薰衣草園

本來同卡樂B去公園係去FUN FAIR玩下，點知行下遠D，行下又遠D，去左公園另外一邊，發現左個薰衣草園！

MAMI梗係好興奮呀！成日想去都無得去。

雖然呢度细细地，但一行入去都好香呀！

有花香就有小蜜蜂採蜜啦！連甲蟲都黎凑熱閙呢！


卡樂B又點呢？現塲真係有唔少蜜蜂，卡樂B又唔慣係D樹度穿來穿去，所以都有D唔自在架！

但佢當日都幾乖乖，跟住MAMI行左唔少時間等MAMI影相。

所以MAMI影完相就買左雪糕獎勵下呢位小朋友。

CHINESE BUFFET LUNCH

唔少英國BLOG友都食過中式自助餐，但大多數都有彈無讃。

原因係D菜式大都係鬼佬口味：汁多，煎炸為主。

城中有幾間中式自助餐，我地去呢間，開業都有差不多10年，MAMI初黎步到時唔少鬼佬同事都話好食，MAMI就諗：你地話好食既。。。通常都唔係我地覺得既好食。

直到幾年前先第一次去食 ~ 雖然都係鬼佬口味為主，但味道都算不差。

星期六日既午餐比平日午餐食物選擇為多，四面既熱櫃都開晒，平日午餐就剩係開兩邊。除左大路既多汁/煎炸香口野，仲有壽司，香酥鴨，有即炒粉麵+海鮮/肉類。


晚餐仲有魚生，蒸魚，燒味。咁耐去過一次~好人頭湧湧架！

MAMI今次一到步就餓到有D手震，要即刻開動！今次有新菜式：炸茄子同埋迷你三文魚餅。星州炒米係兩仔爺每次必食既！


定神之後，全速前進！壽司，熱葷（蠔油豆腐，茄子），豉椒青口，香酥鴨（卡樂B既！）


第三回合：又有壽司出籠，食！又想食少少紅咖哩，茄子好食返尋味，次次都要食咕噜肉，但今次已經無食每次必食既雞翼同排骨。


飽到要棄權甜品！卡樂B挨義氣幫手食埋MAMI個份！

呢個自助餐，每位8.8鎊，開埋茶就加多1鎊，卡樂B暫時都仲係免費，計起來都幾化算。我家兩個男人都係鍾意鬼佬口味既中餐，所以我地而家耐不耐都會去食一餐。

客串農夫（2）

咁又過左個幾月，種植情况係同人力投入成正比既 ~ 話明客串，梗係無乜努力過啦，所以。。。

魚翅瓜本來有兩棵係地，兩棵係盤，先個零禮拜一塲大雨：‘dup'死左最弱個棵，真係當塲折斷，反魂乏术，而家剩番3棵，大细同舊年同期既兩棵差不多。琴日又清理左週圍既雜草，但草地又要等艾先生有時間先可以剪啦！


呢棵係苦瓜，成7月先開始發苗，棵苗又生得好慢，有無得收成真係無人知！


前幾日艾先生清理另一邊BORDER既雜草時發現左呢幾棵植物。記得舊年都有幾棵類似既植物出過，當時D蕃茄唔够位生，當雜菜拔晒。今年MAMI覺得呢幾棵應該係長得出有野食既！影左張相問有無人知係乜？熱愛種植既何媽一眼就認出係薯仔。嘩。。。好開心呀！估唔到無端端有可能有薯仔收成wor！所以而家淋水/施肥，MAMI都會比D心機攪埋個幾棵薯仔苗，希望有機會玩掘薯仔呢！


最後。。。本來想扔，但都種埋左落地既一盤lavender開左花，不過只係一支獨秀。。。。