還我清白...

今日星期日,MAMI噚晚成3點先覺覺豬,卡樂B就如常早睡早起...,PAPI好旱有地帶左卡樂B落樓下,整左早餐仲餵卡樂B食埋.我就幸運地懶床至9點零先爬起身~因為奇怪點解仲未响鐘叫我落去餵仔,原來佢哋已經食飽飽.

取消左去教堂[SORRY...],PAPI就開工清理後園嘅雜草,卡樂B玩夠之後就開工小睡...見大家咁勤力,見廚房有空檔,就趕緊開工!

整左幾次MUFFIN,其實都係出貓用預先混合好嘅盒裝MUFFIN粉.最近買左幾本COOKBOOKS,睇落要自己溝粉都唔算太複雜,我就揀左簡單中最簡單嘅一款試整.

BERRY BUTTERMILK MUFFINS

 
預備一盤乾料,一盤濕料,攪埋一齊...

 
落埋盤藍梅就可以盛入紙杯模入爐. 因為我貪方便,無用焗MUFFIN專用焗盤,所以...

 
每個MUFFIN都造型獨特,方嘅有,尖嘅又有,唯獨無圓嘅,要我再整都整唔返

艾先生見到盤餅,疑問就黎啦. 點解D MUFFINS 白矇矇嘅...係咪未熟呀?咁嘅樣,可能成盤唔要得啦,唔好比卡樂B食啦...

我就當然心有不甘啦! D係顏色比較淺,但個餅真係熟個BOR.其實我CHECK盤餅個陣都有呢個疑問,所以RECIPE話焗20分鐘,我都再等多10分鐘,做多次牙籤測試先熄爐...
 
最實際嘅測試莫過於親身試食,於是我就開一個試吓...

 
卡樂B當然要試食埋一份啦[PAPI點都阻止唔住]!

我覺得RECIPE話比250g藍梅好似好多,所以我剩係落左150g.好彩落少左,因為食落都頗酸.
卡樂B食左幾啖,突然嘔呀,艾先生更加認為D餅唔熟. 其實卡樂B試食之前先啱啱食飽飯加乳酪,最大可能係D藍梅太酸令到有少少反胃.

攪返乾淨卡樂B,我就再自我檢討,睇多次個RECIPE:

• 本書都話係PALE GOLDEN BROWN喎,即係我無焗唔熟D餅啦!
• 唯一問題係...BAKING POWDER [人哋寫1 tbsp, 我落左1 tsp...],唔怪得餅身咁硬啦.

比人諸多批評之後,我都疊埋心水要一個人承受晒D餅架啦...1盤12隻,試食左3隻...臨訓包返好剩返個D聽日食...
 
咦...乜我屋企有老鼠呀

Toyug Chighirtmasi

今次好勇:連個菜名點讀都唔識就試整. 原因只有一個～咪就係卡樂B囉!

我同艾先生都係愛蛋之人,正正得正,卡樂B竟然係唔鍾意食蛋嘅,早餐我食烚蛋想比少少佢試下,舊蛋都未到嘴邊佢已經作晒嘔...試左一排先發現佢剩係食有茄汁豆混埋一齊嘅SCRAMBLED EGG,攪到我都唔敢用蛋整餸比佢食...

某日,我又無聊上網...比我見到呢個食譜,其實係阿塞拜疆菜,譯做雞.蛋 (CHICKEN WITH EGGS)
 
四樣材料:雞肉(有無骨都得),洋蔥,番茄,雞蛋
 
爆香洋蔥留起備用,再落Ｄ油加牛油將雞肉煎至淺金黃色,加鹽/胡椒調味,加入洋蔥/番茄(或茄膏),中慢火煮20/25分鐘.

 
等雞肉煮熟,洋蔥/番茄到溶溶地就可以落蛋,我用左焗爐黎完成最後呢個步驟,轉晒鑊雞落焗爐碟,淋蛋漿上面.
 
15分鐘後D蛋SET就攪掂,有得食！
 
頂級為食豬卡樂B又坐係度等食啦!

D蛋混入左洋蔥/番茄嘅香味好易入口,所以佢都肯食啦~謝天謝地,就算艾先生唔嗜食雞都好比面食左幾件送飯,我就更加唔洗講啦... 

呢個菜我做得正唔正宗就唔知啦!不過唔難做,好玩.個賣相懶HOMEMADE/ AUTHENTIC,D材料易買又有營養,我一定會再整!

唔多成功嘅香橙乳酪蛋糕...

入爐前真係睇唔出有問題...

 
一出爐就知失敗左, 個餅無起過嘅?我諗係我仲未好識用個HANDMIXER,加上一開機就嚇醒左卡樂B,整到我手忙腳亂,唔敢再攪,草草收場...

 

 
但卡樂B畢竟都係我嘅頭號粉絲,照樣拍爛手掌等食...認真抵錫

仲食得好滋味咁樣添...

最後唔理三七二十一,都係用手食最爽...

 

呀仔!有你支持,我一定會再接再勵,整一個成功嘅香橙乳酪蛋糕比你食!!!

今時今日咁嘅服務態度點得架！

我諗係英國無人唔幫趁瑪莎,艾先生全身衣著百分之九十以上都係瑪莎出品,仲係咁多年都係著返同一款. 係呀! 因為有D BASIC ITEMS 係常青GA MA,著舊左照買返就得. 上兩個星期去睇,無SIZE, 問左話呢個星期會補貨, 入到去係架見唔到有啱SIZE, 我就走去揾人CHECK 貨LOR. 店員話舖面無呢個SIZE 賣啦,不過我可以係網上買,24小時前嘅存貨紀錄話買剩兩條. 我問可唔可以幫我ORDER係舖攞, 佢話而家唔做呢個服務啦... 我問佢網上訂購係咪要比郵費,佢話唔清楚 ,佢剩係跟公司指示提議客人用網上訂購服務,我就好隨便咁比左D COMMENTS: 你連呢D咁基本嘅資料都比唔到我就叫我上網訂啦? 無端端要我比POSTAGE,上網買,我無時間係屋企等送貨,有FAULTS我又要比錢寄返件野比你地更換...

呢個時候有個樣似做得耐D嘅呀姐行過,佢即刻叫埋呀姐過黎幫手,以下係我地嘅對話:

姐: (跟據個MON顯示嘅資料讀左比我聽), £3.95, 2至5日送貨, £4.95就訂購後第二日送貨.
我: 我都已經係呢度啦,你地都仲叫D個返屋企用網上購物? 唔通你地唔再想D客黎SHOPPING?
姐: 我都係跟公司指示講: 你需要嘅細SIZE,網上先有得賣...
我: 吓...細SIZE人就要上網買,夾硬要比郵費? ... 如果我而家就買兩件唔啱SIZE嘅返去,然後再攞返黎換SIZE, 舖面無貨,咁你地會唔會幫我訂返啱SIZE 嘅比我換返?
姐: 唔得,因為而家已經無左ORDER呢個服務.
我: 咁我已經比左錢都唔可以訂? 唔啱SIZE又無得換, 點算?
姐: 我地會退返D錢比你...[天呀... 我而家係要貨唔要錢呀!]
我: 我真係覺得好無道理. 唔做免費訂貨都算啦, 我問到買左要換SIZE都話無得訂黎換! 我特登抽時間黎呢度買野竟然叫我返屋企用網上購物...
姐: 你可以同總公司投訴呢個新制度 [仲要我繼續嘥時間???]
我: OK, 我諗我會叫我先生以後去第二間公司買衫.

其實一路以來係瑪莎(或者英國)買野,我都覺得顧客嘅權利有好多,不過就好多人會利用呢D權利黎攞公司便宜: INPULSIVE BUYING之後又攞返哂返去換錢; 得閒無野做就買埋一堆返屋企比人揀,唔鍾意又攞返黎退貨換錢; 求其見無SIZE就去訂貨,訂左貨又唔PICK-UP; 著一次又諸多藉口話有問題要退貨...所以Ｄ公司嘅CUSTOMER SERVICE係永遠都排長龍. 聖誕,新年之後仲更加恐怖,難為我呢Ｄ咁GENIUNE嘅SHOPPER就無法買到要用嘅野...真係乜野世界

呀媽,請收睇!

係亞媽心目中,仔女再大再老都係細路仔,唔識野. 所以每次講電話都仲有好多煮食錦囊要傳授,雖然我唔識煮九大簋,但係我D野食都算食得落肚架...

我好鍾意冬瓜炆豆腐卜,不過呢度難揾豆腐卜,而且大熱天時食又好似比較"立口",諗起以前成日食嘅冬瓜火腩同埋我地試過整嘅蠔豉豬肉炆冬菇都好好食,所以就參考左呢兩味餸嘅材料,做法,整左以下呢個餸: 冬瓜腩仔炆冬菇.

需要嘅材料一眼見哂 ~ 冬瓜,腩仔,冬菇,蠔油

我用左最懶嘅方法黎煮:腩仔出好水,用片薑爆香冬瓜,加入冬菇,腩仔,加水慢火炆一個鐘,落蠔油再炆多半個鐘就收火食得!

比你見到我咁整,你一定會話:應該用少少油,燒酒醃下D冬菇,咁炆起黎先香!

不過...我用懶方法整出黎都好好食,都未開飯我已經出一啖,入一啖食左好多冬瓜,最後要切埋剩返個半份冬瓜炆埋落去先至夠有多一盒收落冰箱遲D食. 呀!最緊要係卡樂B都好鍾意食呀!!!

所以...呀媽,請你不用擔心你個女同埋個孫會餓親!

我係小吉...

MAMI整左法式西多士,叫我學用叉食WOR...

再黎多次..

.

睇返呢兩個VIDEOS,我都覺得幾好笑,因為卡樂B有時做野真係會好似PROGRAMMED左咁,做黎做去都係同一樣動作,但係佢又樂此不疲...

一成一敗~打個和...

講敗左D乜先啦...估唔估到我想整乜野?

我都驚會發得緊要個紙杯頂唔順,特登落左雙重...

點知一落蒸籠就塌哂....

善後工作仲好金添

其實我學人整馬拉糕LOR!見D食譜教話用碟蒸,糕底會難以升發,沉底,但係又諗唔到可以用乜野其他容器代替,記得馬拉盞都好似係用蛋糕紙杯仔,所以就攪成咁... 但食落都好味,有時間我要再諗下點砌個蒸盤先得

忘記失敗,努力向前! 上個星期整完西班牙雞煲之後仲有CHORIZO未用完,今個星期到期食唔切就會哂,如果再整雞煲就一定有投訴...所以我就上網揾下有D乜野可以整.比我揾到呢個食譜: PORK WITH PAPRIKA & OLIVES,又係一煲過容易整/HOMEY/ HEARTY DISH. 睇埋其他人比嘅COMMENTS,我都跟據我個人喜好改動左個食譜少少.

我用NECK FILLET (出奇的嫩同淋), 撲左麵粉先落煲爆香.

跟住就可以爆香紅洋蔥,落埋CHORIZO, PAPRIKA.

加豬肉爆多一陣就可以落番茄,清雞湯轉慢火煮一個鐘.食譜教話成煲放入個低火焗爐焗一個鐘,我就開最細火係爐頭燜.

一小時後就加雞心豆,青橄欖. 我將青橄欖份量減到好少(10粒左右切碎) ～ 因為買錯左夾有鹹魚仔嘅青橄欖,鹹上加鹹[卡樂B點食呀?]. 再燜一個鐘...(我就45分鐘左右加料,然後再加45分鐘就收火．

起菜!今次仲認真到落埋PARSLEY添

物以罕為貴, 整好擺一小碟係廚房, PAPI 就猛話好食, 又話我唔整多D ~ 其實我雪起左3份: 1份我嘅,2份卡樂B嘅)...不過如果我成煲擺係度佢又會話咁夜點食咁鬼多肉? 好難伺候嘅醃尖大少...

呢個菜煮出黎無雞煲咁肥/多油,不過就偏鹹. 未開飯我就比左少少卡樂B試食,佢不停行返轉頭再要,真係非常為食鬼!

到第二日又加左鬼佬節瓜落去燜一燜,煲埋煲白飯,一個公仔麵湯碗咁上...食到要抬住個肚