開心的约會 ~ 牙醫

今日係全家見牙醫既日子。講明全家，卡樂B當然都有份！

其實呢個小朋友都唔係第一次見牙醫啦！早係1年前我地都同佢去過，第一次去佢好驚，牙醫比晒D架罉佢玩都唔肯坐低，牙醫剩係可以等PAPI抱住佢/擘開口個陣幫佢數下有幾多隻牙仔就算。

第二次：佢瞓左覺，無得睇，唯有下次约過！

第三次：幾個月前，佢係屋企唔小心撞到個嘴，仲流左小小牙血，PAPI擔心撞鬆左D牙要脱，所以都约去牙醫度檢查一下。去之前，卡樂B係NURSERY玩緊，PAPI打電話通知NURSERY卡樂B要早退去見牙醫，咁NURSERY D姐姐就同卡樂B講要見牙醫，仲成班小朋友同卡樂B一齊練習擘口！卡樂B去到牙醫度就駕輕就熟，乖乖擘大口比牙醫檢查！

今次係第4次去。基本上，卡樂B係熟晒地頭，一去到登記完就走去等候室玩LEGO，牙醫經過叫我地入去佢就跟住跑入去。

我地都未决定好邊個睇先，佢就已經自己爬上張椅！

牙醫仲PAN低左張椅少少佢都唔驚。準備好啦。。。放馬過黎！

就係咁，牙醫叫開口就開口，埋口就埋口。。。

唔洗2分鐘就完成檢查，獎貼纸一張

之後輪到PAPI檢查，牙醫要放平+升高張椅，卡樂B望住就有D驚啦！我問佢要唔要試下，佢即刻擰晒頭，但我都趁機會解釋比佢聽牙醫做緊乜，點解要放D一枝枝既野入個口度，等佢明白檢查牙齒既唔同方法，第日牙醫都會咁同佢做。

返到屋企，卡樂B心情都仲好靚，仲好巴閉咁同我地講 “I LOVE THE DENTIST SO MUCH THAT I OPENED MY MOUTH AND LET THE DENTIST SEE MY TEETH...”