是日晚餐

五點鐘同卡樂B散完步返屋企先收到PAPI電話話會早D返黎,我地今晚一齊食飯,臨急臨忙...

打開雪櫃,打開雪櫃,有D乜?有D乜?

快D攞晒出黎! 快D攞晒出黎!!

煮埋佢!煮埋佢!!

是日晚餐:

• 叉燒
• 柱侯醬雜菜肉碎煮豆腐
• 清煮黃芽白
• 秘製甜豉油
• 白飯任裝

好彩仲有最後一份叉燒存貨,又有半隻黃芽白...唔係一家三口要叉住一千零一碟餸(仲要係PAPI唔多LI-KE既豆腐...)同豉油撈飯,點得?

卡樂B就開心啦! 有PAPI一齊食飯,食下自己個碗,又食下PAPI個碗,食完仲有DOUGHNUTS做飯後甜品,飽到今晚睡前奶都飲唔晒!

懶媽煮D乜？

近來都唔知忙D乜! 1日都係24小時,仲已經夏令時間多D日光,時間應該覺得見洗D,點知...屋仍然未執好,西文公課仍然有拖無欠,就連BLOG都寫少左...
係咪忙煮野食? 唔係囉!整黎整去都係個幾味,熟晒手啦...

• 呀蘇蒸肉餅 ~ 因為卡樂B肯食,差唔多個個禮拜都整,工多藝熟,而家整有時會加冬菇粒,梅菜或者就咁清蒸.調味方面都有進步,唔似初初咁淡口得濟.希望卡樂B繼續支持!!!
• 叉燒 ~ 又係差唔多個零禮拜就整一次,整得咁勤力係因為買左樽海鮮醬,唔用就會嘥,加上一次燒一PACK肉就可以有3-4餐存貨,好啱我呢D懶人...

不過...近期煮得頗多日本咖哩! 印度咖哩我好鍾意食架,不過因為艾先生唔食,我剩係會買READY MEALS,食味梗係同自家製有距離啦!加上印度咖哩雖然好食,但可能香料成份既多又重,我好多時食左都會瞓得唔好,真係少食為妙... 好彩!諗起D日本咖哩係甜既,係唐人超市又見到又得買.於是又比我發掘到D煮食新靈感:
預先煲淋薯仔,紅蘿蔔備用.先爆香洋蔥,蕃茄,青豆,然後加入雞肉,雞肉表面有淺金黃色就加入薯仔,紅蘿蔔,再加入水慢火煮熟,到雞肉差不多全熟就加入咖哩磚.咖哩磚煮到差不多溶晒就開始試味,加入適量清水調教咖哩汁濃度.

兩磚咖哩~卡樂B以為係朱古力,想攞黎食!

S&B呢個牌子MEDIUM既口味都我來講都夠辣,不過要卡樂B都可以食就要中和返D辣味.朋友介紹加入蘋果蓉就可以將咖哩變得甜.我用兩磚MEDIUM咖哩就落左差不多2/3個蘋果蓉,效果一流.

一個餸有5樣蔬果,又有肉,又開胃,整一煲又有2餐存貨[雪過好似D雞肉有淋D,個汁仲好味D],抵整!

另一個更懶既晚餐 ~ KEBAB. 我又好鍾意食KEBAB,因為我鍾意食羊 (不過又係得我一個人食...).要我自己一手一腳整羊肉串我就唔會啦...買一包雪藏羊肉串係冰櫃STANDBY, 雪藏羊肉串包裝上教用微波爐叮熱就食得,但係用焗爐焗20分鐘就正好多!切好蕃茄,青瓜,生菜,用多士爐烘熱PITA BREAD, 加入大量SWEET CHILI SAUCE就可以開餐!

大食會

上星期借復活節假期呢個籍口,我同幾個朋友FAMILIES就攪左一次大食會. 我準備左既菜式有...

• 可樂雞翼

好多鬼佬都唔慣要噒骨,有D直頭覺得要係個口吐返D野出黎係好無儀態幾食相,所以呢度D雞翼都係當CHEAP野咁賣.

鎊零銀一大盒,有成10隻,我地咁識食既中國人又點會放過?

買兩盒,切走雞翼尖再將雞槌同扣針斬開,食起黎就好方便!之前一晚用生抽,老抽,燒酒,麻油,姜,蒜頭,胡椒粉醃好.

第二日就用少少油,中慢火將雞翼分批煎至淺金黃色.

煎好就可以全部雞翼返落鑊,加一罐可樂繼續煮.

耐不耐兜下D雞翼,等每隻翼都可以浸下D可樂.食譜又有教唔好冚蓋煮,唔係會LUT皮LUT骨.

雞翼熟透就可以上碟,剩返既汁就繼續煮到杰身淋返上碟雞翼.                                      

• 西班牙奄列

詳細做法可以參考我以前寫既呢篇BLOG. 好耐無整啦,竟然連重要材料之一既CHORIZO都唔記得買,好彩CALL得切PAPI代買

今次煎既時候猛火左少少,整好後放焗爐保溫又唔記得落錫紙封住,所以個樣有D黑同乾,仲有個大峽谷[失敗,失敗...]

話明係大食會,當日我地D野食擺滿成檯架,除左我個兩味,仲有港式豉油皇雞肉炒面,菠蘿炒飯,泰式焗魚柳,葡式焗鱸魚加埋白果腐竹糖水....

我當然又係食到最後先停手個個啦...