有得飲又有得食...

呢幾日唔覺唔覺都整左幾樣野食BOR...數下先:

• 清補涼煲瘦肉: 一份湯包加瘦肉一舊煲個零鐘就有得飲,卡樂B啱啱心情好,好比面飲左一碗仔,不過我攞D淮山出來整碎比佢送粥佢又肯食,等我第日又整過先!

• 煲完湯有瘦肉食唔哂,一於廢物再做,學整豬肉鬆! 以前上網揾過食譜架啦,大概知道要落D乜調味,所以就趕緊時間速速開工!

做法又係好簡單: 用手撕開D瘦肉,越碎越好.開火暖定隻鑊,落瘦肉薄薄舖開,中慢火慢慢烘就得.

調味方面,我落左豉油,糖,麻油. 烘烘下D豬肉就開始邊深色/乾身,耐不耐抛抛鑊等D肉轉下身,烘得平均D.咁就食得啦!

點食最好?梗係送粥啦~好彩卡樂B今晚食剩左一碗仔...

食後感:唔夠味...下次一定要揾返D食譜參考下先得!另外,無芝麻,要記住下次去唐人舖上貨買定D睇門口!

食剩嘅肉鬆我用個盒入住當小食,當然比我出一啖,入一啖就消滅哂...

• 某日又整左盒有檸檬醬嘅MUFFIN,整呢款MUFFIN唯一要注意嘅就係落檸檬醬嘅時候唔好比D醬外露,如果唔係,D醬會被焗乾變硬,似波子糖.

出爐時間又慢左[卡樂B扑親,詐哂嬌要做樹熊],所以又黑面...

由於意外事件,卡樂B未能如常擔任首席試食員,唯有揾人補上, COMMENT 係...仲話下次整要落多D檸檬醬添!

卡樂B瞓醒覺都仲係好GRUMPY,要我餵!仲食左都目無表情...