跨年省親 - 排隊，揾食！

返到香港無乜野做，有時間就去排下隊，揾D好食既野食下啦！

• 深水埗既樹記腐竹

去到望望下，我就記得返我地细细過個陣公公婆婆都係黎呢度買腐竹架！雖然工塲已經搬左返大陸，但做法/用料同以前一樣無變，識食既人就話樹記既腐竹特别有豆味，所以成日都好多人黎排隊。

朝早10點幾去到，條龍大概有幾十人啦！當日我同呀妹兩個一黨，一路排就一路盤算下買乜好。排排下我就上前收下風問下自己想要既仲有無貨，唔係就嘥時間白排一餐架！既然排開隊，又打電話問下有無人要搭買。同前前後後既龍友交流下入乜貨/食用方法。。。45分鐘既等候時間都唔算難過。個個就滿載而歸！

同日黄昏出街搭地鐡，見到有兩公婆既餸籃有份腐竹，同車既另一位耆英就問係咪係樹記買架。幾個人又係車箱度講樹記有幾好食。後來两公婆係同我一齊係中環落車/轉車呀！真係只要係好食既野，幾遠都有人黎買！

• JENNY BAKERY 既曲奇餅

第一次去赤柱想買，装修，買唔到。但聽過唔少人話JENNY好食，於是上網揾下邊度有得賣啦！讀埋D食評，發現原來D曲奇好好賣，之前一日做好，買晒就無。過時過節就排晒大隊黎買。於是媽咪又趁過開中環去見識下啦！
11點50分去到商塲，未到LUNCH TIME應該無咁多人啦？揾緊間舖既時候見到有條20人左右既人龍，一定係啦！即刻埋位！商塲特派管理員就已經同大家宣報：“大盒装4式/8式，细盒8式都已經賣晒，剩返係细盒4式。”原來已經無得揀！唔怪得條龍行得咁快啦！我排到第二位時，管理員就問D姐姐仲有幾多貨，等佢可以叫人唔洗排/戳龍。姐姐一數，就話我前面個個買完，就剩返3盒西4式，問我要幾多盒。原來我係當日最後一個客：我要晒3盒呀！管理員隨即係我身後關門！向誉既就一哄而散。我見到有幾盒撞凹要退返工塲既大盒8式，我問姐姐揀左一盒唔太凹既打算比公公婆婆自己食。完成交易，個鐘都未踏正12點！

• 順興行既溏心皮蛋

媽咪鍾意食任何既蛋，皮蛋自己整唔到就更加恨食啦！咁啱經過中環，又去撞下彩睇下揾唔揾到買D黎食。係上環兜兜轉轉终於揾到！仲咁啱無人排隊，行埋去望下個價錢牌，得雞蛋，鹹鴨蛋，皮蛋，鹹蛋黄4樣野賣。ORDER左之後老板娘好快就包好計好數：$32.50. 我呆了：咁平?一問：原來皮蛋係$15/4隻！（唔係我以為既$15/1隻!咁好多人都話呢度D皮蛋包溏心好食嘛。。。) 買完，映埋相，一班OL經過就排左條龍出黎等買啦！
呢批皮蛋全部都會落入我既肚皮架啦！點食? 剝左殼，洗一洗，切開，滴少少麻油，加上公公自家醃制既酸薑，好醒胃呀！

拜年

聖誕忙完都未抖順條氣又到農暦新年。。。

其實有D 新POSTS已經寫緊，但又未執好相。。。

所以，同大家拜個年先啦！

祝各位龍年事事順景，身體健康，心想事成！

今年有機會親自同公公婆婆拜年，睇下佢同公公婆婆講乜！

第一部份算係合格啦！但第二部份就曳曳啦！大家聽唔聽到卡樂B同婆婆講咩呢？

真醜怪！但媽咪都决定要放晒呢兩個VIDEOS上黎，等佢大個睇返“瘀”下都好！