魚樂無窮？

一直都想帶卡樂B去伯明翰既NATIONAL SEALIFE CENTER[國立海洋生物中心 ~ 個名好GRAND呢!] 入場費就算有折扣都要成12鎊一個人,所以呢個ITEM就一直係TO-DO LIST未郁過! 剛剛係WH SMITH買野送左一叠入場券買一送一COUPONS,加上公公婆婆黎玩,我地就决定去个度玩一日啦!

今次入到伯明翰好快就揾到個海洋生物中心,仲好快就泊好車,行出停車塲,過埋橋就係目的地,一切似乎太順利左D。。。

 
一入門口就一眼見晒呢個國立海洋生物館既特點~很袖珍！

 
每个塘都好淺水,D魚唔會游到"無雷公"咁遠,卡樂B企喺度EYE LEVEL就可以望晒D魚,各位攝影發燒友就可以踎得穩穩陣陣影大特冩.

公公婆婆望住一缸又一缸既魚竟然以爲自己身處西貢海旁既海鮮飯店,開始對D海洋生物評頭品足...
 
公公: 呢个鱸魚我地喺香港好少食,唔知點整好食呢?佢個女/我: 清蒸好食架[我講緊乜...]

 
婆婆: 呢D好似我地食嗰D倉魚.咦!仲有左口呀

 
食人倉: 婆婆,你食晒我D老表,比你個孫我咬返啖都唔過份啦

 
越行越覺得呢間野奇特:原來青蛙都係海洋生物WOR

行行下先諗起:海洋生物中心...點解仲未見到D海獅,海豚,剎人鯨架搵个職員問下,原來呢度係無架.不過職員提醒我地記得要過海底隧道,因爲有難得一見既HAMMERHEAD SHARK [双髻鲨],於是我地就继續行啦...
 
嘩咁快就過左海,條双髻鲨好鬼细條,所以真係好難見到(咪講話要影相!)

隧道盡頭係迷宫,我一望D鏡就已經覺得頭暈,影完呢张相一開步仲撞埋鏡!艾先生一入到呢就覺得CLAUSTROPHOBIC,所以我地决定U-TURN原路行返出去!

游覽完畢,全程唔洗两個鐘! 雖然我地比左4個鐘停車費,如此令我失望既地方當然係早走早著,快快去揾位飮茶好過!飲完茶去行街市,買左條鱸魚返屋企清蒸,總算得嚐所願

越來越嘆,越食越好...

爸媽來左幾日,因為我媽係無米落肚唔得既飯桶,午餐我已經好懶,一定係粉麵,晚餐一定要有米飯啦.
PAPI一向都唔明點解我地中國人一日可以食兩次飯,而家晚晚都煲飯,攪到佢有時會報名話今晚餐飯唔洗預佢,哈哈...咁我又可以正D我地喜歡既野食啦!

5月17日:薯仔燜雞翼 (難得有骨落地...)

 
5月18日: 清補涼煲排骨湯,燒排骨,黃芽白燜粉絲蝦乾 (卡樂B竟然肯食VEGETABLE!)

 
5月20日: 小棠菜(卡樂B又叫住要食菜...唔通公公D手勢真係好大分別), 清蒸SEA BASS (卡樂B鍾意D豉油,爸媽就話條魚都好有魚味,我又食到變左包尾大班...),個碟專登整比卡樂B既雜菜炒蛋就無人問津.

我仲有好多野想整想食,真係有唔敢想像一個月後會點...

洗塵宴

公公婆婆今年終於決定來這裡走走,小住一會,同隻曳曳卡樂B玩下...

星期六就到步啦[真好彩...遲一日又有火山灰要封機場]!返到屋企已經夜晚八點,肚餓之餘又眼瞓,一定要快有得食最緊要,第一餐飯係...CHINESE TAKEAWAY

星期日就開始小量活動 ~ 午餐係飲茶食點心,晚餐先可以叫做正正式式食來英第一餐.
準備左以下材料,做了3個餸...                  

 
準備中...                                                            

[咦...手腳有D問題BOR...洗塵宴乜唔係主人家下廚既??? 原因係卡樂B仲未習慣同公公婆婆一齊,有D怕羞要MAMI陪住,所以MAMI只可以落米煲飯,切定D瓜菜同負責其中一味.]
洗塵宴就係咁簡單: 鬼佬節瓜燜雞柳,番茄煮蛋,梅菜蒸豬肉餅   

 

呀爸呀媽: 你個女剩係識整D咁既餸架JA,黎緊既日子就靠你地啦...