閱讀

以前都講過，英國呢邊好鼓勵小朋友從小養成閲讀既習慣，所以MAMI間唔中都會帶卡樂B去圖書館借書一齊睇下。而家正式返學，經過幾個星期SETTLE DOWN之後，终於開始派書仔比小朋友返屋企睇。。。

卡樂B收到一本家課紀錄，一SET名卡，3本最初級入門既OXFORD READING TREE。

家課紀錄入面加送一本小册子介紹家長點樣同小朋友進行閲讀活動。MAMI細個無養成閲讀既習慣，而家大個又眼盲，睇呢本書仔野都要唔少時間呀！~ 更加覺得卡樂B要學好點睇書！

知道點做就同呀仔開工！

一打開本書。。。原來係無字天書黎既！所以要利用名卡幫手。决定好人物名稱，就可以同小朋友玩講故事。


但MAMI砌黎砌去都覺得D名好似唔多親咁。卡樂B就剩係記得其中幾個，連D猫狗叫乜都唔知。。。

其實老師派書比大家之前都同大家介紹過書入面既主要人物架啦。。。仲有！第二日同卡樂B返學，係課室見到壁報板有人物介紹。。。[唔同呀仔入課室而又未用過呢套書既就會麻煩D。]


咁返到屋企又可以繼續講故事。

‘讀’完幾本無字天書，MAMI要係家課紀錄簽名確認，老師可以跟住派個LIST派其他書比小朋友。如果有疑問可以寫低，或者小朋友讀得好，又可以提下，老師會回應。

除左每星期3本必讀之外。學校又有READING RECORD RACING TRACK呢個班際閲讀獎勵計劃。不論係乜書，家長同小朋友讀左書（當然要小朋友讀得出，或者肯對住無字天書作得出故仔），就可以簽一格比小朋友，簽晒條跑道/完成賽程就可以帶番去學校比老師記上壁報板。

努力中。。。


雖然話英國既學校無乜功課壓力。訓練閲讀如果單靠返學既少少時間當然係唔够。而學校係好強調校方/家長兩方面合作教導小朋友既重要性。所以都唔可以話全無壓力，但MAMI都好ENJOY同卡樂B一齊讀書，希望佢讀得開心之餘都能够有所領會啦。。。

新裝修/新開張

屋企附近間瑪莎百貨呢大半年攪裝修，改頭换面。暑假開始陸陸續續開返D封左/要變身既部門。裝修後有乜唔同呢？

CAFE搬左去另一個角落，入門位置多左，可以好好DISPLAY D餅食比大家慢慢揀。

牆上既裝飾/檯椅都换上左比較輕鬆既顏色/設計，好吸引大家入去坐坐呢！

卡樂B當然唔執輸要飲杯野/食件CAKE！


瑪莎既食品部一向都好吸引MAMI。。。裝修後加多左一個DELI櫃位，有新鮮燒雞，靚靚火腿，READY MADE菜式/沙律/汁酱。


仲有即做新鮮意粉，肚餓既可以坐低食埋先走。IDEA唔錯，有機會會試試。。。


超市食品方面：以前瑪莎係清一色剩賣自己招牌既出品。但為左同街外超市搶客，呢幾年都引入左唔少其他牌子既食品/雜貨，又有一D靚D/特别D既食材：以前見就係歐州各國既著名物產為主（例如：靚D既意粉，法國MUSTARD，西班牙SAFFRON咁喇。），今次去連日本沙律酱/WASABI都有賣！價錢比係唐人/亞州超市賣得貴，但急起黎想食，都可以係呢度揾到！


卡樂B好鍾意食既炸蝦，當然無正宗日式天婦羅既鬆脆，不過用焗爐焗左出黎都脆口，好送飯架！


呢個READY MEAL唔通玩FUSION？MAMI就唔大機會會試啦！謝謝。。。


今次大裝修，SKINCARE SECTION係重頭項目。引入既新牌子都算係既揀手架！

MAMI近期大愛既APIVITA！有TESTER，又可以摸下件貨！日後會多D黎試TESTER，試左就上網買！因為買得幾件，就算計埋郵費都仲係平過瑪莎現貨呀！


H2O：應該係以前係香港見個個啦！但又加左新既LINE。CRABTREE & EVELYN唔係全線齊晒，主打手部護理！AUSTRALIAN NATIVE BOTANICALS？新牌子？有無人知好唔好？


傢俬部既陳設都改變左風格，有D似IKEA。


仲有部超大A貨I-PHONE比大家玩：其實係ONLINE CATALOG黎既。。。


幾年變一變，行起黎無咁悶嘛！

另外，MAMI OFFICE附近開左一間新TESCO，唔係EXTRA/24小時营業個種，係呢個連鎖超市品牌既中屬於中型大少既分店。但因為近OFFICE，耐不耐都要幫趁架啦！所以都要入去巡視一下，望下D擺位咁啦！基本貨品算齊備！比MAMI見到有D野係連平日去開間EXTRA都揾唔見到既。。。

大白兔糖。。。好多鬼佬都識得既中式糖果。

珠江橋牌豉油。。。ERH。。。强國人出品。。。知道有得賣就够啦！

唔知點解，入貨既又會入到嘉頓威化餅，卡樂B蝦條。。。

大家鍾意忌廉溝鮮奶嗎？MAMI到而家都未攪得清楚究竟係忌廉撞落鮮奶定係VICE VERSA？次次整都係錯完再錯，有無BLOG友知道正確撞法呀？


十月初五既腰果COOKIES，係港澳有賣嗎？都算鬆香。。。可以啦。


其實。。。呢D大部份都唔係MAMI好恨食既中式食品，但見到鬼佬超市都竟然會賣，覺得幾得意咁啦！

 

入學的準備 - 校服篇

準備篇寫到過晒秒。。。無法啦。。。日日寫少少，臨開學，想埋尾，卡樂B又咳，咳得緊要仲會要嘔，攪到MAMI晚晚提心吊膽看住佢訓。。。看得佢黎自己又訓埋。ANYWAY，趁今晚OK（TOUCHWOOD！）就努力完成埋呢篇。

**********

英國既小朋友係要著校服返學架！呢樣，MAMI鍾意呀！唔洗煩每日著乜，而且MAMI覺得有校服先成體統呢！

英國大部份小學既校服，唔似香港咁樣樣都要同指定供應商訂購，好多時可以去超級市塲/百貨公司跟顔色買就可以。


某D ITEMS，例如：書包，JUMPERS指定要有校徽，以前要同校服公司買，但呢幾年唔少學校都授權左比超市係ITEMS上繡上校章，訂左繡好，免費送貨，價錢仲平一大截添呀！


卡樂B既校服都係簡單為主：灰色長褲，白恤衫+領呔。夏天可以唔打呔，就咁著白POLO SHIRT就得。冬天换成長袖恤衫+領呔+JUMPER。

條領呔原本係真呔黎既，但咁細個小朋友點會識打呢？而且一定唔會日日重新打過，所以PAPI就做D小手工改装左條呔，加橡筋，一帶上去黐埋就係！[一路UPDATE/埋尾呢個POST，到今日第5日返學，卡樂B已經唔見左條呔啦！一熱就除，除左又唔跟手擺返落書包。。。又要揾時間/金錢/心機整過一條。。。已經同老師報左案，老師話唔洗擔心，條呔慢慢會游返出黎既。。。]


冬天著係外面最厚既褸，可以著任何顔色加有防水功能既就最方便。家長們其實都好怕小朋友們既衣服弄得太污髒，所以都會買比較深色既防水太空褸。

夏天校服，買左4件短袖恤衫，2件POLO SHIRTS，4條褲。。。記得細個返學，MAMI得夏天/冬天校裙/運動衫/校褸各一，細佬讀到中學日日踢波身水身汗都係得個一千零一套。。。但呢度初入學既小朋友入既係RECEPTION CLASS（等同香港幼稚園高班），課室有各類興趣/遊戲/玩具檯，但老師真係教授/講故事既時候，小朋友係排排坐/坐地下既！卡樂B一入唱游班，條條褲既膝頭都磨到退晒色，D衫褲日日唔係食野整污髒就係有水彩顔色/GLITTER，所以都係要買定多幾件，希望够替换啦！


課室外面就係RECEPTION CLASS專用操塲，學校差不多全天候都會比小朋友到操塲玩，落雪地面結冰除外！所以小朋友要留一套防水外套/褲+水鞋係學校。要求既衣著MAMI都準備好，但到時會唔會自己知道要著好先去玩，MAMI真係唔知！唯有寄望卡樂B學會照顧自己，唔好凍病返黎。。。


運動堂既運動衫要用運動袋入好。上堂前换！一年四季都一樣：白色短袖圓領TEE+波褲+白袜+黑飯魚。學校冬天室内暖氣話係OK既，但MAMI冬天始终都係唔慣短袖。。。開左學一定要問下凍天用長袖/JOGGING BOTTOMS得唔得！仲有：原來PE KIT係要每日存放係課室既CLOAKROOM。老師話：PE堂唔會著得好污髒，唔洗個個禮拜洗。。。每個零月放長假先帶返屋企清洗都無問題WOR！


低年级係遊戲中學習，所以無課本 ！（即係唔洗買書！）。要寫字課室有纸筆供應。所以書包係唔需要既！學校有故事書派返屋企讀/有NOTE比家長，通通放入呢個薄切切既書袋就够晒！


MAMI趁6月做特價個陣（8折呀！）都已經買好晒大部份校服用品。開學前趁PREWASH既時候就比卡樂B試下D恤衫啦。。。點知。。。啱啱好咋。。。


要攞返去换大一個碼先得！其實收據印左話7月係最後换貨期限。MAMI唯有硬住頭皮帶晒D衫返去問换唔换得啦！好彩！可以同款换碼無問題，如果無得换，著一陣又要買過批新既話，荷苞會好傷呀！

SIZE攪返掂，洗過水，仲有好緊要做既就係：身上所有可以除得出黎既都要有名牌標籤。標籤要用大熱燙斗壓住20秒燙上去，凍返再燙，重複做3次。MAMI開燙斗，卡樂B就要做人肉計時器：幫手數1-20。。。


最後就係買鞋。卡樂B今年對脚好似吹氣一樣，大得好快，攪到MAMI都唔敢太早買定返學鞋。8月中先去啦！去到攞即塲籌，人山人海到呢。。。

唯有預約兩日後去過！有預約，一去到就可以度脚。度好脚就揀款，卡樂B要買黑鞋同黑飯魚。我哋得一個小朋友要買鞋，揀款都算快（男仔無乜款揀嘛！），都要差不多15分鐘先攪掂我哋埋收銀比錢。呢度唔似香港，唔會一個店員同時SERVE幾個客人。有D家庭有2個小朋友要買鞋，所以如果要輪即塲籌，等1-2個鐘絕對無誇張！買好鞋，又係要貼好名牌。


一輪攪作，终於執掂卡樂B既校服。開學第一日。。。TA DA！