减肥

MAMI做左幾十年人，都有過（好短暫）高高瘦瘦既日子。每次都係無心插柳咁就瘦左。瘦到咁上下就回升，回升。。。升到一發不可收拾既時候，MAMI當然會誓神劈願話减肥。講真的。。。每次都减唔到幾磅（即係無减過！）就停工！所以MAMI近年既體重係牛市（買股票又唔見有隻牛比MAMI執下！）

唔知邊到黎既勇氣，MAMI又每晚都仲會上磅望一望個數字，大哎一聲‘NO GOOD’之後又無左件事。。。

直到。。。今年去診所做每年一次既胆固醇測試，打電話去問結果時接待處叫MAMI第二日再打黎同醫生傾幾句。MAMI就真係知道要做D野啦。。。

雖然肥胖同胆固醇高低無直接關係，但MAMI一定要降固醇+减肥囉！

咁。。。一定要節食/改變飲食習慣囉！

MAMI成日都會睇人地講點樣减肥，都頗有心理準備想揾個乜食譜照跟 ~ ‘巫婆湯’。

材料唔難買，樣樣切D落煲，唔覺唔覺就一大煲！煲到咁上下攪一攪就成煲起晒水泡，真係好似卡通片D巫婆煉药咁！煲好就落D鹽/黑胡椒調味。

跟據介紹，煲呢個湯唔可以中途加水，唔可以翻煲，一日又要食/飲個湯10次8次。MAMI只係做好煲湯午餐晚餐時份就飲一大碗。介紹又有講每日要食/唔可以食D乜。要跟到足既話，對MAMI黎講非常唔容易。

首先：介紹無提早餐食乜，都係飲菜湯？MAMI覺得好難接受，而且一早起身趕住返工，邊有時間加熱D湯呢？MAMI係一定要食早餐既人，所以早餐照舊：植物油多士+咖啡（少糖，少奶）


上午10點零鐘MAMI就會有少少肚餓，會跟食譜帶D生果返公司咬下。初頭兩日要習慣唔飲得奶茶，改翻飲無奶既紅茶/绿茶茶包都幾辛苦。

到第4日，食譜話全日係飲湯，飲脱脂奶，食香蕉。


MAMI以為會好過D。但PAPI聽到一日最多可以食8隻既時候都WARNED MAMI：香蕉唔係咁易消化架，唔慣成日食唔好一日食太多隻呀！MAMI個日食左5隻，到夜晚成點鐘個胃都仲頂住頂住。第二個CYCLE既時候，MAMI一日食左3隻咋！

第5/6日，可以食蔬菜+牛肉。MAMI唔食牛，改食魚，食得好開心呀！


第7日既紅米，MAMI無食過，只係照樣食菜/水果/少少肉。

介紹話，跟到足食到第3日已經可以减7-10磅。除非MAMI唔洗返工/唔洗凑卡樂B，MAMI跟本係唔可能跟足呢個减肥食譜架啦！

咁MAMI跟唔足又减成點呢？呢10日内都輕左6-7磅。

雖然離目標體重仲有一大段距離，但都算係有個好開始啦！