整左蘿蔔糕啦...

近呢拾幾年我都無攪過過年嘅傳統:未有頭家嘅時候,我一定外遊避年;有左頭家嘅時候就已經搬左過黎呢邊,無假放,如常返工,差D邊日係年初一都唔知!

係香港,我剩係做一樣賀年活動:食!係呢度,我就做恨食...

過去一年係網上識多左D都係住係呢度嘅朋友,好多時大家會講下整野食,上FACEBOOK/BLOG又擺晒D相出黎,做成左一個非常大嘅動力要自己郁手整埋一份...
 
於是我鼓起勇氣,整一底蘿蔔糕!

當日整好之後...我唔捨得食呀! 等左一日...[其實係同艾先生,卡樂B出左去預祝新年,情人節...]
 
終於兩日後試食...我的一人前份量...一次過無左1/3

 
食味又點?真係唔及媽咪D手勢...

唔怕! 我仲有蘿蔔!!加上我真係好鍾意食...我一定一定一定會再整,而且仲係好快就會再整!

重出江湖...

好多BLOG友都鍾意整下飽飽食,港式麵飽同呢度個D真係無得比!睇睇埋埋攪到我都要玩返下先開心!

呢部麵飽機係我係香港離開舊公司,結婚,移民公司送比我既禮物,所以已經有5年歷史啦,[一睇個樣咁無型無款就知啦...]

初初黎第一年我成日都有好好利用佢架,不過整親都係方飽 有工返之後就無時間玩呢部野LU,到卡樂B出左世,廚房又要執位比奶樽機,攪拌機等等,部麵飽機就比我地收到有咁埋得咁埋~封塵...

今日終於想玩整麵包,攞起本隨機附送既食譜就揀左一款加雞蛋整既方飽黎整.順便睇下部機有無封塵太耐而被廢武功,慢慢我就可以向港式麵飽進發

跟住步驟放晒D材料入機就得! 一路都聽到部機發出D攪拌聲BOR,應該無問題啦...過左10分鐘,部機發出左一串尖響 我入廚房一CHECK,部機出左一個ERROR MESSAGE 話 TEMPERATURE SENSOR ERROR...? D粉已經搓左成10分鐘,由頭開始過個CYCLE會唔會搓得多得濟架?

不過如果唔RESTART,舊粉點算? 所以我決定RESTART部機攪埋佢...差不多兩個鐘,經過兩次發酵,都未開始焗,盤飽都已經發到好高,望下個計時器,部機應該開始發熱焗飽啦!

再望下,我以為自己眼花,個計時器D字仔無晒嘅?熄機再開都係無反應,跟住仲發現全屋有一半以上插頭死左...唉...點解咁黑仔架,我又無方飽焗盤,唔通我要倒曬個粉團出黎,用手搓成'大豬'咁先入爐?

好彩...我未懵得晒!醒起攞返本MENU睇下有無講焗焗下斷電可以點做先.原來TROUBLE SHOOTING個SECTION真係有教呀!原來個盤係入得焗爐架,預熱返個大焗爐就可以繼續完成埋成個過程 [好奇怪...次次跳親制個焗爐都無事...]

由麵飽機TRANSFER去焗爐個陣個樣      

真真正正出爐啦 ~ 我記得我未試過焗到磅飽咁高

咦...原來入面有嶐嘅! 食落都算鬆軟,但好似無乜味道...太耐無整,要刨下D食譜先得,下次一定會有進步!

一盅兩件

住係呢個鬼地方，要一盅兩件談何容易．．．通常要食中國點心就要上茶樓，又唔係多機會上茶樓，一上到去又點會食兩件就走?

唯有係屋企ＤＩＹ啦．．．

唔洗讚我勁啦．．．因為我只係負責左其中一件．．．腸粉!

食譜既指示好簡短：開粉漿，蒸盤掃油，落粉漿，入微波爐，叮叮，卷好就完成．

實際上．．．我都整得頗為手忙腳亂

• 倒左粉漿入蒸盤，手震震咁抬蒸盤入爐 ~ 瀉到周圍污糟晒!
• 粉漿份量過多，入左爐之後粉漿會膨脹變厚 ~ 厚得濟唔熟!
• 叮得過火~ 變得好乾，卷唔起!

所以頭頭幾盤，通通投籃．．．

最後整到呢幾條我都已經比較餓，但求有Ｄ食下就草草收場ＬＵ，卡樂Ｂ就等到瞓埋，今次無緣試食．．．

揾日有時間又有心情我會再試整過! 至於燒賣，應該比腸粉容易做，不過都係要揾日有時間同買齊材料先得．．．