成功在望...腸粉

先後玩過幾次整腸粉,第一次有幾條食下...

 
第二次想整得認真D,好大陣仗地開晒蒸籠

 
不過結果好驚人...盤盤都粢到卷唔起,一盤衰左就要重新洗乾淨個盤先可以繼續實驗.雖然味道都係腸粉味,不過咁既樣點見人?

星期三心血來潮又想整...CHECK CHECK D 粉既存貨,勉強夠整啦,所以又開工睇下今次又整成點先.
 
材料份量同一般食譜介紹相差不大: 粘米粉135g, 澄麵粉15g, 水450ml, 生油1茶匙, 鹽小許,蔥粒/蝦米隨意.另備額外生油掃蒸盤用.

先係盤底掃油,攪返起D粉漿先倒落蒸盤,灑上蔥粒/蝦米就可以入爐.
 
今次用返微波爐叮,改用用中火力度(應該都有成800W),2分半鐘,出爐個陣係咁樣嘅

 
等到塊粉皮無咁熱,我就用刀仔刮起少少邊,然後用手卷起做成腸粉.

 
如是者...我一共整左7條,一盤都無嘥到

 
真係唔捨得食,所以攤到凍晒,終於到晚飯時候...煎腸粉!

 
本來可以XO醬炒腸粉,為左等卡樂B都可以試下,唯有煎腸粉點XO醬

留低左3條今晚燒夜食埋,D腸粉係雪櫃雪過,乾硬左好多,係鑊用慢火加水返熱,等D腸粉軟身返就可以加豉油,XO醬調繼續炒.

今次成績係3次以來最好一次,不過下次再整我會一塊粉皮卷2條腸粉,薄D會好食D同多D食,另外就係要整有料腸粉~不過一定會係叉燒腸囉!

生日/母親節週末...燒叉燒又整曲奇

今年MAMI既牛一係星期六,而母親節就緊接係星期日,我地安排左D外出活動,加上我逢週末/長假期都例牌手痕要整D野食下,攪到有D野想寫都未有時間BLOG, 仲比呢過週末既果醬,豬肉餅遲黎先上岸,趁住重記得補BLOG返先...

• 叉燒: 我諗呢個廣東燒味好多人都整過啦! 叉燒除左醃料,最重要係買到一份靓豬肉. 肥叉好食不過實在不健康,但全瘦又好'鞋',所以一D搭有少少肥既部份就最理想...

係超市見到去左骨既膊頭肉扒,有少少肥,而且切好晒,價錢又唔錯,於是買兩包試試.                            

前一晚就醃好晒D扒,入味D嘛...see you tomorrow!

一大清早就準備入爐!

出爐時係燒得過火左D,似黑炭頭...所以都係影D大特寫好D

一輪小手工剪返D黑炭出黎之後就好樣返D啦.

即日晚飯係叉燒油菜大碗飯.用叉燒燒汁撈飯,卡樂B都好棒場呀!

兩日後,再黎一個燜日本咖哩薯仔叉燒飯,好醒胃

叉燒真係好百搭既菜式,我一定會再整黎食!

• 牛油曲奇: 其實我從來都無整過曲奇架...朋友大力推介既呢個BASIC RECIPE又真係好易整: 牛油,糖,麵粉三樣材料就做到.

最大問題係要用電動打蛋器打到D牛油CREAMY...卡樂B一見我攞個盒出黎就已經喊到唔停得(好醜怪呀...)

停左一陣工,安頓好卡樂B我就鼠返入廚房再開工!今次因為有佢鍾意既兒歌陪住,每次RESTART隻歌仔我就可以有2分鐘時間開機. 如是者走左7/8次就打好牛油糖,落埋D麵粉就做成粉團,搓搓下就整左30幾個曲奇出黎.

入爐15分鐘D新鮮曲奇就出爐

好鬆化,好容易食到唔停得手.不過肯定高卡,少食為妙.

話雖如此...我琴日又整多左一次.我問卡樂B我可唔可以用MIXER,佢好快就話'NO'.我解釋比佢聽唔用MIXER整唔到曲奇,咁我可唔可以用,今次佢好面有難色,唔知點答我啦...

Mon Petit Déjeuner

Bonjour, Madame...et voilà!

做好自制果醬,就要嘆返個法式早餐...好好享受一下我辛勞既成果.

法式早餐點少得牛角飽? 某日經過超級市場牛油/餅皮櫃見到呢罐物體...新鮮出爐牛角飽BOR...襯晒我D果醬(又啱晒我呢D懶人)啦!

做法簡單,連包裝都會自動打開...

 

一拉開封條,個粉團就好似'米芝蓮'咁迫曬出黎.

當我頭大緊點樣切六個三角形既時候...用刀跟住D線CUT出黎就得啦...

 

話咁快就卷好6個飽,20分鐘就出爐.

評語:我鐘意牛角飽.不過我都怕太多牛油.但係呢D飽係唔夠牛油.

而且一睇就知,一D層次都無...

呢舊現成粉團好玩但同似樣少少既牛角飽比較都仲頗有距離...

整黎比卡樂B食都好,唔太油膩嘛.

 

最後,我都有用呢D飽黎試食我既自家制果醬:我就覺得D果醬比較甜左D,但艾先生竟然猛話好食,其實最好既證明會係呢樽果醬要幾耐先食得完囉