籌備今次探親行李時就問MAMI要唔要買定D料過黎包粽食。MAMI好鍾意鹹肉粽，但只係識食唔識包。咁。。。梗係要趁有機會偷偷師啦！

其實所有材料都可以係呢度買到啦！MAMI唯一要預備既係鹹鴨蛋。計好日子，40日前要入好樽。今次浸左23隻。

包粽前一日：浸軟/烚一烚D粽葉，然後用水浸住備用。開邊綠豆都要洗乾净，腩肉用五香粉醃好。

星期五MAMI湊左卡樂B返學就可以開工。

睇婆婆示範一次之後就到MAMI自己黎。。。


MAMI好雞手鴨脚呀！婆婆包3隻，MAMI先得一隻。


知唔知邊D係MAMI包，邊D係婆婆既出品呢？

買糯米時仲擔心大包得濟，原來用晒2公斤/3斤幾米，2個鐘時間，制作左25隻粽。

今次因為要烚粽，特别買左一個大煲，用埋個百搭LC煲，分兩個煲一次烚晒！


一路烚一路要CHECK住水位，烚乾水就全功盡癈啦。所以每半個鐘/9個字就加D水入煲，4個鐘後。。。出爐啦。。。


MAMI初初學師，包得唔够實，爆口個D就係MAMI既出品囉。

攪左差不多一日，即刻開隻試試味！


Hmmm。。。公公怕比MAMI話調味調得鹹，糯米淡味左D。MAMI就怕猪腩太肥，揀左盤瘦既，但蒸出黎太瘦，唔够香口。自家醃既蛋黄就好PERFECT。以後可以唔洗係外邊買個D又貴又唔好食既粽啦！

送左一半既粽比朋友，仲有存貨放冰櫃慢慢食。有時間的話，希望可以趁公公婆婆回港前再包多次，PRACTICE MAKES PERFECT嘛！