博物館遊踪：GUILDHALL

寫左NEWARKE HOUSE MUSEUM先醒起幾個月前參觀過GUILDHALL，本來打算行多幾間先出一次過寫埋。趁手同大家介绍埋GUILDHALL啦！

*     *     *     *     *

一睇就知道呢個歷史建築物既珍貴之處就係個以木為主骨架结構既建築風格。主要部份大既有600年歷史，有部份仲係14世紀就已經存在！係一级受保護古迹，除左定期维修保養之外，大家都休想可以做任何装修，改建，清拆工程 。

GUILDHALL當年係一班有政治/宗教背景既人士起既，用途就係為大家聯誼，款宴，攪FUNCTION提供塲地，亦有用作為法庭/表演塲地。後來，GUILDHALL仲有被用作市長/政府機構辦公室甚至警署！到19世紀末期，新既市長辦公室建成，GUILDHALL就功成身退，變成歷史文物！

内園有收集雨水既大桶，鐘，同扭地拖用既窿！



MAYOR'S PARLOUR：15世紀既STAINED GLASS好多已經剝落，但介绍就話D圖象好多都係同耕作有關既提示。呢個廳既牆鑲上橡木，好有氣派！



GREAT HALL (大殿？）：17世纪建成，有傳聞話沙翁都係呢度表演過架！



二樓係圖書館，仲有D舊既家私，儲物箱比大家望望!

又係细细地一間，展品一D都唔多！但呢個景點係睇建築物為主，加上多走動空間，MAMI同卡樂B都覺得唔錯呀！



非中餐晚餐

好耐無整非中餐晚餐!

今日一早預左整LAMB BURGER比卡樂B做晚餐，MAMI仲係度諗緊今晚食乜既時候，佢就已經坐定定歎飽飽！




麻麻地想煮飯，望下雪櫃，要清鬼佬節瓜，好耐無整FRITATA，今晚就做啦！

兩個鬼佬節瓜刨皮，切片。有時間既話：一羮盐TOSS均D瓜，等D瓜出咁D水，唔會煮先黎出水！[今日MAMI太懶，無做呢個STEP！]

洋葱一個切片。落鑊洒小許盐兜到略為上色留起備用。

落蒜頭爆香，續小批鬼佬節瓜落鑊略為煎軟/上色，留起備用。[MAMI今日一鑊過，亂兜幾下就算，懶呀嘛！]

3隻雞蛋打均。等D洋葱/瓜涼少少就加入去蛋漿度，拌均，落盐/胡椒調味。

開慢火，成盤倒入平底鑊，慢火煎到個底成餅状。

另預熱GRILL，係蛋餅上放上蕃茄片，芝士。GRILL到芝士溶化/成金黄色就攪掂！



左邊呢個係MAMI今日晚餐+明日午餐。右邊PAPI呢個就比較燶左D。



整好左，一向唔好蛋既卡樂B又賣口乖話SMELLS REALLY NICE，不過都好比面咁食左幾啖！

博物館遊踪：NEWARKE HOUSE MUSEUM

一直都想同卡樂B行下呢間博物館，终於去到！

博物館係由兩間16世紀建成既屋改建而成。館内唔同地方都會見到建築物既原來特色:



16世紀既STAINED GLASS：



花園都保留左一隻17世紀既大閘門。



有一條小街，兩旁係商店。比大家見識下大戰時既生活係點既。



打仗都要食架，入雜貨舖上貨。



要收料，屋企無收音機，入PUBLIC HOUSE[即係PUB！]同D街坊8下啦！



有賣女红既舖頭。



舖頭仔仲附設摩登超市小賣部，卡樂B當正自己係老板，坐正櫃檯之餘又落手落脚打點一切，過足老板瘾!



50/70年代既客廳：



嘩！原來D皇室喜慶特别版餅乾罐/茶杯係咁有傳统既？1953年英女皇登基都有出過呀！



卡樂B最鍾意既展室，當然係玩具房啦！跳下飛機，玩拼圖，連JACK IN THE BOX都玩埋！



MAMI都見到唔少得意野：MICKEY/MINNIE FLASH CARDS, 當年好流行既積木（不過唔係A貨LEGO!),上錬鐡皮人力車。

德國既套手PUPPET同南美既公仔造型就比較嚇人啦！



博物館既上層係介绍我城步兵團既小型博物館，展出左大戰時期既行軍装備，被俘擄戰夫既物品等等。全靠卡樂Ｂ手多多，我地揾到更加多勛章原來係收左係櫃桶入面呀！



館仔細細，但都幾多野睇，卡樂Ｂ呢個年紀黎玩都唔會話太大間，行得太耐／悶親。過一排再黎參觀過都幾好呀！

一人煲仔飯

同卡樂B出城順便食午餐，猛話要食沙律，點知送到黎就剩係食左幾塊菜葉，幾片燈籠椒。

够鐘同PAPI滙合，PAPI一問就話肚餓！PAPI話MAMI唔揾D PROPER LUNCH比個仔食！卡樂B係車度就猛叫：‘GIVE ME SOME PROPER LUNCH PLEASE！’

於是3點半鐘開餐 ~  麥當當！

到準備晚飯時間，卡樂B都仲哎緊‘飽飽！’

呢個仔唔迫得，唔食就罷！MAMI横掂都要清餸，一於自己煮/自己食！

*     *     *     *     *

唔洗預卡樂B，MAMI就費事煮一大煲飯。啱啱又醃好幾隻雞翼整北菇蒸雞（+倉底豆腐卜）。。。咁整煲仔飯就FIT晒！

量好米，洗洗，跟一份米/兩份水既比例落煲。

差不多乾晒水就排晒D餸上飯面。中慢火焗15分鐘左右，落葱，再慢火焗多一陣。
餸多過飯，攞開D餸再CHECK下D飯。。。



今次撞手神撞得算OK呀！D飯唔濕身，煲底都係有少少焦，淋上甜豉油。即刻開飯！

變本加厲

自從諗到辦法整蒸排骨之後。。。

念念不忘，

食過番尋味，

已經再整過2次。

蒜蓉豆豉咁冶味，

唔想晒左D汁。

第二次整既時候MAMI就加埋豆腐卜墊碟/索汁。

好味道到無朋友。

多得BLOG友提醒：鳯爪排骨WOR！

今日去中國超市又撞見到。。。

於是今日晚餐/聽日午餐/聽日晚餐係：

一連3餐之後。。。

想信有一段時間MAMI都唔會再恨食排骨住LU。。。

又熬火車

MAMI懷疑全屋最鍾意坐火車個個其實唔係自己，係某人。。。

前幾日某人又重施故技：揾日同卡樂Ｂ去坐邊度個架火車囉！。。。蒸氣架！。。。火車又有餐卡，不過Ｄ餐好似唔平。。。

MAMI：PAPI! 可以買票剩係搭火車，唔洗食餐都得架嘛！等我上網CHECK下啦！

就係咁，我地又玩左一次火車旅程。

去既係GREAT CENTRAL RAILWAY。跟據網站介绍呢段歷史鐡路都幾巴閉架！

• 全世界頭50個鐡路旅程中排行第12位。[Erh。。。唔知係跟乜標準排出黎，我坐完都揾唔到解釋]
• 全英國唯一一條以雙軌行走既主杆歷史鐡路（即係可以見到上下行對頭車！）

車站保留住D古舊氣息。



落到月台就見到火車頭埋緊站同車卡會合，駕駛員就已經就位睇住個爐，CHECK住幾時要加碳。車底/烟通不時都有蒸氣噴出黎。火車一路行，一路燒住煤，除左有陣味之外，D煤灰仲會
順勢飛埋入車卡，好得意/好有FEEL！



全長8里，4個站，可以買一張DAY TICKET由朝早第一班車坐到尾班（大概可以來回5次咁多啦！），想RELAX D，可以坐一個站，落車去CAFE飲杯茶/食件餅，唔係又可以就咁坐係月台等下一班車（一個鐘咁多啦）再上車繼續旅程。

有D人就連火車都唔坐，開自己架車黎車站/擺好檔口晒下太陽/HEA下，有火車過就行黎望下，影下相。



車箱都係用返D舊車卡。座位比電氣化火車寬敞好多，就算搭檯都唔洗坐到撞到對面膝頭哥！呢班車有GRIDDLE CAR，即係有熱食供應，但餐卡設計就。。。舊式暖氣既COVER都好靚呀！



停站時，有對頭火車埋站。呢班車主要係做火車午餐既（即係PAPI話唔平個種）。望過去。。。有成6/7個餐卡，坐滿添架！大部份既客人都已經用膳完畢，但餐卡既擺設/氣氛，都真係幾吸引。車尾個卡仲係大房設計，開PARTY攪慶祝聚會最PERFECT! 卡樂B，唔該唔好扮食完火車餐落車啦！



成日掛住食，咁途風景又如何？有田有湖咁啦。。。



來回一個鐘，係車上有乜娱樂活動呢？

玩擺對脚上檯：曳曳！比車長見到罰你錢！


玩幫DADDY戴帽。



玩搣鼻哥！



玩BOBO: DADDY既手指人叫BOBO，今日BOBO行左出黎，點知DADDY話扔左BOBO出火車，卡樂B扁扁下嘴，跟住就喊到唔停得，DADDY氹左好耐先無事！



就埋站，影返張想留念先 ~ CHEERS！

繼續食鴨！

琴日焗左兩隻鴨腿做CRISPY DUCK，艾先生話减肥唔食，MAMI同卡樂B食左一隻，剩返一隻，今日要消滅埋佢！

哈哈哈。。。係厨房揾到罐頭雪菜同清雞湯。。。。。。雪菜火鴨絲炆米？

切緊鴨肉個陣醒起。。。仲有隔夜飯要清呀! 點算？唔食炆米囉。

是日晚餐：雪菜火鴨絲湯飯！

雪菜開罐後用水洗洗去鹹味，雪菜/火鴨切絲。

火鴨絲略炒加熱，加入雪菜兜均，加入清雞湯/隔夜飯，中火返滾3-4分鐘，攪掂！



落少少湯落卡樂B羹白飯度，卡樂B話VERY NICE，食左好多啖。但係問卡樂B試唔試下MAMI 既湯飯，佢就話YUCK。。。MAMI唔明有乜分别囉

自制CRISPY DUCK

我家兩個男人都鐘意呢個呃鬼佬中國菜。我地通常會買READY-MADE既返屋企整，買半隻就多得濟，1/4隻就唔够食！艾先生就次次都話唔够PANCAKES，唔够鴨醬！

其實。。。自己整都唔難。

呢度超市都有鴨賣，我地人少，可以剩買鴨胸，今次我揀左2隻鴨腿。另外就要有PANCAKES, 青葱，青瓜，北京鴨醬。

係D肉度用刀介幾下，落少少燒酒/豉油醃一陣。MAMI唔知點樣D皮先會色水靚又卜卜脆，於是就係入爐前一隻搽左D鴨醬，另一隻就等到差不多焗好既時候搽蜜糖。



鴨腿入左爐，就趁空檔將青葱/青瓜切絲。



鴨腿都出唔少油，焗焗下就攞返出黎倒油。焗好就攞出黎擺埋一邊，等兩條腿可以攤抖一下。[實驗證明：落蜜糖既皮焗得好靚，落鴨醬就‘黑盟盟’]



涼返少少就拆肉上碟，蒸熱PANCAKES就開餐! 卡樂B話想幫MAMI手包埋一份，不過佢好怕污
糟，所以摸左一下就收手，但今餐係食左3包既！



酒樓整既，通常係香酥鴨，五香粉味重，皮係脆D，但肉乾。MAMI覺得自己整好食D，基本上個鴨醬够晒味，隻鴨唔需要額外調味。肉又唔會乾得濟。

但記住！唔好將呢個餸既食味同北京填鴨比較，咁就會覺得耐不耐食一次，幾得意呀！

補充：鴨酱係咁樣既，但我想係呃鬼佬野，香港未必有得賣！