今晚既主角係。。。

今晚食乜餸？

都有3餸架：鬼佬節瓜炒木耳/红蘿蔔絲，燒排骨 ，仲有個碟呢？

哈哈。。。估唔估到係乜？

貼士如下：

材料：猪腩肉/蒜頭/豆豉//薑茸。[鍾意辣可以加埋辣椒]

做法：猪肉洗乾浄，抹乾水就落鑊爆香。蒜頭/豆豉又係落鑊爆香。猪肉放入蒸砵，鋪上爆香左既蒜頭/豆豉/薑茸。大火蒸1小時，熄火焗個零鐘。

蒸同焗呢個步驟要重複幾次，所以分幾日做方便D。

4日後，TA DA。。。

呢個係客家菜~豆豉猪肉砵！[多得BLOG友既介绍，我先知道有呢個咁得意既菜式。]

問題：嘩！猪腩肉，個餸肥唔肥架？

我都揀盤瘦D既猪腩黎整。而且每晚蒸完攤凍放返入雪櫃，第二日攞出黎就會見到D 肥油凝固係面，我會執起呢D油先再蒸。

如果無肥肉，D肉會越蒸越乾，‘鞋’晒口，食個陣切返D肥肉唔食咪算囉！

D猪肉好淋，一夾就開，D豆豉都好好味，好送飯。

食食下呢個餸，我就諗：唔通豆豉鲮魚都係咁整既？

行維園

係英國，可能維多利亞女皇真係一個好好既女皇，好多城都有個公園係以VICTORIA黎命名。

呢幾日好有春回大地既感覺，我就同卡樂B去行左一個朝早。

平日開車都會經過，但上一次踏足應該係成5-6年前LU。。。不過景物無變！

公園既地標就係呢個第一次大戰纪念拱門，個幾支旗其實係用石打造，刮大風都唔會吹爛！

有時覺得同卡樂B行公園真係有D似去放狗咁，因為呢個小朋友好鍾意跑，一見到係草地就要不停跑一餐先開心。

肯揾位坐啦！~ 小食時段。

今日出黎既另一個目的係想睇櫻花，但可能仲未够暖，剩係見到D细细白白既桃花。下次再黎行過！

 

回程時候仲行埋博物館/美術館：真的是個博物館~地方不大，但樣樣都有D。

各大洲既動物/海洋生物標本。埃及古文化。遲D仲有恐龍館添呀！

油畫，啱啱有學校團體參觀，美術館SET UP左WORKSHOP比小朋友發揮下D美術天份。

同塲又有一個介绍一位曾經係呢度住過好耐，又對推廣牙買家音樂好有貢獻既音樂人LAUREL AITKEN。[小女子孤陋寡聞，唔參觀過呢個展覽都唔知有我城出過呢D勁人！]

參觀完畢，PAPI打電話黎話同我地一齊食LUNCH，飲茶去也。。。今天過得好好!

雞翼二味

人老啦！連續兩日都唔記得係冰箱攞定D叉燒出黎解凍，要拿拿臨諗第二樣餸做晚餐，真煩！


今日又唔記得左啦!於是又要煩艾先生兜超市一趟。。。

問卡樂B想食猪肉定雞翼，卡樂B話食雞翼，咁就容易啦！

永無失手既蜜糖雞翼一份

雖然燒得好靚，但卡樂B都唔係食左好多。。。唔通發燒/喉嚨發炎未清得晒？

ANYWAY，MAMI有少少厭唔想食燒雞翼，於是就試整左小小米桶既黑醋燒雞翼。

好彩係唐人超市見到樽迷你版鎮江香醋，屋企實在太多一樽樽未用得晒，而且厨櫃都爆滿啦！
唔係既話，我諗真係要等一排我先會買樽大既黎整。

雞翼拖拖水，烚定兩隻蛋就可以正式煮呢味餸：將所有材料/調味料放入煲，大火滾起收细火滾多15分鐘即成！超容易！

15分鐘D雞翼啱啱熟，好滑！酸酸甜甜，好送飯！

如果無猪肉食。。。

又到週末，慣例又係要不停煮煮煮。原因：1）要整定D存貨下個禮拜用；2）要消滅冰箱既舊貨；3）有野想食！

今個禮拜都係照舊醃好4舊柳梅肉，焗叉燒，焗好就入冰箱，食之前一晚攞返出黎解凍，煮碗甜豉油就係‘一味好餸’。

冰箱有MINCED PORK，第一樣要整既就係猪肉乾！好耐無食啦。。。

食譜係跟呢度既，不過就加大為300g 猪肉既份量，所以各樣調味就照跟原食譜 x 1.5。

好耐無整，覺得今次D肉乾唔够深色，但好彩都無損食味。

卡樂B第一次食，話VERY NICE，又肯同我SHARE。但食完飯佢問要小食我再比，佢就唔食啦！究竟佢鍾唔鍾意食呢？

整左猪肉乾，都仲有MINCED PORK剩低。又要揾D野整黎食埋佢先得！好想用黎蒸肉餅，但家中7成人都唔好蒸餸。MAMI今晚又唔想整多味。。。

於是奇瑪咖哩又再度登塲。

[中途既小插曲：屋企既洋葱竟然吽到出左芽，臨急臨忙又要撲去村口間超市買！
如果唔帶住卡樂B，來回半個鐘就掂。
帶住佢呢？行行下要睇下條河，行多一陣又話有鞋仔有沙，要去公園坐低清理，清理完又話要騎馬仔，打千秋。。。用足一個鐘先完成任務！]

卡樂B係咖哩同飯分開上，MAMI就係加左太陽蛋既大碗飯！

攪完晒晚飯，SUPERMOON就剛剛升上黎，同卡樂B賞左一陣月又够鐘，咁又一日。

而家有時間坐低，諗諗今日忙過D乜，整左乜食。MAMI先發覺：我地真係頗鍾意食猪肉，假若我地要去一個無猪肉食既地方生活，點算呢？

再黎抹茶紅豆蛋糕

每年生日都會收到OFFICE同事送既生日卡，壽星公/壽星婆通常會生日過後帶D SNACKS 返OFFICE作為道謝，我就趁機會試多次整呢個蛋糕 [食譜在此]。

上次整既係走綠茶版，今次终於買到綠茶粉，制成品應該比較似樣啦！

雖然個餅係低難度制作，但由於我懶懶閒之過，做起黎好趕呀！越趕時間就越多野攪！卡樂B見到我攞MIXING BOWL就拿拿聲去搬檯搬櫈入厨房準備幫手樣樣都話要自己黎。。。

一輪混戰之後，入得爐LU！

出爐。卡樂B就梗係想第一時間食返件啦！MAMI要好費唇舌解釋比卡樂B聽個蛋糕係MAMI整比同事食既。仲要應承第二日整過一個比佢先得！

同事都覺得個餅好新奇。雖然已經跟足食譜落1.5小匙綠茶粉，但我都係覺得唔够綠茶味。

今日卡樂B都不停問住MAMI佢個蛋糕係邊度。於是我就等佢訓左即刻開工整返個蛋糕比佢。一脚踢，唔洗10分鐘就攪好盤麵槳。今次我加多左綠茶粉既份量到差不多3小匙，麵槳都比第一盤深色。

但同原食譜比較，都仲好有分别。。。點解呢？

 

懶懶閒之過

星期一唔洗返工，朝早出城攪少少野，同卡樂B食埋個LUNCH就等柴可夫接返屋企。。。今日天氣算唔錯，暖暖地加上飯氣攻心就成3點幾先醒起今日原來要準備好多野：晚餐既焗薑汁蜜糖雞翼/麻婆茄子，又買左冬瓜燜豆腐卜，仲要整個餅！拿拿臨就要開工！

焗薑汁蜜糖雞翼係我成日都整既餸。最緊要係朝早記得攞定D雞翼出黎解凍，下午有個零鐘頭時間醃好就焗得！

份肉攪掂左就要諗個菜。買左茄子要食。早前又買左一包日本麻婆茄子汁，一於今晚整埋佢！

 

我唔識日文，但看圖都見到要加入少少肉類煮呢個菜，屋企既肉全部係冰櫃，唯一一樣可以即用既係今日係唐人超市買既炸魚條。

所以。。。呢味餸就摇身一變成為麻婆茄子炸魚條！

整呢兩樣餸既同時，我又整緊蛋糕，無端端點解要整蛋糕？整乜蛋糕呢？呢度有講。。。

ANYWAY，時間關係，一煮好兩個餸就要快快開飯，快快送卡樂B上房覺覺猪，然後我先有時間整埋最後一味：冬瓜燜豆腐卜，第二日既午餐同晚餐都有著落LU！

 

牛一

序幕：6點就比卡樂B叫醒，要飲奶, 飲左奶奶就生猛晒，唔肯再訓!

MAMI頭痛呀！卡樂B話KISS BETTER，錫左MAMI一啖就問係咪好左好多, 即係話：CAN YOU PLAY WITH ME NOW？MAMI要單起隻眼訓，單起隻眼同佢玩，挨到9點叫艾先生攞頭痛药，卡樂B話要餵MAMI食药，啪左兩粒药丸入MAMI口（無水），攪到我差D嘔！

早上：攪好卡樂B等佢落樓玩，MAMI就執房，執好房一落到黎，卡樂B就跑過黎同MAMI講：‘WE DON'T HAVE TO TELL YOU THAT YOU HAVE A BIRTHDAY...’

原來PAPI同卡樂B講買左卡比MAMI，但未寫好，要MAMI落樓後佢地先可以返上樓寫，又叫卡樂B唔好講比MAMI聽。。。不過卡樂B一D都唔識守秘密！

收到卡樂B張卡，我即時笑左出黎。。。

上面兩張分别係2008，2009送既，下面係今年既VERSION！

PAPI唔信我記得已經收過同一張卡兩次，所以我就去搜集証據囉，原來仲有更驚人既發現: 就連结婚週年纪念卡，心意卡都有收過同款兩次。。。              

PAPI話明年要去BULGARIA買卡，實唔會有買到重复WOR！

中午過後，出發去飲茶！

去到茶樓等左10分鐘先有位，一坐低卡樂B就猛叫‘I'M HUNGRY!’，即刻叫左兩碟野叫呀哥哥即上。

等待中。。。

今次呢餐，大致上水準不差！PAPI同卡樂B都鍾意芋角/乾炒叉河。本來煎壤三寳都好，但今次PAPI又話D蝦腥。鳳爪就當然係MAMI獨食架啦

 

食飽飽，PAPI話去買禮物，但又應承左買雪糕比卡樂B食，時間不足之下，買左雪糕車既軟雪糕比卡樂B，其實卡樂B恨左食雪糕車雪糕好耐，今次食得到非常開心。

 

晚上：食生日蛋糕。卡樂B負責吹爉燭。切餅。食餅。

 

最後食埋飲茶打包做晚餐就乖乖覺覺猪!

人大左，生日點攪作都唔重要啦！最緊要係見到卡樂B開心，MAMI就開心。。。